Псалмс 139 - Хальмг келнд орчулсн Әрүн Бичлһс

¹ Көгҗмин һардачд. Давидин псалм.

² О, Деед Эзн, хар саната әмтнәс намаг сулдхтн, О, Деед Эзн, догшн әмтнәс намаг харстн.

³ Тедн хар санана тускар ухална, Тедн оньдинд дә босхна.

⁴ Тедн моһа мет келән бүлүднә, Теднә үгнь хорта моһан хорнла әдл.

⁵ О, Деед Эзн, килнцтә әмтнәс намаг хартн, Мини үкл хәәҗәх догшн әмтнәс намаг хартн.

⁶ Деегүр әмтн намаг бәрхәр урхан бултулҗана, Тедн гөлмән татад, Мини хаалһд хавхан тәвв.

⁷ – Та мини Бурхнт, – гиҗ Танд би келхүв. Деед Эзн, дөң сурҗах Мини зальврлһ соңстн!

⁸ О, Алдр Деед Эзн, Мини толһаг ноолдана өдр бүркдг Чидлтә харсач болҗанат Та.

⁹ О, Деед Эзн, килнцтә күүнд седсинь бичә өгтн. Та терүнә хар сананд күцәмҗ бичә өгтн, Эс гихлә тедн караглх.

¹⁰ Намаг бүслҗәх хортна Мини туск хар саната зурань Хәрү эргәд, бийсинь алтха.

¹¹ Тедн деер шачах нүүрсн унтха! Тедн дәкҗ босч чаддгоһар һазрин йоралд хайгдтха.

¹² Худлч күн бичә күцәмҗ бәртхә, Терүг зогсдго аюл көөҗ йовг.

¹³ Даҗргдсн улсин зөвинь болн Түрү бәәх улсин чик йовдлынь Деед Эзн харсчахиг би меднәв.

¹⁴ Бурхнд иткдг улс Тана нер туурулх, Чик седклтә улс Тана хаҗуд бәәх.