Нүүдл 6 - Хальмг келнд орчулсн Әрүн Бичлһс

¹ Деед Эзн хәрү өгчәнә: – Хаанла Би ю кехинь ода чи үзхич. Мини чаңһ һарин күчәр эн евреймүдиг тәвчкх. Мини чаңһ һарин күчәр эн эдниг нам орн-нутгасн көөҗ һарһх!

Бурхн Израилиг аврхв гинә

² Бурхн Мошед келнә: – Би Деед Эзн!

³ Би Хамгин Күчтә Бурхн болҗ Абрахамд, Ицхакд болн Яковд үзгдәд ирләв, болв «Яхве» гидг нерән Би эднд медүлсн угав.

⁴ Би теднлә бооцаһан батлад, Канана һазриг, эдн күүнә һазра улс болҗ бәәсн нутгиг, эднд өгх боллав.

⁵ Ода Би Египетин улс Израилин улсиг мухлас кеһәд зоваҗахинь соңсад, Мини бооцана тускар тодлув.

⁶ Израилин улст кел: «Би Деед Эзн! Би тадниг Египетин бәрәнәс көтлҗ һарһнав, мухлаллһнас сулдхнав! Би тадниг аврнав: Мини һар өргәтә бәәнә болн Мини цааҗ әәмшгтә!

⁷ Би таднар Эврәннь улс кеһәд, тадна Бурхн болнав, Египетин даҗрлһнас һарһҗ авсн Би – тана Деед Эзн болҗахиг тадн тиигәд медхит.

⁸ Би Абрахамд, Ицхакд болн Яковд байртаһар өгхәр седҗәсн һазрур тадниг көтлҗ ирәд, тадна медлд терүг өгнәв. Би Деед Эзн!» – гиҗ Эн Мошед келв.

⁹ Моше эн үгмүдиг Израилин улст келхләнь, тедн хәрг болсндан күнд көдлмшәс көлтә энүг соңссн уга.

¹⁰ Тиигхлә Деед Эзн Мошед закв:

¹¹ – Египетин хаанур од. Израилин улст энүнә орн-нутгас һарх зөвшәл өг гиҗ терүнд кел!

¹² Тегәд Моше Деед Эзнд келҗәнә: – Кемр Израилин улс намаг эс соңсҗахла, хан намаг яһҗ соңсхмб? Терүнәс даву болхлаг, Би сәәнәр келҗ чаддгов…

Мошен болн Ахарона уңг-тохм

¹³ Деед Эзн Мошелә болн Ахаронла күүндв. Египетәс Израилин улсиг һарһхин төлә теднүр бас Египетин хан тал одх заквр эднд өгв.

¹⁴ Теднә уңг-тохмин өвкнр эн. Рубена көвүд (Рубен – Израилин ууһн үрнь): Ханок, Паллу, Хецрон болн Карми. Эднәс Рубена үйнр һарсн болдг.

¹⁵ Шимона көвүд: Емуэл, Ямин, Охад, Якин, Цохар болн Канана күүкд күүнә көвүн Шаул. Эднәс Шимона үйнр һарсн болдг.

¹⁶ Теднә уңг-отгар Левин көвүдин нерд эн: Гершон, Кахат болн Мерари. (Леви зун һучн долан җил бәәв.)

¹⁷ Гершона көвүд: эврә төрлтәһән Ливни болн Шими.

¹⁸ Кахатын көвүд: Амрам, Ицхар, Хеврон болн Узиэл. (Кахат зун һучн һурвн җил бәәв.)

¹⁹ Мерарин көвүд: Махли болн Муши. Теднә уңг-отгар Левин үйнр эн.

²⁰ Амрам эврәннь һаһа, Йохеведиг, буулһҗ авв. Эн энүнд Ахарон болн Моше көвүд һарһв. (Амрам зун һучн долан җил бәәв.)

²¹ Ицхарин көвүд: Корах, Нефег болн Зихри.

²² Узиэлин көвүд: Мисаил, Элцафон болн Ситри.

²³ Нахшона дү күүкиг – Аминадавин күүкиг Элишеваг – Ахарон буулһҗ авв. Эн күүкн терүнд Надав, Авиуд, Элеазар болн Итамар гидг көвүдиг һарһв.

²⁴ Корахин көвүд: Асир, Элкана болн Авиасап. Эднәс Корахин үйнр һарсн болдг.

²⁵ Ахарона көвүн Элеазар Путиэлин күүкдин негинь буулһҗ авв. Эн терүнд Пинехас көвү һарһв. Левин уңг-тохмин өвкнр тиим.

²⁶ Эднд, Ахаронд болн Мошед, Израилин улсиг отг-отгарн Египетәс көтлҗ һарһх заквр Деед Эзн өгв.

²⁷ Тегәд Израилин улсиг тендәс көтлҗ һарһхин төлә Моше болн Ахарон Египетин хаанла күүндҗ.

Деед Эзн Мошег болн Ахарониг хан тал илгәнә

²⁸ Тегәд Египетд Деед Эзн Мошелә күүндәд,

²⁹ терүнд иигҗ келв: – Би Деед Эзн! Би чамд келсиг кевтнь Египетин хаанд келҗ медүл.

³⁰ – Би сәәнәр келҗ чаддгов, – гиҗ Моше хәрү өгв. – Намаг хан яһҗ соңсхмб?