Псалмс 123 - Хальмг келнд орчулсн Әрүн Бичлһс

Давидин өөдлһнә дун.

¹ Деед Эзн мадниг эс дөңнсн болхла, Юн болх билә? Израилин улс, хәрү өгтн!

² – Мадниг хортн дәврсн цагт Деед Эзн эс дөңнсн болхла,

³ Тедн догшн уурарн мадниг әмдәр зальгх билә.

⁴ Хортн мадниг урсхул мет авх билә, Хортн мадниг деврсн усн мет дарх билә,

⁵ Түргн урсхул мет чивүлх билә – гиҗ тедн келнә.

⁶ Мадниг хортна шүднд эс бәрүлсн Деед Эзиг туурулцхай.

⁷ Бидн аңһучин хавхас Әмд һарсн шовуд мет болҗанавидн. Хавх хамхрв, бидн сулдвидн!

⁸ Теңгр һазр хойр үүдәсн Деед Эзн маднд Эврән дөңгән күргҗәнә.