Псалмс 97 - Хальмг келнд орчулсн Әрүн Бичлһс

¹ Деед Эзнд шин ду дуултн, Юңгад гихлә, Тер өвәрц керг күцәв. Эврәннь күчәрн, әрүн чидләрн Тер хортан диилв.

² Эврәннь диилврин тускар Деед Эзн зәңглв, Эврәннь чик седклән Келн-улсин нүүрт үзүлв.

³ Деед Эзн Эврәннь сольлт уга дуран, Израилин улст өгсн иткмҗән тодлв. Мана Бурхна аврлтыг цуг делкә үзв.

⁴ Цуг делкә, Деед Эзиг буультн! Цугтан туурмҗин байрта дууһар дүрклтн!

⁵ Ятх татад, Деед Эзән туурултн, Ятх дахад, айста дууһар дуултн!

⁶ Деед Эзн Хаана өмн Бүрә-бүшкүрән татад байртаһар хәәкрцхәтн!

⁷ Теңгс дольгалад шуугтха, Терүг дүүргҗәх цуг тоот байрлтха! Цуг делкә кевтән байрлтха, Терүнд бәәсн тоот байрлтха!

^8-9 Цуг һолмуд шуугтха! Цуг уулмуд хамдан байртаһар Деед Эзнә өмн дуултха. Тер һазр дееркиг залхар аашна. Цуг делкәг Тер чикәр залх. Келн-улсин зарһиг чикәр кех.