Соломона хамгин сән дун 5 - Хальмг келнд орчулсн Әрүн Бичлһс

¹ – Келсн күүкн, эңкр минь, Эврәннь садт би ирүв. Энд мирр, каңкнсн өвс цуглулув, Балан идәд хәләвүв, Бас чаһран болн үсән уувув. [Ерусалимин күүкд:] – Үүрмүд, эдлтн, уутн! Дурнасн согттн, иньгүд! [Күүкн:]

Дөрвдгч дун

² – Би унтв – зүркм унтҗахш… Би соңсҗанав – эңкр иньгм үүд цокҗана! «Мини эңкр, иньг минь, мини һууҗа, Орчлңд әдлцдгнь төрүц уга, секәд орк! Мини толһа чиигәс норч одв, Мини үсн сөөһин чиигәс норв!» – гиҗ тер келдг билә.

³ «Би ода хувцн угав – Дәкн бийән хувцлхмби? Би көлән уһачклав – Дәкн терүг киртәхмби?»

⁴ Һаран үүднә заагар иньгм орулхла – Генткн зүркм дольглад одв.

⁵ Би иньгән орулхар һархла, Мини һарас мирр дусҗав, Хурһдасм мирр төдг деер дусҗав.

⁶ Иньгтән үүд секҗ өгхлә – Иньгм йовҗ одсн бәәҗ! Тер уга болҗ одв – тегәд би менрәд одв. Терүг хәәсн бийнь, олдсн уга. Терүг дуудсн бийнь, хәрү уга.

⁷ Балһс эргдг маначнр харһв: Бийим цокад, гүвдәд, Деерк бүркәһим шуулад хайв. Дәкн тедн балһсна маначнр!

⁸ Ерусалимин күүкд, тадниг йир эрҗ сурҗанав! Таднд кемр иньгм харһхла, Терүнд ю келхвт? Дурн намаг авлҗана гитн. [Ерусалимин күүкд:]

⁹ – Сәәхләс дунд хамгин сәәхн күүкн, Чини иньг юуһарн талдан көвүдәс сән болҗахмб? Маднас эн андһар авчахлаг, Чини иньг юуһарн талдан көвүдәс сән болҗахмб? [Күүкн:]

¹⁰ – Мини иньг цаһан, улан нүүртә, Арвн миңһн әмтнәс темдгтә.

¹¹ Терүнә толһань – цевр алтн, Терүнә үснь отхта, Тернь керән өңгтә – хар.

¹² Терүнә нүднь – усна урсхулд бәәх көглҗрһнслә әдл: Тедн үснд өөмнә. Тедн боодгин хаҗуд сууна.

¹³ Терүнә хойр халхнь – сәәхн цецгүд, Теднәс каңкнсн үнр һарна. Терүнә урлнь лилия цецг мет, Терүнәснь мирр дусна.

¹⁴ Терүнә һарнь – алтн шуург модн Тернь топаз чолуһар сииләтә. Терүнә геснь – занын яснас кегдҗ, Тернь сапфир чолуһар кеерүлгдҗ.

¹⁵ Терүнә көлнь – хаш чолун бахнсин бәәдлтә, Тернь алтн улта. Хәләхлә – Ливана бәәдлтә, Хошун моднла әдл сәәхн!

¹⁶ Терүнә урлнь – шикр мет әмтәхн, Тер бийәрн – йир авта, Седклим авлсн иньгм иим, Иим мини үр, О, Ерусалимин күүкд!