Соломона хамгин сән дун 6 - Хальмг келнд орчулсн Әрүн Бичлһс1 – О, сәәхләс дунд хамгин сәәхн күүкн, Чини иньг альдаран йовв? Чини иньг альдаран йовҗ одв? Хамдан терүг хәәхмн! [Күүкн:] 2 – Мини иньг садтан орв, Сән үнртә цецгүд дунд йовна: Тенд тер сад дотр бәәх, Тенд тер лилия цецгүд цуглулх. 3 Би – терүнәв, Иньг – мини, Тер лилия цецгүд дунд бәәнә. [Көвүн:] Тавдгч дун 4 – Эңкр күүкм, чи Тирца балһснла әдл сәәхнч, Мел Ерусалимлә әдл йир сәәхнч, Мел туг дор зогсҗах дәәчнр мет сүртәч. 5 Бичә намаг тиигҗ хәлә: Би чини хәләцәс үүмҗәнәв! Чини толһан үсн – ямана сүрг мет, Гилад уулын ташуһар бууҗах мет. 6 Чини шүдд – сүрг хөд, Чивәд тедн уснас һарчах бәәдлтә: Тедн икр хурһд мет, тооһан геедго, цугтан хошаһад. 7 Чини халх гранат темснә өрәлин бәәдлтә, Тернь бүркәг дорас гилвкнә. 8 Хаана 60 хатн, тооһарн 80 хөөт гергн, То уга күүкд цугтан нанд юмб? 9 Ор һанцхн – мини һууҗа, Орчлңд әдлцдгнь төрүц уга. Экиннь һанцхн күүкн, Экиннь дурта күүкн. Терүг үзсн күүкд магтна, Терүг хаана аһ, Хөөт гергчүд буульна: 10 «Тер кемб, хәләцнь – солңһ мет, Тер сар мет йир сәәхн, Тер нарн мет герлтә, Тертн туг дор бәәх дәәчнр мет сүртә?» 11 Би яңһгин садт орув: Ташу һазрин ноһа хәләхәр, Тенд уста үзм урһҗахинь хәләхәр, Гранат цецгәлҗәхинь үзхәр… [Күүкн:] 12 – Энүг медхин өмн мини седкл яһҗ Мини келн-улсин сәәчүдин Тергнд күрсинь медҗәхшв! |
© Институт перевода Библии, 2002-2023
Institute for Bible Translation, Russia