Соломона хамгин сән дун 3 - Хальмг келнд орчулсн Әрүн Бичлһс

¹ – Сө болһн эврәннь орн дотр Дурта күүһән хәәләв би. Хәәләв, олҗ чадсн угав.

² «Босад балһс эргнәв, уульнц, талвң болһар би дурта күүһән хәәнәв!» Уга! Олдҗ бәәхш.

³ Балһс эргдг маначнр харһв, Би теднәс сурв: «Мини дурта кү үзвтә?»

⁴ Теднәс салсна дару Тер ормдан дурта күүһән олв! «Бәргдвч! Экиннь герт чамла Би эс ортл, тәвшгов. Бәргдвч! Экиннь унтдг хорад чамла Би эс ортл тәвшгов».

⁵ Ерусалимин күүкд, тадниг Зерлг буһ өңгтә адусдар, Зүстә сәәхн адусар андһар өгтн гиҗ йир эрҗ сурҗанав: Дуриг бичә серүлтн, Дурн эврән эс сертл Дуудад бичә бәәтн! [Ерусалимин күүкд:]

Һурвдгч дун

⁶ – Көдә һазрас аашх Кемб тер? Нигт утан мет миррин, ладана, Холын орн-нутгин Зүсн-зүүл каңкнсн өвснә үнр Һарһҗ йовхнь кемб?

⁷ Хан Соломон болхла дамҗур деер сууна, Эргндкинь 60 дәәч хәләнә. Эдн Израилин күчтә дәәчнр болна.

⁸ Тедн цугтан селмтә, Тедн дәәлдлһнә медрлтә; Сөөһин әәмшг дархин төлә Таша деерән тедн селмтә.

⁹ Ливана хошун модар Соломон хаана дамҗурнь кегдҗ:

¹⁰ Дамҗурин дөрвн тулгинь цаһан мөңгәр, Түшдг нурһинь – алтар, Дернь – улан торһар уйгдҗ, Дотркинь кевтнь Ерусалимин күүкд дуртаһар кеерүлҗ.

¹¹ Сиона күүкд, наартн! Соломон хан титм өмссинь хәләтн! Терүг экнь хүрмин өдрлә, Терүнә байрин өдрлә кеерүлҗ!