Риминхн 3 - Хальмг келнд орчулсн Әрүн Бичлһс

¹ Тиигәд еврей болсн юуһарн деерв, керчлһнәс ямаран тус болҗахмб?

² Альк халхарн чигн ик туста. Хамгин түрүнд Бурхн евреймүдт эврәннь үг иткҗ өглә.

³ Кемр ода теднә зәрмнь Бурхнд итклтә эс болхла, терүнәс көлтә Бурхн бас тиим болхий?

⁴ Мел уга. Күн болһн худлч болв чигн Бурхн итклтә. Энүнә тускар Бурхна Бичгт иигҗ бичәтә: «Тана үг үнн, Та эврәннь зарһдан диилвр бәрхит».

⁵ Тадн му йовдл һарһҗаснас көлтә әмтн тодрхаһар Бурхна чикәр кеҗәсиг үзхий? Бидн ю келхвидн? Мадниг засглхларн Бурхн чикәр кеҗәнү? (Эн сурвр би әмтнә хәләцәр тәвҗәнәв.)

⁶ Э-э, кеҗәнә. Кемр Бурхн тиим чик эс болхла, яһҗ Тер делкән зарһ кех бәәсмб?

⁷ Кемр мини һарһҗах буру Бурхна туурмҗиг улм өскҗәхлә, яһад намаг килнцтә күн гиҗ засглхмб?

⁸ Тиигхлә яһад иигҗ эс келҗәхмб? Бурхна туурмҗиг улм өскхин төлә му йовдл һарһхмн. Зәрм улс нам тиигҗ келҗәнә гиһәд хов зөөв. Бурхн тиим улсиг засглхла чик болх.

⁹ Тиигхлә ю келхмб? Бидн, евреймүд, буру номта улсас деер болҗахмб? Мел уга! Евреймүд болн буру номта улс – цугтан әдләр килнцин үлмәд бәәхиг урднь үзүлләв.

¹⁰ Бурхна Бичгт иигҗ бичәтә: «Нег чигн чик седклтә күн уга, нег чигн!

¹¹ Нег чигн меддг күн уга. Бурхиг хәәҗәх нег чигн күн уга.

¹² Цугтан Бурхнас эргәд холдв, цугтан тус уга болв. Сән йовдл һарһҗах күн уга. Мел уга.

¹³ Теднә хоолнь секәтә үкәрин бәәдлтә. Келнь худл келнә, урл деернь хорта моһан хорн бәәнә.

¹⁴ Теднә келсн үгмүдәс зуг харал болн һундл соңсгдна.

¹⁵ Тедн оньдин алхдан белн.

¹⁶ Йовсн һазртан тедн мел эвдрл болн зовлң авч ирнә.

¹⁷ Төвкнүн бәәдл тедн медсмн уга.

¹⁸ Ухан-санаһарн Бурхиг күндлхш».

¹⁹ Заканд бичгдсн тоот закана неквр күцәх йоста күүнә төр болҗахиг бидн меднәвидн. Тер учр деерәс әмтнд бийән харсхин төлә үгән уга болад, делкә кевтән Бурхна өмн бурута болҗахиг үзх.

²⁰ Закана неквр күцәсәрн нег чигн күн Бурхна өмн чик седклтә болшго. Һарһсн килнциг закан күүнд медүлҗәнә.

Бурхн яһҗ күүг чик седклтәд тоолдв

²¹ Бурхн күүг яһҗ чик седклтә болхиг ода медүлҗәнә. Эн йовдл заканла холвата биш. Зуг энүнә тускар закан болн әәлдәчнр лавлҗана.

²² Исус Христост итксәр дамҗад, Бурхн әмтиг чик седклтә кенә. Христост итксн улсиг цугтаһинь Бурхн тиигнә. Яһад гихлә, йилһл уга.

²³ Әмтн цугтан килнц һарһв, цугтан Бурхна туурмҗас салцхав.

²⁴ Әмтиг сулдхх Исус Христосар дамҗулад тедн Бурхна хәәрлтәр чик седклтә болв. Бурхна хәәрлт теднд белг болҗана.

^25-26 Христост итксәр әмтнә килнциг тәвүлхин төлә Бурхн Терүг шиидв. Христосин үкләс иштә Бурхн әмтнә килнц тәвнә. Бийинь үннч болҗахан үзүлхин төлә Бурхн Христосиг шиидв. Урднь Бурхн тесвртә билә, әмтнә килнцд оньган өгчәсмн уга. Болв Бурхн үнән үзүлхин төлә ода әмтнә килнц тәвнә. Бийнь үннч болҗахан болн Христост иткдг күн болһниг чик седклтә кеҗәхән Бурхн үзүлнә.

²⁷ Юуһарн бидн ода бардмнхмб? Юуһар биш. Яһад бидн эс бардмнҗ чадхмб? Бурхн мадниг зака күцәлһәр биш һанцхн иткләр чик седклтә кеҗәнә.

²⁸ Бурхн күүг закана неквр күцәҗ биш, зуг иткләр дамҗад чик седклтә кедгиг бидн зөвшәрҗәнәвидн.

²⁹ Бурхн һанцхн евреймүдин Бурхмби? Тер бас буру номта улсин Бурхн биший? Э, буру номта улсин Бурхн бас болҗана.

³⁰ Бурхн һанцхн болдмн. Евреймүдиг тер итклин улар чик седклтәд тоолна, буру номта улсиг иткләр дамҗад тиигнә.

³¹ Болв бидн иткләрн закаг уга кеҗәнү? Уга, мел уга. Бидн закаг батлҗанавидн.