Псалмс 34 - Хальмг келнд орчулсн Әрүн Бичлһс

Давидин псалм.

¹ О, Деед Эзн, мини өмнәс сөрлт кесн әмтнә өмнәс Та сөрлт кетн. О, Деед Эзн, нанла ноолдсн әмтнлә Та ноолдтн.

² О, Деед Эзн, халхцан, дәәнә хувцан авад намаг дөңнхәр бостн.

³ О, Деед Эзн, намаг даҗрҗах әмтнә өмнәс үлдәр болн җидәр хүрүлтн. О, Деед Эзн, намаг аврх болҗ седклим тогтнултн.

⁴ Мини әм авхар седҗәх әмтн ичтхә, Теднә нерн һутагдтха. Нанд хоран күргхәр бәәх әмтн бийснь зултха.

⁵ Тедн салькнд тоорм мет цокгдтха. Деед Эзнә элч тедниг көөтхә.

⁶ Теднә хаалһ харңһу, хальтрха болтха. Деед Эзнә элч тедниг мөрдх.

⁷ Мини дәәсн учр угаһар Эврәннь гөлмән нанас бултулв. Мини дәәсн учр угаһар әмим таслхар нүк малтв.

⁸ Нанас нуувчар тәвсн гөлмдән эврән торад, Теднд генткн үкл иртхә. Малтсн нүкндән эврән унад үктхә.

⁹ Тегәд Деед Эзнә кесн-күцәснд мини седкл байрлх. Намаг Тер сулдхснд мини седкл җирһх.

¹⁰ Мини седкл иигҗ байрлх: «О, Деед Эзн, кен Тана бәәдлтәв? Та күчн уга күүг чидлтә күүнәс харснат, Түрү-зүдү күүг даҗрдг әмтнәс харснат».

¹¹ Килнцтә әмтнә герчнр мини өмнәс босцхав. Тедн намаг эс кесн юмнд гемшәҗәнә.

¹² Тедн мини цаһан сананд Хар санаһан үзүлнә. Тиигхләнь би цөкрнәв.

¹³ Болв тедниг гемнхлә, Би хар өңгтә хувц өмсдг биләв, мацг бәрдг биләв, Дорагшан өкәҗ мөргдг биләв.

¹⁴ Би тедниг ах-дүүһән мет санҗ, зовҗ уульдг биләв. Би экән геесн мет зовад, Толһаһан һудылһад йовдг биләв.

¹⁵ Болв намаг зовлңла харһхла, Тедн байр кехәр мини хаҗуд цуглрцхана. Таньдго әмтн хаҗуһас Намаг зогслт уга зована.

¹⁶ Тедн хамгин му үгмүд келҗ, Шүдән хәврҗ, намар наад бәрцхәнә.

¹⁷ О, Деед Эзн, Та тиим юм удан хәләхвт? Мини әмиг теднә хар сананас авртн, Арслң мет дәврҗәх дәәснәсм намаг харстн.

¹⁸ Би хург болсн һазрт Танд иләр ханлтан өргнәв. Би Таниг олна нүүрт магтнав.

¹⁹ Мини өмнәс Учргоһар ноолдхар седҗәх әмтнд Диилвр бәрх зөв бичә өгтн. Нанд дурго болҗах әмтн Учргоһар чирмҗ хар сандгинь зогсатн.

²⁰ Тедн талдан улсла Эвтәһәр бәәхәр седҗәхш. Болв эвәр бәәҗәх әмтнә өмнәс Худл үгмүд келцхәнә.

²¹ – Э, э! Чини кесиг Бидн нүдәрн үзләвидн! – гиҗ намаг гемшәҗ келцхәнә.

²² Та, Бурхн, терүг Эврән үзләт. О, Деед Эзн, бичә тагчг бәәтн, Нанас бичә холдтн.

²³ Та босад намаг харстн. О, Нойн, Бурхн минь, Мини төлә ноолдтн.

²⁴ О, Деед Эзн, Бурхн минь, Намаг цеврлтн, Юңгад гихлә, Та Эврән чик седклтәт. Мини дәәсн намаг бичә тавлҗ байрлтха.

²⁵ – Э, энтн мана седсәр болв, – гиҗ бичә тедн сантха. – Бидн терүг мел уга кечквидн, – гиҗ бичә келтхә.

²⁶ Мини зовлң тавлҗах әмтн ичтхә, Зута бәәдлән медтхә. Намаг дөөглсн әмтн ичтхә, Зута бәәдлән медтхә.

²⁷ Намаг цеврлхәр седҗәх әмтн Байрта, бахмҗта болтха: – Эврәннь зарцдан цаһан сана сансн Деед Эзн тууртха! – гиҗ тедн мел келәд бәәтхә.

²⁸ Мини келәр Тана цаһан санана тускар келгдх, Танд нерәдәд өдрин дуусн Би магтал өргҗ дуулхв.