Нүүдл 8 - Хальмг келнд орчулсн Әрүн Бичлһс

Хойрдгч зовлң: мекләс

¹ Деед Эзн Мошед закчана: – Хан тал одад, терүнд кел: «Нанд мөргхин төлә Мини әмтиг сулдхтха, гиҗ Деед Эзн келҗәнә.

² Эс сулдххлачн, чини орн-нутгур мекләс орулнав.

³ Һол мекләсәр дүүрх: эдн уснас һарад, чини бәәшңгиг дүүргх, унтдг хорадчн чини орндгт орад, чини мухласин, цуг келн-улсин гермүдиг дүүргәд, тана бешмүдт болн тадна һуйр элддг тавгт чикгдх.

⁴ Мекләс чамд, чини келн-улст болн чини мухласт орх!»

⁵ Деед Эзн Мошед закчана: – Эврәннь тайган Египетин цуг һолмуд, Нилын урсхулмуд болн нуурмуд деер өрг, гиҗ Ахаронд кел. Египетин һазрур мекләсиг орул!

⁶ Ахарон һаран Египетин усн деегүр дайлхлань – энүнәс мекләс һарад, цуг һазриг дүүргв.

⁷ Египетин илвтә улс бас илвән һарһад, тер һазрур мекләсиг орулв.

⁸ Тегәд хан Мошег болн Ахарониг дуудад, эднд келҗәнә: – Намаг болн мини улсиг эн мекләсәс авртн гиҗ Деед Эзнәс суртн! Тиигхлә би тана әмтиг Деед Эзнд тәкл тәкхин төлә сулдхнав.

⁹ Моше хәрү өгв: – Тана төлә, Тана мухласин болн Тана улсин төлә мөргх болзг нанд заатн. Тадн болн тадна гермүд мекләсәс сулдхгдх. Мекләс зуг һолд үлдх.

¹⁰ – Маңһдур! – гиҗ хан келв. – Деед Эзнлә, мана Бурхнла, әдлцдг күн уга болҗахинь медх зөвтәт гиһәд, Тана келсәр болтха, – гиҗ Моше хәрү өгв.

¹¹ Мекләс Таниг, Тана бәәшңгиг, Тана мухласиг болн Тана улсиг үлдәһәд һарх. Эдн зуг Нил һолд бәәх.

¹² Моше Ахарон хойр хаана бәәрнәс һарна. Египетин хаанур йовулсн мекләсиг уга кехинь Моше Деед Эзнәс сурв.

¹³ Деед Эзн Мошен сурсиг күцәв. Цуг мекләс үкв: гермүдт, хашаст болн кеер.

¹⁴ Үксн мекләсиг овалв, цуг орн-нутгт му үнр һарад бәәв.

¹⁵ Болв хан күчр бәәдл давсиг үзәд, дәкнәс зүткв. Эн Мошег болн Ахарониг соңссн уга (тегәд Деед Эзнә келсәр болв).

Һурвдгч зовлң: иләсн

¹⁶ Деед Эзн Мошед закчана: – Ахаронд кел: эврә тайган өргәд һазриг бүркҗәх шора цоктха – цуг Египетәр шора иләснд хүврх.

¹⁷ Моше Ахарон хойр тиигҗ кев. Ахарон эврә тайган өргәд, шораһар цокхла – олн-әмтиг болн малыг иләсд бүркв. Цуг Египетәр һазриг бүркҗәх шора иләснд хүврв.

¹⁸ Илвтә улс эврәннь илвәрн иләсиг һарһхар седсн бийнь – юмн болсн уга! Әмтн болну, мал болну иләсдәр бүркгдв.

¹⁹ – Энүг Бурхн кев! – гиҗ илвтә улс хаанд келв. Болв хан урдк кевәрн зүткәд, соңслго бәәв (тегәд Деед Эзнә келсәр болв).

Дөрвдгч зовлң: түргн

²⁰ Тегәд Деед Эзн Мошед келнә: – Маңһдур өрүн эрт серәд хаана өмн һарч ир. Терүг һолур йовхлань, терүнд кел: Нанд мөргхин төлә Мини улсиг сулдх, гиҗ Деед Эзн келҗәнә.

²¹ Кемр эс сулдххлачн, Би чамур, чини мухлас тал, чини цуг келн-улсур болн чини бәәшңгүр түргиг йовулнав. Египетин олн-әмтнә цуг гермүдиг болн теднә көл дорк һазр күртлинь түргн дүүргх!

²² Тер өдр Би Гошен һазриг салһнав. Тенд Мини улс бәәнә – тенд түргн уга болх. Эннь Би, Деед Эзн, эн һазрт бәәхинь чи медтхә гиһәд!

²³ Би Эврәннь улсиг зовлңгас гетлгнәв, – чини улсиг болхла – гетлгшгов. Эн темдг маңһдур ирх!

²⁴ Тиигҗ Деед Эзн кев. То-тоомҗ уга түргн хаана бәәшңгиг, энүнә мухласин гермүдиг болн цуг Египетиг дүүргв. Түргнәс көлтә орн-нутг үкҗәв.

²⁵ Хан Мошег болн Ахарониг дуудад эднд келҗәнә: – Энд, мана һазрт, эврә Бурхндан одад тәкл тәктн.

²⁶ Зуг Моше хәрү өгчәнә: – Бидн энүг кеҗ чадшговидн. Деед Эзнд, мана Бурхнд, тәкл тәкхлә, Египетин улс терүг җигшүртә йовдлд тоолхмн. Кемр Египетин улсин нүднд тиим тәкл тәклһиг күцәхлә, эдн мадниг чолуһар цокх!

²⁷ Бидн һурвн өдрәр көдә һазрур йовад, Деед Эзнд, мана Бурхнд, энүнә келсәр тәкл тәкх зөвтәвидн.

²⁸ – Би тадниг тәвҗәнәв, – гиҗ хан келв. – Йовад, көдә һазрт эврәннь Бурхн Деед Эзнд тәкл тәктн, зуг холд бичә йовтн. Тиигчкәд мини төлә суртн!

²⁹ Моше хәрү өгчәнә: – Танас һархларн, Деед Эзнәс сурнав, маңһдур тадн цугтан – хан болну, мухлас болну – Египетин цуг улс түргнәс сулдхгдх. Зуг хан мадниг дәкҗ бичә меклтхә, мана улс йовад, Деед Эзнд тәкл тәкхд саалтг бичә учратха.

³⁰ Моше хаана бәәрнәс һарад, Деед Эзиг сурхла,

³¹ Тернь энүнә сурсинь күцәв: хааниг, энүнә мухласиг болн цуг Египетин улсиг түргнәс сулдхв. Нег чигн түргн үлдсн уга.

³² Хан дәкнәс һацв: эн олн-әмтиг сулдхсн уга.