Псалмс 144 - Хальмг келнд орчулсн Әрүн Бичлһс

Давидин магталын дун.

¹ О, Бурхн минь, мини Хан! Таниг би магтнав, Тана нериг мөңкинд туурулнав.

² Би өдр болһн Таниг туурулнав, Би мөңкинд Тана нериг буульнав.

³ Деед Эзн алдр, икәр магттха. Терүнә алдрт күн күршго.

⁴ Үйәс үйд күрч Тана кесн көдлмш буульцхах. Тана күчнә тускар әмтн зәңглцхәх.

⁵ Тана алдр туурмҗин тускар әмтн келцхәх, Тана өвәрц кергин тускар би ухалнав.

⁶ Тедн Тана өврмҗтә күчнә тускар келнә, Би Тана Алдр көдлмшин тускар герчлҗ өгнәв.

⁷ Тедн Тана элвг цаһан санаг темдглнә, Тедн Тана чик йовдлын тускар дуулна.

⁸ Деед Эзн өр-өвч, цаһан саната, Деед Эзн тесвртә, итклтә дурар байн.

⁹ Деед Эзн цугтаһинь әдслнә, Деед Эзн цуг үүдәсн тоотдан өр-өвч.

¹⁰ О, Деед Эзн, үүдәсн тооттн Таниг туурулх, Танд Тана әрүн седклтә әмтн ханлтан өргх.

¹¹ Тедн Тана хаана йосна туурмҗин тускар келцхәх. Тедн Тана күчтә йовдлын тускар зәңглцхәх.

¹² Тана алдр кергин тускар Тедн цуг әмтнд медүләд келцхәх, Тана хаана йосна туурсн күчнә тускар келцхәх.

¹³ О, Деед Эзн, Тана хаана йосн мөңк йосн, Тана һардвр үйәс үй һатлҗ бәәх. Та Эврәннь келсн үгдән итклтәт. Та үүдәсн тоотдан дуртат.

¹⁴ Деед Эзн үрүдсн күүг дөңннә, Деед Эзн дорацулгдсн күүг босхна.

¹⁵ Тан тал әмд юмн цугтан хәләцхәнә, Та теднд кергтә цагтнь хотынь өгнәт.

¹⁶ О, Деед Эзн, Та элвг һарасн Әмд юмсиг цугтаһинь цадхнат.

¹⁷ Деед Эзн Эврәннь кесн кергтән зөвтә. Эврәннь үүдәсн тоотдан дурта.

¹⁸ Деед Эзн Бийән дуудсн болһнд оньган өгнә, Деед Эзн Бийән үнәр дуудсн болһнд оньган өгнә.

¹⁹ Терүг күндлдг күүнә сурсинь Тер күцәх, Теднә эрлһиг соңсна, Тедниг Деед Эзн аврна.

²⁰ Деед Эзн Бийдән дурта әмтиг харна, Цуг килнцтә әмтиг уга кех.

²¹ Деед Эзнд би магтал өргҗәнәв. Деед Эзнә әрүн нериг Үүдәгдсн әмд юмн болһн мөңкинд магттха.