Псалмс 149 - Хальмг келнд орчулсн Әрүн Бичлһс

¹ Деед Эзиг магттн! Деед Эзнд шин ду дуултн! Әрүн хургт Терүнд магтал өргтн!

² Израиль, эврәннь Үүдәчд байрл! Сиона улс, эврәннь Хаанд байрлтн!

³ Терүнә нериг биилн бәәҗ магттн! Көгҗмин зер-зев цокад, Терүнд дуулҗ өгтн!

⁴ Деед Эзн Бийиннь улст байрлна, Деед Эзн Бийиннь итклтә улст диилвр өгнә.

⁵ Бурхна улс диилвр бәрсндән байр-бахмҗ кетхә. Тедн сөөни дуусн байртаһар дуултха.

⁶ Теднә келнә магтал Бурхнд болтха, Теднә һарт үлд йир хурц болтха.

⁷ Терүгәрн әмтнәс өшәһән автха, Тохм-отга улст засглт илгәтхә.

⁸ Теднә хаадудыг бәрәнд бәртхә, Теднә нойдудт төмр чөдр тәвтхә.

⁹ Теднд шиидгдсн зарһ кетхә. Терүнә цуг әрүн улст эн күндллһн тусх. Деед Эзиг магттн!