Нүүдл 4 - Хальмг келнд орчулсн Әрүн Бичлһс

Мошен төлә болҗах өвәрц йовдл

¹ – Кемр нанд итклго, намаг соңслго Деед Эзн чамд үзгдсн уга гиҗ келхләнь, би яахмб? – гиҗ Моше келҗәнә.

² – Һартчн юн бәәнә? – гиҗ Мошеһәс Деед Эзн сурна. – Тайг, – гиҗ тернь хәрү өгв.

³ – Терүгән һазрт хай, – гиҗ Деед Эзн закв. Моше хайчкв. Тайгнь моһад хүврв, Моше зулад гүүв.

⁴ – Һаран сарваһад, энүг сүүләснь бәр, – гиҗ Деед Эзн энүнд закна. Моше һаран сарваһад моһаг бәрҗ авхлань – энүнә һарт тернь тайг болҗ хүврнә.

⁵ – Эннь чамд йосндан Деед Эзн, теднә эк-эцкнрин Бурхн – Абрахамин, Ицхакин болн Яковин Бурхн үзгдәд ирсинь чамд итктхә гисн темдг, – гиҗ Бурхн келнә.

⁶ – Өвртән һаран дүр, – гиҗ Мошед Деед Эзн закна. Моше һаран өвртән дүрнә. Һаран һарһхлань, тернь цасн мет цаһан болҗ одҗ – арсна гем бүтәҗ.

⁷ – Дәкәд һаран өвртән дүр, – гиҗ энүнд Деед Эзн закна. Моше дәкнәс һаран өвртән дүрәд һарһхлань, һарнь урдк кевәрн эрүл-дорул цогц мет болв.

⁸ – Кемр тедн чамд эс иткхлә, кемр түрүн өвәрц йовдл эдниг эс иткүлхлә – эдниг хойрдгч өвәрц йовдл иткүлх.

⁹ Зуг кемр эдн эн өвәрц йовдлмудт итклго, чамаг эс соңсхла, тиигхлә Нил һолын усиг утхҗ авад, һазрт цацхла, эн усн цуснд хүврх, – гиҗ Деед Эзн келнә.

¹⁰ – О-о, мини Деед Эзн! – гиҗ Моше Деед Эзнәс эрәд сурна. – Би хурц келтә бишүв. Өцклдүр чигн, урҗ өдр чигн, Тана мухлала Тана күүндсн өдрәс авн чигн тиим би болҗанав. Би сәәнәр келдгов. Кезәчн хурц келн угав.

¹¹ Тиигхлә Деед Эзн келҗәнә: – Күүнд кен ам өгсмб? Кен келн уга эс гиҗ таңх болхиг кеҗәхмб? Кен нүдәрн үздг эс гиҗ сохр болхиг кеҗәхмб? Би, Деед Эзн, эс кеҗәнү?

¹² Тиигәд йовхнчн! Чамаг келхлә, Би чамла бәәхүв. Би эврән ю келхичн чамд дасхнав.

¹³ – О-о, Деед Эзн мини! – гиҗ Моше эрҗ сурна. – Талдан күүг – эврән дурлсан йовултн!

¹⁴ Тиигхлә Деед Эзн Мошед уурлад, энүнд келнә: – Левихнә отгас Ахарон гидг ах чамд угай? Тер келҗ чаддгинь би меднәв! Тер чамаг тосхар аашна, терчн чамаг үзәд байрлх.

¹⁵ Чи болхла энүнд келәд, терүнә амнд үгинь орулад медүлхич. Тадн күүндсн цагт Би Эврән таднла бәәхүв. Ю кехинь Би Эврән таднд дасхнав.

¹⁶ Ахарон чини амн болад, чини ормд әмтнлә күүндх, чи терүнд Бурхнла әдл болхич.

¹⁷ Эн тайгиг бийләһән ав. Энүнә нилчәр чи онц темдг һарһхич.

Моше Египет тал хәрү ирҗәнә

¹⁸ Моше эврәннь хадм эцк Итро тал хәрү ирәд келнә: – Йовнав би, Египетд мини ахнр тал хәрү одҗ, әмд бәәх угаһинь хәләнәв. – Амулң менд йов, – гиҗ энүнд Итро келнә.

¹⁹ Тенд, Мидьянд, Деед Эзн Мошед келҗәнә: – Египет тал хәр. Чамаг алхар седҗәснь өңгрҗ одв.

²⁰ Моше гергән болн күүкдән элҗгн деер суулһад, Бурхна өгсн тайган бийләһән авад Египет тал йовна.

²¹ Деед Эзн Мошед келнә: – Би чамд өвәрц йовдлмуд учрах чидл өгв. Египетд ирхләрн хаанд эн өвәрц йовдлмудыг үзүл. Би хаанас зөрхинь некнәв; эн тадниг тәвшго.

²² Тиигхлә чи терүнд келхич: «Деед Эзн келнә: Израиль – Нанд көвүнләм әдл, Мини ууһн үрн мет.

²³ Би чамд келҗәнәв: терүг Нанд мөргхин төлә тәвчк. Кемр эс сулдххла, тиигхлә Би чини көвүг – ууһн үричн – алнав!»

²⁴ Хаалһднь, хондг һазрт, Деед Эзн Моше тал ирәд, энүг алхар седнә.

²⁵ Тиигхлә Ципора хурц цәкүрәр кесн утх авад, эврәннь көвүнә бий махмудын үзүринь керчәд, энүнә көлднь әрә һаран күргчкәд келнә: – Чи нанд цусарн төрл болҗанач!

²⁶ Тиигхлә Деед Эзн энүнәс хооран цухрна. («Цусарн төрл» гиҗ эн әмн бийин үзүрин керчлһнә тускар келнә.)

²⁷ – Мошен өмнәс көдә һазрур йов, – гиҗ Деед Эзн Ахаронд закна. Ахарон хаалһд һарад, Бурхна уулын өөр Мошелә харһад энүг үмсәд мендлнә.

²⁸ Деед Эзн Мошеһәр Эврә элч кеһәд, ю келсинь, ямр онц темдг үүдәхд Тер заквр өгсинь Моше Ахаронд келҗ өгнә.

²⁹ Эдн йовад, Израилин цуг медәтнриг цуглулна.

³⁰ Деед Эзн Мошед ю келсинь Ахарон эднд медүләд, цуг әмтнә нүүрт онц темдг һарһв.

³¹ Әмтн энүнд иткв. Деед Эзн Израилин улсин тускар тодлад, эднә зовлң үзсинь соңсчкад, әмтн мөргәд һазр элкдәд унв.