Соломона хамгин сән дун 2 - Хальмг келнд орчулсн Әрүн Бичлһс

¹ – Би Шарона һазрин цецгв, Би тиньгр һазрин лилия. [Көвүн:]

² – Хатханчг дунд лилия цецг мет – хәәртә иньгм күүкд дунд. [Күүкн:]

³ – Ода седклим авлсн көвүм Ө-шуһу модд дунд – Ор һанцхн альмна моднла әдл, Олн көвүд дунд тиим; Терүнә сүүдрт суухдан дуртав, Терүнә темсн әмтәхн амтта. [Күүкн:]

⁴ – Намаг тер бийләһән авв, Намаг тер чаһрар тоодг герт орулв, Дурна туган деерм өргв.

⁵ Намаг уста үзмәр тоотн, Нанд альм өгәд сергәтн: Намаг дурн авлҗана!

⁶ Терүнә зүн һарнь – мини толһа дор бәәтхә. Терүнә барун һарнь – минь ода намаг тевртхә!

⁷ Ерусалимин күүкд, тадниг Йир эрҗ сурҗанав, Зерлг буһ өңгтә адусар, Зүстә сәәхн адусар андһар өгтн: Дуриг бичә серүлтн. Дурн эврән эс сертл Дуудад бичә бәәтн! [Күүкн:]

Хойрдгч дун

⁸ – Эннь седклим авлсн иньгм! Энүг би соңсчанав: өөрхнд йовна, Давшад уулмудар һәрәдҗ йовна, Довуд деерәһәр довтлҗ йовна.

⁹ Седклим авлсн иньгм – зерлг буһ мет, Гөрәснә бәәдлтә хурһн мет. Тер ода мана эрс һатц зогсҗана, Терзәр маниг хәләҗәнә, Терзин хааһул һатц хәләҗәнә.

¹⁰ Седклим авлсн иньгм нанд келв: «Бос, эңкр күүкм, Берк сәәхләм, һарад ир!

¹¹ Үзҗәнч? Үвл ода давв, Үүлнәс хур орҗахш, давв.

¹² Делкәд цецгүд урһҗана, Дуулх цаг ирвә, Делкәд көглҗрһнә дун соңсгдҗана.

¹³ Цаачнь инҗр темсн болҗана, Цецгәлҗәх уста үзмин ацин үнр каңкнҗана. Бос, эңкр күүкм, Берк сәәхләм, һарад ир!

¹⁴ Уулын хад дотр, Уулын белчрәр бултсн көглҗрһм, Чамаг үзх зөв нанд өгич! Чини ду соңсх арһ нанд өгич! Чини дун җөөлн, Чини бәәдл авта».

¹⁵ Аратын кичгүд бәртн, Бичкн кичгүд бәртн! Тедн үзмин тәрә үрәнә, Болв мана үзмин тәрән цецгәлҗәнә!

¹⁶ Седклим авлсн иньг – мини, би – терүнәв. Лилия цецгүд дунд тер бәәнә.

¹⁷ Өдр экләд уга бәәтл, Өр цәәһәд уга бәәтл, Уулмуд дотраһар, довуд дотраһар Уйн буһ мет, Гөрәснә бәәдлтә хурһн мет Гү хәрү, седклим авлсн иньгм!