Псалмс 94 - Хальмг келнд орчулсн Әрүн Бичлһс

¹ Цугтан иртн! Деед Эзнд байртаһар дууһан өргий! Мана аврлтын шивәг – Деед Эзиг – байртаһар дуудый!

² Деед Эзнд магтал өргәд ирий, Дууһар Терүг дуудый.

³ Юңгад гихлә, Деед Эзн – алдр Бурхн, Цуг бурхдас хамгин алдр Хан болҗана.

⁴ Һазрин гүн йорал – Терүнә, Уулмудын орас – бас Терүнә.

⁵ Теңгс – терүнә, Юңгад гихлә, теңгсиг Тер үүдәлә. Хагсу һазриг Терүнә һар үүдәлә.

⁶ Цугтан иртн! Мадна Үүдәһәч Деед Эзнә өмн мөргий, Толһаһан гекәд мөргий, Терүнә өмн сөгдий.

⁷ Юңгад гихлә, Тер мана Бурхн, Бидн Терүнә хәрүлҗәх хөд болҗанавидн. Бидн Терүнә килмҗән өгчәх идгин әмтн болҗанавидн. О, эн өдр, кемр Терүнә ду тадн соңссн болхла:

⁸ «Көдән Масса гидг һазрт буцснла әдл, Бүдүн күзүһән Мериба гидг һазрт бичә үзүлтн.

⁹ Мини керг-үүлмүдиг үзв чигн, Тана өвкнр Намаг тенд сөрдг билә.

¹⁰ Дөчн җилдән эн учрар Би тер әмтнд уурлад келләв: Тедн иткл уга, Мини келсн үгиг күцәхәр седхш.

¹¹ Тегәд чигн Би уурлад: Эдн мини амрлһна ормд төрүц оршго, – гиҗ андһар тәвләв».