Псалмс 142 - Хальмг келнд орчулсн Әрүн Бичлһс

Давидин псалм.

¹ О, Деед Эзн, мини зальврлһ соңстн! Юңгад гихлә, Та итклтәт, Та мини сурврт оньган өгтн! Юңгад гихлә, Та чик седклтәт, дөңгән күргтн.

² О, Деед Эзн, Эврәннь зарцан зарһд бичә орултн. Юңгад гихлә, Тана өмн Әмд улсас нег чигн күн цеврдҗ чадшго.

³ Хортн намаг көөлдҗ йовна, Тер намаг хамх цокв, Тер намаг харңһу үкәрт бәәлһхәр седв.

⁴ Би йир гейүрчәнәв, Арһ уга болснасм зүркм менрҗәнә.

⁵ Би кезәңк өдрмүд санҗанав, Тана кергин тускар ухалҗанав, Тана көдлмшин тускар ухалҗанав.

⁶ Танд зальврҗ хойр һарм өрггднә. Хагссн һазр хур күләҗәх мет, Тиигҗ би Таниг седкләрн энлҗ хәәҗәнәв.

⁷ О, Деед Эзн, минь ода хәрү өгтн! Би нәәлврән кевтнь геевүв. Та нанас бичә булттн, Эс гихлә, би үкәртән орҗах күүнә бәәдлтә болув.

⁸ О, Деед Эзн, Та өрүн болһн Эврәннь итклтә дуран нанд медүлҗәтн, Би Танд нәәлҗәнәв. Та нанд йовх хаалһим зааҗ өгтн, Би Танд зальврҗанав.

⁹ О, Деед Эзн, намаг хортнасм сулдхтн, Танар би түшгән кеһәд ирҗәнәв.

¹⁰ Та нанд Эврәннь таалан күцәдг дасхтн, Юңгад гихлә, Та мини Бурхн болҗанат. Та Эврәннь аһу ик цаһан санаһарн Намаг әәмшг уга хаалһд һарһтн.

¹¹ О, Деед Эзн, өгсн үгән бәрәд, Мини җирһл авртн. О, Деед Эзн, Эврәннь үннә төлә Намаг зовлңгас татҗ автн.

¹² О, Деед Эзн, Эврәннь итклтә дурарн һардад, Мини хортыг уга кетн, Намаг даҗрҗах әмтиг алтн, Юңгад гихлә, би Тана зарцв.