Рут 2 - Хальмг келнд орчулсн Әрүн Бичлһс

Рут Боазла харһна

¹ Бетлехемд Боаз гидг күндтә байн күн бәәдг бәәҗ. Тер Ноемин залун Елимелехин садн бәәҗ.

² Нег дәкҗ Рут Ноемид келнә: – Тәрәнд йовад хадачнрин ард үлдсн тәрәнә толһас цуглулх зөв нанд өгтн. Седклнь нанд туссн күүнә һазрт однав. – Сән, күүкн минь, йов, – гиҗ Ноеми бердән хәрү өгнә.

³ Рут нег тәрәнә һазрт ирәд, хадачнрин ард йовад, теднә хөөн үлдсн тәрәнә толһас цуглулҗ. Медлго, Рут Елимелехин уңг-тохмин Боаз гидг күүнә һазрт ирдг болна.

⁴ Боаз Бетлехемәс ирәд, хадачнртаһан мендләд: – Деед Эзн таднла бәәх болтха! – гиҗ келв. – Деед Эзн Танд әдс өгтхә! – гиҗ тедн хәрү өгцхәв.

⁵ Дәкәд Боаз хадачнрин һардачас: – Эн кенәхнә баахн күүкд күмб? – гиҗ сурв.

⁶ – Энтн Моав һазрас Ноемиг дахҗ ирсн Моавин күүкд күн.

⁷ Энтн хадачнриг дахад, арднь үлдсн тәрәнә толһас цуглулх зөв сурла. Өрүнәс авн ода күртл көдләд бәәһәтә, бичкн зуурт амрла, – гиҗ һардач хәрү өгв.

⁸ Боаз Рутиг дуудад: – Күүкн, соңс намаг, эндәс бичә йов, талдан һазрт тәрәнә толһас бичә цуглул. Мини зарц күүкд улсла энд үлд.

⁹ Хадачнр көдлҗәсн һазр хәләһәд, арднь йовҗ йовсн зарц күүкд улсиг дахад йов. Чамаг бичә көндәтхә гиһәд би залу улсдан закнав. Ундасхларн, ирәд мини зарцнрин савас ус у, – гиҗ келв.

¹⁰ Рут болхла Боазын өмн сөгдәд, манңаһан һазрт күргәд иигҗ келв: – Яһад Та нанд, хәр күүкд күүнд, оньган өгәд сә кеҗәхмбт?

¹¹ – Залуһан өңгрснә хөөн чигн хадм экдән сә кесичинь нанд әмтн келлә: чамаг эк-эцкән, төрскн һазран үлдәһәд, урднь таньдго келн-әмтн тал ирсичинь би меднәв.

¹² Чини кесн йовдларчн Деед Эзн ачичн хәрүлтхә! Деед Эзн Израилин Бурхн чамаг элвгәр ачлтха! Терүнә җивр дорнь Харслт олхар чи ирсн бәәнәч, – гиҗ Боаз Рутд келв.

¹³ – Тана зерг, цаһан седклдтн ханҗанав. Тана зарц күүкд улсла әдлцх зөв чигн нанд уга. Болв Та нанд сән үг келәд, зүрким тогтнулвт, – гиҗ Рут хәрү өгв.

¹⁴ Үдин хотын цаг ирхлә, Боаз Рутиг дуудад: – Наар! Мана өдмгәс авад, шүүсләд ид, – гив. Рут ирәд, көдләчнр дунд суув. Боаз терүнд невчкн хуурсн буудя өгв. Рут идәд цадв, түүнәснь бас үлдв.

¹⁵ Дәкәд Рут босад, хәрү көдлхәр һарв. Боаз болхла эврәннь зарцнртан: – Эн күүкд күн тәрәнә боодһас заагт чигн тәрәнә толһас цуглултха. Бичә энүг өөлүлтн.

¹⁶ Боодһас кехәр цуглулсн тәрәнә толһасин зәрминь һазрт үлдәҗәтн. Терүгинь цуглултха. Бичә энүг шоодтн! – гив.

¹⁷ Тиигәд Рут асхн күртл кеер көдлҗ. Дәкәд тер цуглулсн тәрәнә толһасан цокхлань, тернь ефә шаху ичмә болҗ һарв.

¹⁸ Энүгән авад, балһсан орна. Цуглулсн буудяһан хадм экдән үзүлнә, үдин хотасн үлдсн үлдлинь өрч дотрасн һарһҗ өгнә.

¹⁹ Хадм экнь: – Альд энүгән эндр цуглулвч? Кенә тәрәнд көдлвч? Чамаг оньглсн күн әдстә болтха! – гив. Рут альд көдлсән хадм экдән келҗ өгәд: – Би нег күүнә тәрәнд көдлләв, терүнә нернь Боаз, – гив.

²⁰ Тиигхләнь Ноеми бердән иигҗ келв: – Өңгрснднь, әмдднь чигн эврәннь хәәрлтән тусхасн Деед Эзнә әдстә күн! Боаз мана өөрхн садн болдм. Энчн садн дундас мадниг асрх даалһврта күн, – гив.

²¹ – Тер нанд нам иигҗ келв: «Тәрә хадлһн чилтл, мини зарцнрла бә», – гиҗ Моавин күүкд күн Рут немҗ келв.

²² – Терүнә зарцнрла хамдан бәәхләчн, сән болх. Яһад гихлә, талдан тәрәнд әмтн чамаг амрашго билә, – гиҗ Ноеми бердән келнә.

²³ Тиигәд Рут Боазын зарцнрла көдләд, ичмә, цаһан буудя хадлһна цаг чилтл тәрәнә толһас цуглулад, хадм эктәһән бәәҗ.