Рут 3 - Хальмг келнд орчулсн Әрүн Бичлһс

Боаз Рутд дөң болнав гиҗ үг өгнә

¹ Нег дәкҗ Ноеми Рутд иигҗ келнә: – Күүкн минь! Күүнд одад, амр җирһл олсн болхла, чамд сән болх билә.

² Хәлә, Боаз бәәнм. Чи терүнә зарцнрла көдлләч. Терчн мана садн. Эн асхн тер тогт ичмә киискх.

³ Соңс намаг: бийән уһаһад, каңкнсн тос түркәд, сән хувцан өмсәд, тогт од. Зуг Боаз асхни хотан ууһад дуустл, нүднднь бичә үзгд.

⁴ Дәкәд унтхар йовхлань, альд амрад кевтсинь хәлә. Тер кевтсн һазртнь одад, көл бийәснь көдргинь секәд кевт. Ю кехинь тер эврән келх.

⁵ – Тана келсәр цугинь кенәв, – гиҗ Рут келнә.

⁶ Тогт одад, хадм экиннь келсәр тер цугинь кенә.

⁷ Боаз хотан ууһад, цадад, овалһта өвснә өөр ирәд унтҗ одв. Рут тагчгар өөрдәд, көл бийәснь көдргинь секәд кевтв.

⁸ Сөөни өрәллә Боаз чочад серҗ одна. Өндәһәд хәләнә. Көл бийднь күүкд күн кевтсиг үзәд икәр алң болна!

⁹ – Юу-у! Кембчи? – гиҗ тер сурна. – Тана зерг, энтн бив, Рут. Та намаг җиврәрн мет халхлх зөвтәт, яһад гихлә, Та намаг асрх даалһврта саднт, – гиҗ Рут хәрү өгнә.

¹⁰ – Деед Эзн чамд, күүкн, әдс өгтхә! Угатя, байн улс заагас баахн залус эс хәәсндчн сән юмн. Эн йовдлчн урдк йовдлмудас деер!

¹¹ Күүкн, бичә ә! Чамаг буйнта гергн гиҗ балһсна әмтн цуһар меднә. Би чини сурсар цугинь кенәв.

¹² Би тана өөрхн саднас негнь болдгнь үнн, зуг нанас өөрхн садн танад бәәнә.

¹³ Эндр энд хон. Өрүндән тер садн чамд нөкд болнав гиҗ үгән өгхлә, сән болх. Кемр тер тиим үг эс өгхлә, Деед Эзнә өмн андһар тәвҗәнәв, би авнав. Өрүн күртл унт, – гиҗ тер келв.

¹⁴ Рут Боазын көл бийднь өрүн күртл унтад, өр цәәхлә босв. – Күүкд күн тогт ирсинь күн бичә медтхә, – гиҗ Боаз санв.

¹⁵ – Эврәннь көдргән тәәләд бәрҗә, – гиҗ Боаз келв. Көдрг деернь Боаз зурһа дәкҗ кемҗәләд, ичмә кеҗ өгв. Терүгән Рутин ээмднь үүрүлчкәд, бийнь балһс орад йовҗ одв.

¹⁶ Рут болхла хадм экүрн ирнә. – Нә, юн болв, күүкн минь? – гиҗ тернь сурна. Бернь Боазиг яһсинь, ю кесинь – цугинь келҗ өгнә.

¹⁷ – Иим дала ичмә өгәд, хадм экүрн хоосн һартаһан бичә йов гиҗ Боаз келлә, – гиһәд Рут немв.

¹⁸ – Күүкн минь, керг яһҗ төгсхинь медтлән күләҗә. Яһад гихлә, терчн кергән эндр эс күцәтлән зогсшго, – гиҗ Ноеми хәрү өгнә.