Псалмс 21 - Хальмг келнд орчулсн Әрүн Бичлһс

¹ Көгҗмин һардачд. Өрүн өрлә цагин айст орулх Давидин псалм.

² Бурхн минь! Бурхн минь! Та намаг яһад үлдәввт? Та нанас яһад хольҗвт? Та нанд дөңгән күргхәр седҗәхшийт, Нам мини зовад чаңһар хәәкрҗәхиг соңсчахшийт?

³ Бурхн минь! Би өдрт хәәкрнәв, Та нанд хәрүһинь өгхшит. Би сөөд хәәкрнәв, Та намаг тогтнулхшит.

⁴ Болв Та әрүн Хан болҗанат, Израиль Таниг магтҗана.

⁵ Танд мана өвкнр нәәлдг бәәҗ, Нәәлснднь Та тедниг сулдхдг бәәҗит.

⁶ Таниг дуудхла, Та тедниг аврдг бәәҗит. Танд нәәлхлә, Та теднә седклинь һундадго бәәҗит.

⁷ Би болхла, күн бишв, хорхав. Күн намаг басна, әмтн нанд дурго болна.

⁸ Намаг үзсн әмтн наад бәрцхәнә, Тедн җигшҗ урлан коочилһнә, Тедн җигшҗ толһаһан зәәлнә.

⁹ «Чи Деед Эзнд нәәлнәч, Чамаг Тер яһад эс сулдхна? Чамд Деед Эзн дурта гиҗ келнәч, Яһад Тер дөңгән эс күргнә?» – гиҗ тедн келцхәнә.

¹⁰ Болв намаг экин геснәс һарһҗ авснь Та биләт, Уург көкчәхдм Та намаг Танд нәәлдг дасхлат.

¹¹ Һархасн өмн би Тана хәләврт бәәҗв, Экиннь геснд бәәхдән би Тана бәәҗв.

¹² Бичә нанас хольҗтн, Яһад гихлә, зовлң өөрхн, Нанд дөңгән күргх күн уга.

¹³ Бухмудын сүрг мет Намаг олн хортн бүслҗәнә. Башана һазра һалзу бухмуд мет Тедн намаг бүслҗәнә.

¹⁴ Хот хәәҗ аман аңһасн арслң мет Тедн нанур күркрнә.

¹⁵ Мини чидлм усн мет урсҗ одв, Мини ясд булһрҗ одв, Мини зүркн халун хорһн мет хәәлҗ одв.

¹⁶ Мини хол тоорм мет хагсҗ одв, Мини келн таңнадан наалдҗ одв. Та намаг үклин өргнд күргвт.

¹⁷ Намаг һалзу әмтн зерлг нохас мет бүслҗәнә. Тедн арслң мет мини һар-көлим тасчад хайв.

¹⁸ Би эврәннь ясдан цугтаһинь тоолҗ чадхв; Әмтн намаг хәләнә, тавлҗ байрлна.

¹⁹ Мини хортн җирв хаяд, Хувцим хоорндан хувацхана.

²⁰ Зуг Та, Деед Эзн, намаг бичә үлдәтн! Бурхн, мини Күчн! Намаг аврхар адһтн.

²¹ Мини әмиг үлдәс харстн, Мини эңкр әмиг эн һалзу нохасас харстн,

²² Мини әмиг арслңгин амнас авртн, Мини зовҗах седклиг зерлг бухмудын өврәс харстн.

²³ Би эврәннь улстан Тана кесн көдлмшин тускар келнәв, Би Таниг олн улс хурад Бурхнд мөргдг һазрт магтнав:

²⁴ «Деед Эзиг күндлдг цуг улс, Магттн Терүг! Яковин цуг хөөт үйнр, Терүнә нериг туурултн! Израилин цуг әмтн, Терүг күндлҗ сөгдтн!

²⁵ Яһад гихлә, зовлңта күүг Тер басшго, Зовлңта күүнәс Тер зулшго, Зовлңта күүнәс Тер чирәһән бултулшго, Болв Терүг дуудхла, соңсхнь лавта».

²⁶ Олн улс дунд би Таниг магтнав. Таниг күндлдг әмтнә нүүрт Би күцәх болсн тәклән тәкнәв.

²⁷ Угатя күн цадтлан хот идх, Бурхиг хәәҗ йовснь Терүг магтх. Деед Эзн мөңк кишг заятха.

²⁸ Һазрин үзг болһнд әмтн Терүг санад, Деед Эзнүр хәрү ирцхәх. Терүнә өмн әмтнә цуг отг улс сөгдх.

²⁹ Деед Эзн цугтаннь Эзн, Цуг улсиг Тер зална.

³⁰ Һазр деерк әмтн цугтан Деед Эзнд мөргх, Һазр деерк байн, байн бишнь Терүнә өмн сөгдх. Һазр деерк улс цугтан Терүнә өмн сөгдх.

³¹ Ирх хөөт үйнр Терүнд церглцхәх, Тедн Деед Эзнә тускар Эврәннь хөөт үйнрт келцхәх.

³² Тедн ирәд, Төрәд уга хөөт үйнрт иигҗ келцхәх: «Деед Эзн Эврәннь улсан аврла».