Нүүдл 9 - Хальмг келнд орчулсн Әрүн Бичлһс

Тавдгч зовлң: мал үклһн

¹ Деед Эзн Мошед закчана: – Хан тал одад, энүнд кел: «Нанд мөргхин төлә Мини улсиг сулдх, гиҗ Деед Эзн – евреймүдин Бурхн – келҗәнә.

² Кемрҗән тәвлго күчәр бәрхлә,

³ Деед Эзн кеер бәәх цуг мөрд, элҗгд, темәд, үкрмүд, хөд болн ямад экләд әәмшгтәһәр үкх!

⁴ Египетин малыг Израилин улсин малас Деед Эзн йилһәд салһх. Израилин улсин нег чигн мал үкш уга!»

⁵ Деед Эзн болзг йилһв: – Маңһдур Би цуг орн-нутгар тиигҗ кехв!

⁶ Дарук өдртнь Деед Эзн тиигҗ кев: Египетд цуг малнь үкв, Израилин улсин нег чигн мал үксн уга.

⁷ Хан бүртклһ кетхә гиҗ йовулв – йосндан Израилин улсин нег чигн мал үксн уга болҗ һарв! Зуг хан урдк кевәрн һацад Израилин улсиг тегәд тәвлго бәәв.

Зурһадгч зовлң: өөртә хавдр

⁸ Деед Эзн Мошед болн Ахаронд закчана: – Бешәс нег атх үмс һарһҗ авад, тиигчкәд Моше хаана нүднд үзүлҗәһәд,

⁹ тер үмсиг цуг Египетин деегүр тараһад, теңгр тал хайтха. Тиигхлә цуг Египетәр олн-әмтнә болн малын арснднь өөртә хавдр һарх.

¹⁰ Моше болн Ахарон бешәс үмс һарһад, хаана өмн зогсв. Моше үмсиг теңгр тал хайхла – тер дарунь әмтнә болн малын арснд өөртә хавдр һарв.

¹¹ Илвтә улс Мошелә дәкҗ дөрлдҗ чадсн уга: эдн эврән цуг Египетин улс мет өөртә хавдрар бүркгдв.

¹² Зуг Деед Эзн хааг зүткәч кев, болв тер соңслго бәәв. (Деед Эзн Мошед тааһад келсәр.)

Доладгч зовлң: мөндр

¹³ Деед Эзн Мошед закв: – Маңһдур өрүн эрт серәд, дәкнәс хаана өмн ирәд, энүнд кел: «Деед Эзн, евреймүдин Бурхн, келҗәнә: Нанд мөргхин төлә Мини улсиг сулдх!

¹⁴ Эн саамд Нанла әдл нег чигн күн һазр деер уга болҗахинь медүлхәр Би әәмшгтәһәр чамаг, чини мухласиг болн чини цуг улсиг цааҗлнав.

¹⁵ Кемрҗән Би һаран дайлад, чамд болн чини улст маальг гем хальдахла, тадн һазр деер уга болхит!

¹⁶ Болв Би чамаг цуг һазрт Эврә нерән туурулхин төлә, Эврә чидлән үзүлхин төлә әмд үлдәҗәнәв.

¹⁷ Чи Мини улст деерлкҗәнәч, энүг тәвшгоһар седҗәнәч.

¹⁸ Маңһдур минь эн кемд Египет тогтагдсн цагас авн орад уга әәмшгтә мөндр орх!

¹⁹ Эврә сүргән хашад орул, ил һазрт бәәх цуг тоотыг бүрк. Ил һазрт үлдәд эс бултсн әмтн болн мал мөндрт цокгдад үкх».

²⁰ Деед Эзнә үгмүдәс әәсн хаана мухлас эврә зарцнран болн малан бултулв.

²¹ Зуг Деед Эзнә үгмүдиг оньгтан эс авснь эврә мухласан болн малан ил һазрт үлдәв.

²² Деед Эзн Мошед заквр өгчәнә: – Теңгр тал һаран өрг – Египетин һазрт мөндр орх. Эн цуг Египетәр әмтиг болну, малыг болну, тәрәнә өвсиг болну цокх.

²³ Моше тайган теңгр тал дайлхла – Деед Эзн һазрт оһтрһу, мөндр болн һал цәкллһиг йовулв. Египетин цуг орн-нутгар Деед Эзн мөндриг орулв.

²⁴ Мөндр орад, һал цәклв – иим күчтә мөндр Египет тогтснас авн эн һазрт орад уга билә!

²⁵ Цуг Египетәр ил һазрт бәәсн цугинь – әмтиг болну, малыг болну, тәрәнә өвсиг болну мөндр цокв. Моддыг чигн хамхлв.

²⁶ Зуг Израилин улс бәәсн Гошен һазрт мөндр орсн уга.

²⁷ Хан Мошег болн Ахарониг дуудҗ авад, эднд келҗәнә: – Эн саамд би гемтәв! Деед Эзн зөвтә, зуг би болн мини улс – бидн зөвтә бишвидн!

²⁸ Деед Эзнәс суртн: Бурхна оһртһу болн мөндр зогстха! Би тадниг сулдхҗанав, дәкҗ таднд энд үлдх керг уга!

²⁹ Моше энүнд хәрү өгв: – Һазр Деед Эзнә болҗахиг Та меддгәр намаг балһснас һарад, Деед Эзн тал һарарн өргхлә – тер дарунь оһтрһу тагчград, мөндр уурх.

³⁰ Та болн Тана мухлас, тадн цугтан одачн Деед Эзнәс эс әәҗәхинь би үзҗәнәв!

³¹ (Олсиг болн ичмәг мөндр цокв, юңгад гихлә ичмән толһалҗасмн, олсн болхла цецгәлҗәсмн.

³² Зуг цаһан һуйр болн нимгн толһата буудя үрсн уга – яһад гихлә, эннь ора болдг урһмл мөн.)

³³ Моше хааг үлдәһәд, балһснас һарад, Деед Эзнд һаран өргхлә – тер дарунь оһтрһу болн мөндр уурад, хур гиив.

³⁴ Зуг хан хур, мөндр болн оһтрһу уурсинь үзчкәд, дәкнәс эн эврә мухластаһан килнцән һарһад зүткв.

³⁵ Урдкларн әдл хан һацад бәәв: Израилин улсиг сулдхсн уга. Мошеһәр дамҗад Деед Эзнә келсәр болв.