Соломона хамгин сән дун 1 - Хальмг келнд орчулсн Әрүн Бичлһс

¹ Соломона хамгин сән дун. [Күүкн:] – Үмс намаг, үмс! Чини тааллһн чаһрас әмтәхн.

Негдгч дун

² Чини каңкнсн үнр әмтәхн, Чини нерн каңкнснла әдл, Тегәд чамд күүкд дурта.

³ Намаг авлад ардасн дууд – хамдан гүүхмн! Хан намаг эврәннь бәәрнд авч ирв. Чини төлә бидн нәәрләд байрлхмн, Чини хәәрлтиг чаһрас үлүһәр туурулхмн – Чамд күүкд хара биш йир дурта. [Күүкн:]

⁴ – Ерусалимин күүкд! Би харвр өңгтәв – болв йир сәәхмб, Кедар улсин сег мет, Соломон хаана шатр мет.

⁵ Намаг харвр гиҗ бичә хәләтн: Нарн намаг шатав. Нанд ахнр уурлв, Тедн намаг уста үзмин тәрә хәләтхә гилә, Болв би эврәннь уста үзмән хәләсн угав! [Күүкн:]

⁶ – Дурта иньгм, келич, Альд малан көөҗ хәрүлдвч? Альд үдлә теднләһән амрдвч? Эс гихлә би аюдан эндүрәд, Чини нәәҗ малчнрин сүрг тал одвзав! [Көвүн:]

⁷ – Хамгин сәәхн күүкн, Йовх хаалһан эс медхлә, Хөөдин мөрәр йов, Хәрнь ямана ишксән дахул, Хөөчнрин хошт күрхич! [Көвүн:]

⁸ – Эңкр күүкн чамаһан, египетин хаана тергнд зүүлһгдсн гүн мөрнлә дүңцүлнәв!

⁹ Чини халх кеерүләд – сиик өлгхнь, Чини күзү кеерүләд – келкәтә сувс өлгхнь!

¹⁰ Чамд алтн сиик кеҗ өгнәвидн, Терүг цаһан мөңгәр кеерүлнәвидн. [Күүкн:]

¹¹ – Кемр хан нәәрлхлә, Каңкнна мини нард.

¹² Мини седкл авлсн күн нандан – Сөөни дуусн чееҗ деерм Санамр амрад кевтдг, Сән үнртә мирртә, түңгрцг мет.

¹³ Мини седкл авлсн күн нандан – Минь Эн-Геди гидг һазрин уста үзмин тәрән дунд цецгәлдг хна мет. [Көвүн:]

¹⁴ – Чи ямаран сәәхнч, эңкр күүкн! Чини нүдн йир таалта. [Күүкн:]

¹⁵ – Чи ямаран сәәхнч, иньг минь, Чи нанд таасгдҗанач! Мадна орндг – ноһан өвсн,

¹⁶ Мадна деевр – хошун модн, Мадна ора – саңгин идәнә модн.