Псалмс 148 - Хальмг келнд орчулсн Әрүн Бичлһс

¹ Деед Эзиг магттн! Деед Эзиг теңгрәс магттн! Деер бәәх тоот, Терүг магттн!

² Терүнә Бурхна элчнр, цугтан Терүг магттн! Теңгрин цергләчнр, Терүг магттн!

³ Нарн болн сар, Деед Эзиг магттн, Гилвкҗәх цуг одд, Терүг магттн!

⁴ Теңгр болн Теңгрәс өөдән бәәх усн, Терүг магттн!

⁵ Деед Эзнә нериг магттн, Терүнә зааврар цугнь үүдв.

⁶ Тедниг Тер эвдгдшго закаһарн Мөңкинд эврә ормднь тәвб.

⁷ Теңгсин күчтә адусд, Усна гүн йорал, Деед Эзиг һазр деерәс магттн!

⁸ Һал болн мөндр, Цасн болн будн, Терүнә үг күцәҗәх чаңһ салькн,

⁹ Уулмуд болн цуг довуд, Темс өгдг модд болн ө-шуһун модд,

¹⁰ Зерлг аңгуд болн цуг мал, Мөлкдг тоот болн җивртә шовуд,

¹¹ Һазр деерк хаадуд болн цуг келн-улс, Нойдуд болн цуг залачнр,

¹² Баахн көвүд болн күүкд, Көгшдүд болн баһчуд,

¹³ Деед Эзнә нериг магттн! Ор һанцхн Терүнә нерн өөдллә. Терүнә туурмҗ һазрас, Теңгрәс өөдән йовна.

¹⁴ Деед Эзн Бийиннь келн-улстан чидл өгв, Терүг Бийднь өөрхн Израилин улс магтҗана. Деед Эзиг магттн!