Псалмс 143 - Хальмг келнд орчулсн Әрүн Бичлһс

Давидин псалм.

¹ Һарим дәәлддг дасхсн, Хурһдым ноолддг дасхсн Мини хад Деед Эзнд магтал!

² Тер нанд дурта Бурхн, Мини шивә, мини хорһдх һазр, Мини сулдхач, мини халхц. Би Терүнд нәәлҗәнәв. Тер мини медәнд келн-улс орулна.

³ О, Деед Эзн, Танд үзгддгәрн Күмн әмтн юн болҗахмб? Тертн зуг күмн әмтн болв чигн, Та теднд килмҗән күртәҗәнәт.

⁴ Күүнә җирһл әмсхллә әдл, Тер сүүдр мет уга болҗ одна.

⁵ О, Деед Эзн, теңгриг шуулад бууҗ иртн, Та утан һардгар уулмуд көндәтн.

⁶ Та һал цәклүләд, Эврәннь хортан тараһад хайтн. Та Эврәннь суман илгәһәд, Тедниг ка цоктн.

⁷ О, Деед Эзн, деерәс Эврәннь һаран өргтн, Та намаг усна аюлас сулдхтн, Та намаг дәврҗәх талын отгас сулдхтн.

⁸ Теднә үг болһн үүмәтә, Теднә барун һарнь худл юмнд герч болҗ өрггднә.

⁹ О, Бурхн, Танд би шин ду дуулнав, Танд би арвн чивһстә ятхд ду орулад дуулнав.

¹⁰ Та хаадудт диилвр белглнәт. Та Эврәннь зарц Давидиг сулдхҗанат.

¹¹ Та намаг хортна үлдәс харстн, Та намаг талын улсин чидләс харстн. Теднә үг болһн үүмән, Теднә барун һарнь худл юмнд герч болҗ өрггднә.

¹² Мадна көвүд, цецгәрҗәх тәрән мет, делгрҗ йовтха. Мадна күүкд бәәшң кеерүлхин төлә Нәрнәр керчгдсн колоннс мет болтха.

¹³ Мадна амбармуд зүсн-зүүл урһцар дүүртхә, Мадна хөд идгтән миңһәд, түм күрч өстхә.

¹⁴ Мадна бод мал тооһарн олн болҗ бордгдтха, Мадна һаза ноолдан чигн, көөгдлһн чигн, зовлң чигн уга болтха!

¹⁵ Бурхна тиигҗ әдслсн улс кишгтә! Бурхнта, Деед Эзнтә бәәх улс кишгтә!