Псалмс 7 - Хальмг келнд орчулсн Әрүн Бичлһс

¹ Деед Эзнд Кушан кергәр Давидин уульн дуулдг дун.

² О, Деед Эзн, мини Бурхн! Танд би нәәлҗәнәв; Намаг көөҗәх цуг әмтнәс авртн, Намаг сулдхтн;

³ Эс гихлә, тедн намаг Арслң мет дәврх, Намаг мөч-мөчәр шуучад-тасчад алх; Кен чигн күн намаг харсшго.

⁴ О, Деед Эзн, Бурхн минь! Кемр би бурута болхла,

⁵ Кемр нанла эвәр бәәсн күүнд Би хар санаһан күртәсн болхла, Кемр би учр угаһар дәәсән дәврсн болхла, Кемр би иим юмс һарһсн болхла,

⁶ Тиигхлә, намаг дәәсм мөрдәд күцг, Тер намаг һазрт ишкәд орулг, Намаг алад, тоормд хайтха.

⁷ О, Деед Эзн, ууртаһар бостн, Мини һалзурсн дәәснә өмнәс сөрлт кетн, Намаг дөңнхәр Бийдән урмд өгтн, Юңгад гихлә, Та чик йовдл некнәт.

⁸ Цуг улсиг Бийиннь хаҗуд цуглултн, Эврәннь дааҗах үүлин чинрәр Теднә зарһинь кетн.

⁹ О, Деед Эзн, Та цуг улсин зарһ кенәт. Мини зарһ кетн, Деед Эзм, цеврлтн намаг. Би чик седклтә, үннч күнлм.

¹⁰ Та чик седклтә Бурхнт, Күүнә күслинь болн седвәринь зөрнәт. Килнцтә әмтнә хар санаг уурултн, Чик седклтә әмтиг ачлтн.

¹¹ Бурхн мини халхц. Терүг соңссн әмтиг Тер аврна.

¹² Бурхн чик седклтә зарһч, Килнцтә әмтиг Тер кезә чигн бурушана.

¹³ Кемр тедн бийән эс гемшәхлә, Бурхн Эврәннь үлдән бүлүдх, Эврәннь саадган углх, терүгән төвлх,

¹⁴ Әмт алдг зер-зев белдх, Эврәннь һал асгч суман белдх.

¹⁵ Тиигәд килнцтә күн худлан тееһәд, Хар санаһар дүүрәд, бийдән худл һарһна,

¹⁶ Урх малтад, Белдсн нүкндән эврән унна:

¹⁷ Хар санань толһаднь буух, Ора деернь тусх.

¹⁸ Деед Эзиг чик седклтәднь туурулнав, Деед Эзнә нернд магтал дуулнав, Хамгин Күчтә Деед Эзнд.