Рут 1 - Хальмг келнд орчулсн Әрүн Бичлһс

¹ Израилин улсиг зарһчнр һардҗасн цагт һазр деер харһнлһн болҗ. Тегәд нег күн гергтәһән, хойр көвүтәһән Йудай һазрин Бетлехем балһснас нүүһәд, Моав һазрт бәәхәр ирнә.

² Терүнә нернь Елимелех бәәҗ. Гергнәннь нерн Ноеми, хойр көвүнәннь нерд: Махлон болн Килион. Эдн Йудай һазрин Бетлехем балһсна Епрат уңг-тохмин улс бәәҗ. Моав гидг һазрт ирәд тедн бәәрлҗ.

³ Тиигәд бәәтл Ноемин залу Елимелех өңгрҗ одна. Ноеми хойрхн көвүтәһән үлднә.

^4-5 Хойр көвүнь Моав келн-улсин күүкдиг буулһҗ авна. Негнь – Орпа, наадкнь – Рут гидг нертә бәәҗ. Эдн Моавт арвн җил шаху бәәснә хөөн Махлон Килион хойр бас өңгрҗ одна. Тиигәд Ноеми залуһан болн хойр көвүһән геенә.

Ноеми герүрн хәрҗ ирнә

⁶ Невчкн цаг давад, Деед Эзн Эврәннь келн-улсан хәәрләд, сән урһц өгч гисн зәңг соңсад, Ноеми хойр бертәһән Моавас һарад төрскн һазр талан хәрхәр белднә.

⁷ Эдн бәәрнәсн һарад, Йудай һазр темцҗ йовв.

⁸ Йовҗ йовад зууран Ноеми хойр бердән иигҗ келнә: – Күүкд! Тадн һарсн экнр талан, герүрн хәртн. Нанд болн мини көвүдт цаһан седклән тусхасн төләд Деед Эзн тадниг өршәтхә!

⁹ Тус-тустан хәрд һарч амр җирһл олхитн Деед Эзн әдс өгтхә! Ноеми иигҗ келәд, берәчүдән үмсв, теднь оркрад уульцхав.

¹⁰ – Уга. Бидн Тана келн-улс тал Танла хамдан йовнавидн, – гиҗ тедн келцхәв.

¹¹ – Күүкд минь, герүрн хәрцхәтн. Яһад намаг даххар бәәнәт? Таднд залус болх көвүдиг би дәкҗ һарһҗ чадшгов, тиим эсий?

^12-13 Хәрцхәтн! Ода би шинәс хәрд һархд дегд көгшмб. Болв эндр асхн чигн эврәннь залутаһан бәәһәд, үр тееһәд, көвүд һарһх арһ бәәх болвчн, тедниг өсҗ бостл тадн күләхийт? Тадн тиим удан цагт күләҗ күүнд одлго бәәҗ чадхийт? Уга, күүкд минь! Би таднд сана зовҗанав, яһад гихлә, Бурхн намаг үлдәв, – гиҗ Ноеми хәрүднь келв.

¹⁴ Тедн шинәс оркрад уульцхав. Дәкәд Орпа Ноемиг үмсәд, мендләд герүрн йовҗ одв. Рут болхла, хадм экән тәвл уга бәәв.

¹⁵ – Хәлә, чини баз эврәннь келн-әмтнүр, эврәннь бурхд талан йовҗ одв. Чи бас терүг дахад хәрх зөвтәч, – гиҗ Ноеми келв.

¹⁶ Зуг Рут: – Таниг үлдәһәд хәрү йов гиҗ бичә намаг эрәд бәәтн. Тана йовсн һазрт би йовнав. Тана бәәсн һазрт би бәәнәв. Тана келн-әмтн мини келн-әмтн болх, Тана Бурхн мини Бурхн болх.

¹⁷ Тана өңгрсн һазрт Өңгрхләрн, би оршагдхв. Кемр үкләс талдан юмн мадниг салһхла, Бурхн намаг икәр цааҗлтха! – гив.

¹⁸ Рутиг хамдан йовхар батар шиидсинь үзәд, Ноеми терүг дәкҗ эрсн уга.

¹⁹ Тиигәд тедн хоюрн йова йовҗ Бетлехем балһснд күрәд ирнә. Хойр күүкд күн балһснд орҗ ирхлә, балһсна әмтн өврмҗ кеһәд: – Энтн Ноеми биший? – гицхәв.

²⁰ Зуг Ноеми: – Намаг Ноеми (тааста) гиҗ бичә нерәдтн, Мара (һашун) гиҗ келтн. Яһад гихлә, Хамгин Күчтә Бурхн мини җирһлиг һашута кев.

²¹ Эндәс һархларн, би байн һарч йовлав, зуг ода хоосн хәрҗ ирүв. Деед Эзн намаг зарһла харһулад, дала зовлң илгәсмн. Ода яһад тадн намаг «тааста» гиҗәхмбт?

²² Тиигәд Ноеми Рут гидг бертәһән Моавин һазрас хәрҗ ирсмн. Эдн Бетлехем балһснд ичмә хадлһн эклхлә ирсн бәәҗ.