Biblia Todo Logo
Bìoball air-loidhne

- Sanasan -

Псалмс 108 - Хальмг келнд орчулсн Әрүн Бичлһс


Давидин псалм.

1 О, мини буульҗах Бурхн, Бичә тагчг бәәтн.

2 Намаг килнцтә болн хорта әмтн бурушаһад, Му нер өгнә, Мини тускар тедн худл келнә.

3 Намаг бүсләд, дурго болсн үгмүд соңсхна, Намаг учр угаһар дәврцхәнә.

4 Би теднә төлә зальврсн бийнь, Мини дурна хәрүд тедн дәврцхәнә.

5 Мини цаһа санснд хар санцхана. Мини дурна хәрүд дурго болцхана.

6 О, Бурхн, мини хортна зарһиг Буру бәәдлтә зарһч кетхә гиҗ тәвтн. Тегәд терүг эврә хортн бурушатха.

7 Хортнамм зарһ кехлә, бурута болҗ тер һартха, Нам терүнә зальврлһн килнц болҗ тоолгдтха.

8 Мини хортна насн ахр болтха, Терүнә ормд талдан күн ортха.

9 Терүнә үрд өнчртхә, Терүнә гергн белвсртхә!

10 Терүнә үрд тенәд, һууль һуутха, Тедниг нурсн герәснь көөтхә.

11 Өгйәлч күн бәәсинь кевтнь булаҗ автха, Талын әмтн терүнә күч-көлснә зөөринь таратха.

12 Нег чигн күн терүнд сән юм бичә кетхә, Нег чигн күн терүнә өнчрсн үрдтнь бичә сана зовтха.

13 Мини хортна хөөт үйнр цугтан алгдтха, Хөөт үйнриннь нерн шулуһар мартгдтха.

14 Деед Эзн Мини хортна эцкнрин килнц бичә марттха, Деед Эзн Мини хортна экин килнц бичә тәвҗ өгтхә,

15 Деед Эзн Теднә килнцин тускар кезә чигн сантха, Деед Эзн Теднә туск санлыг һазр деерәс уга кетхә.

16 Талдан әмтнд хортн дөң күргсн уга. Нам түрү бәәх, дөң хәәҗәх, зовҗ йовх әмтиг Тер мөрдәд алдг билә.

17 Тер кү харахдан дурта, Эврән харалла харһтха. Тер йөрәл тәвхдән дурго, Терүг нег чигн күн бичә йөрәтхә.

18 Хувцан таслвр уга өмсдглә әдләр Тер харал тәвнә. Терүнә харал, ууҗах уснла әдл, гиигнәр бийднь орг, Каңкнсн тоснла әдл терүнә яснд ивтрг.

19 Мини хортнд харал, өмсчәх лавшг мет, Оньдинд бүслҗәх бүснь мет болтха.

20 Тиим өшән мини хортнд, нанд хар санҗах әмтнд Деед Эзнәс иртхә.

21 Болв Та, Деед Эзн Бурхн, өгсн үгиннь төлә нанд сә кетн, Тана итклтә дурн сән болснд Та намаг авртн!

22 Би түрҗәнәв, дөң кергтә. Мини зүркн икәр зовҗана.

23 Би асхни сүүдр мет урсчанав. Би салькнд цокгдҗах царцахала әдл болҗанав.

24 Хот тату болсар мини өвдгт чинән уга, Өөкн тату болсар мини цогц-махмуд эццн.

25 Намаг бурушадг улст би наадн болҗанав, Намаг үзхләрн, тедн дурго болад, толһаһан заальна.

26 О, Деед Эзн, мини Бурхн, Дөңгән нанд күргтн! О, Деед Эзн, мини Бурхн, Итклтә дурнаннь төлә намаг авртн!

27 О, Деед Эзн, Энтн Тана һарин керг болҗахиг медтхә! О, Деед Эзн, Та намаг аврсн Бурхн болҗахиг медтхә!

28 Мини хортн намаг харахла, Та нанд әдс өгтн. Мини хортн намаг дәврхлә, Та тедниг ичәтн. Болв би, Тана зарц, байрлсув.

29 Тедн ичр уга бәәдлдән бәргдтхә. Хувц өмсснлә әдләр Тедн ичрәрн бүркгдтхә.

30 Би седклән тәвҗ Деед Эзиг туурулнав. Би цуг әмтнә өмн Терүг туурулнав.

31 Юңгад гихлә, түрү бәәх күүг Хаҗһрар бурушаҗах улсас харсхин төлә Деед Эзн терүнә барун бийднь бәәнә.

© Институт перевода Библии, 2002-2023

Institute for Bible Translation, Russia
Lean sinn:



Sanasan