Псалмс 145 - Хальмг келнд орчулсн Әрүн Бичлһс

¹ Деед Эзиг магттн! Мини санан-седкл, Деед Эзиг магт!

² Деед Эзиг әмд бәәтлән магтнав. Бийиннь Бурхндан әмд бәәтлән дууһан өргнәв.

³ Нойнд чигн, күүнә үрнд чигн бичә нәәлтн, Тедн аврч чадшго.

⁴ Кинь һархла, күн һазртан хәрү орна. Тер дарунь терүнә седвәрнь чилнә.

⁵ Яковин Бурхар дөң авснь әдслгднә. Деед Эзнд, эврәннь Бурхнд иткснь әдслгднә.

⁶ Теңгр, һазр, теңгс, Тедн дотр бәәх юмиг Деед Эзн Бурхн үүдәлә. Тер өгсн үгән оньдинд күцәнә.

⁷ Даҗргдсн әмтиг Тер харсна, Өлссн әмтнд өдмг өгнә. Деед Эзн бәрәнәс кү сулдхна.

⁸ Деед Эзн сохр улст хара орулна, Деед Эзн дорацулгдсн күүг босхна, Деед Эзн цаһан саната күүнд дурта.

⁹ Деед Эзн талын күүг харна, Деед Эзн өнчн, белвсн әмтиг дөңнә, Деед Эзн килнцтә күүнә хаалһинь хаана.

¹⁰ Деед Эзн мөңкинд нойлх, О, Сиона улс, тана Бурхн үйәс үйд залҗана. Деед Эзиг магттн!