Псалмс 81 - Хальмг келнд орчулсн Әрүн Бичлһс

Асафин псалм.

¹ Бурхн бурхд дунд орв, Тедн дунд зарһ Тер кев:

² – Кедү цагтан тадн буруһар зарһ кехмт? Кедү цагтан хар саната әмтнд тадн зуһудхмт?

³ Түрү, өнчн күүнә зарһиг чикәр кетн, Даҗргдҗах, һуульһнч күүнд чик зөв өгтн.

⁴ Түрү бәәх, дөң хәәҗәх күүг сулдхтн, Тедниг хар саната әмтнәс авртн.

⁵ Юм меддго, юм ухалдго, Харңһу бәәдләр әмтн бәәцхәнә. Делкән һазрин цуг улнь нурчана.

⁶ – Тадн бурхд болҗанат, Тадн цугтан Хамгин Күчтә Бурхна көвүд болҗанат.

⁷ Болв тадн күүнлә әдләр өңгрхт, Кен нег хаанла әдләр үүләсн буулһгдхит, – гиҗ Бурхн келв.

⁸ О, Бурхн, бостн! Һазр деер зарһ кетн. Юңгад гихлә цуг әмтн Тана болҗана.