Псалмс 140 - Хальмг келнд орчулсн Әрүн Бичлһс

Давидин псалм.

¹ О, Деед Эзн, Таниг дуудҗанав. О, Деед Эзн, Та нан тал адһтн. Таниг дуудхла, Та мини ду соңстн.

² Мини зальврлһн Танд Күҗин каңкнсн үнр болтха. Зальврхларн деегшән өргсн мини һариг Асхни тәвцд бәртн.

³ О, Деед Эзн, мини келнд харул бәртн. О, Деед Эзн, мини амнд тииз тәвтн.

⁴ Та мини зүркиг хар сананд бичә авлултн, Та мини зүркиг килнцтә юмнд бичә өөрдүлтн. Би килнцтә әмтнә байрт орлцшго болсув.

⁵ Чик седклтә күн итклтә болсндан Намаг цокҗ чигн чадҗана. Цаһан саната болсндан Керлдҗ чигн чадҗана. Тернь нанд толһа деерк Тогтнулдг каңкнсн тосн болх. Терүг би керго гисн угав. Тедн нанд хар санаһан күртәв чигн, Би цаарандан зальврнав.

⁶ Кемр килнцтә улсин һардачнр Зарһин йоснд бәрүлгдхлә, Тегәд мини келсиг тедн тодлх. Терм чик билә гиҗ зөвшәрх.

⁷ Тәрәчнр һазр яһҗ хаһлад керчнә, Тедү мет теднә яснь үкәрин амнд Тарагдад хайгдх.

⁸ О, Деед Эзн, мини Бурхн, Хәләцм Танд тусчана. Танар би түшгән кеҗәнәв. Та намаг харстн, бичә үлдәтн.

⁹ Та намаг бәрхәр тәвсн хавхин бәрәнәс харстн, Та йосн биш йовдл һарһҗах әмтнә мекәс харстн.

¹⁰ Килнцтә улс эврән терүндән бәргдтхә, Би болхла, әәмшг угаһар йовсув.