Нүүдл 40 - Хальмг келнд орчулсн Әрүн Бичлһс

Өргә гериг босхлһн

¹ Деед Эзн Мошед келнә:

² – Түрүңк сарин түрүн өдр өргә гер – Харһлтын Шатр босх.

³ Терүнд Бооцана хәәрцг орулад көшгәр ха.

⁴ Терүнд ширә орулад деернь кергтә тоотынь тәв. Герлин гегә авч ирәд деерәһәрнь олн цөгц тәв.

⁵ Бооцана хәәрцгин өмн күҗ уңһдадг алтн ширә тәв. Өргә герин үүднд көшг өлг.

⁶ Өргә герин үүднә өмн – Харһлтын Шатрин – тәкл шатадг орм тәв.

⁷ Харһлтын Шатрин болн тәкл тәкдг ормин хоорнд ик сав тәвәд терүг усар дүүрг.

⁸ Эргүләд хаша ке, хашан үүднд көшг өлг.

⁹ Дарунь түркдг тос авад өргә герт түрк, дотрнь бәәсн тоотд түрк: өргә гериг болн дотрнь бәәсн тоотыг әрүсл. Тедн әрүн болх.

¹⁰ Тәкл шатадг ормд бас тос түрк, терүнә кергтә тоот савд түрк: терүг әрүсл – тер әрүнәс әрүн болх.

¹¹ Ик савд болн терүнә түшгт түрк, тедниг әрүсл.

¹² Дәкәд Харһлтын Шатрин үүдн тал Ахарониг көвүдтәһинь авч ирәд тедниг усар уһа.

¹³ Ахаронд әрүслсн хувц өмск, терүнд тос түрк: Мини гелң болдгар терүг әрүсл.

¹⁴ Терүнә көвүд авч ир, теднд киилг өмск,

¹⁵ теднд эцкднь тос түркснлә әдл түрк, тегәд тедн Мини гелңгүд болх. Эн тос түрклһн гелң гисн нерн теднд мөңкинд зүүгдҗәнә – үйәс үйд.

¹⁶ Деед Эзнә заксар Моше цугтаһинь дигтә кевәр күцәв.

¹⁷ Хойрдгч җилин түрүңк сарин түрүн өдр өргә гер босхгдв.

¹⁸ Моше өргә гер босхна: тер түшгинь тәвнә, тедн деер тулг бахнс тәвәд, көндлң моддта негдүлнә, бахнс тәвнә,

¹⁹ өргә гериг некмр эдәр бүркв, деерәснь бүркәһәр бүркнә. Тиигтхә гиҗ Деед Эзн терүнд заксар кенә.

²⁰ Моше Бооцана хавтха чолуд авад хәәрцгт тәвнә. Хәәрцгт ут модд тер нааһад деернь бүркә тәвнә,

²¹ хәәрцгиг өргә герт орулад халхлх көшг татна, терүгәр бас Бооцана хәәрцг хаана. Тиигтхә гиҗ терүнд Деед Эзн заксар кенә.

²² Өргә герин – Харһлтын Шатрин – ар үзгт көшгин өмн Моше ширә тәвнә.

²³ Терүн деер Деед Эзнә өмн әрүн өдмг Терүнә келсәр тәвнә.

²⁴ Өргә герин – Харһлтын Шатрин – өмн үзгәс, ширән өмн Моше герлин гегә тәвв.

²⁵ Деед Эзнә өмн терүн деер цөгцс, Терүнә келсәр, тәвнә.

²⁶ Харһлтын Шатрт көшгин өмн алтн ширә тәвв.

²⁷ Деед Эзнә келсәр терүн деер күҗ уңһдав.

²⁸ Өргә герин үүднд тер көшг өлгв.

²⁹ Өргә герин өмн – Харһлтын Шатрин – тәкл шатадг орм кеһәд, терүн деер тәкл тәкәд, әрүн өдмгәр дееҗ өргв. Тиигтхә гиҗ Деед Эзн терүнд заксар кев.

³⁰ Харһлтын Шатрин болн тәкл тәкдг ормин хоорнд ик сав тәвәд, терүг уһадг авъяс күцәх усар дүүргв.

³¹ Моше, Ахарон болн терүнә көвүд ик савас усар һаран, көлән уһацхав.

³² Тегәд тедн Харһлтын Шатрт орхар седхләрн, эс гиҗ тәкл тәкдг орм тал өөрдхәр седхләрн уһадг болв. Тиигтхә гиҗ Деед Эзн Мошед заксар кев.

³³ Өргә герин болн тәкл тәкдг ормин эргнд тер хаша босхв, хашан үүднд көшг татв. Тиигҗ Моше көдлмшән төгсәв.

Деед Эзнә туурмҗ

³⁴ Үүлн Харһлтын Шатриг хаав, Деед Эзнә туурмҗ өргә гериг дүүргв.

³⁵ Харһлтын Шатрт Моше орҗ чадсн уга, яһад гихлә үүлн Харһлтын Шатриг бүркв, Деед Эзнә туурмҗ өргә гериг дүүргв.

³⁶ Үүлн өргә гер деер деегшән һархлаг, Израилин улс дәкн хаалһдан орад дарани һатлвран күцәдг билә.

³⁷ Кемр үүлн эс өөдлхлә, тедн ормасн көндрдмн биш, үүлн өөдлхиг күләдг билә.

³⁸ Өдрт өргә герин деер Деед Эзнә үүлн бәәдмн, сөөһәр эн үүлн дотр һал шатдмн. Терүг Израилин әмтн цугтан үздмн. Теднә тиигҗ һазр эрглһн ямаран чигн цагт болҗав.