Нүүдл 39 - Хальмг келнд орчулсн Әрүн Бичлһс

Гелңгүдин хувц уйлһн

¹ Көк, чисм улан болн улавр күрң утцнас әрүн бәәрнд мөрглһнд орх хувц кенә. Тиим әрүн хувц Ахаронд некҗ өгнә. Деед Эзн Мошед заквр өгсәр тедн мел тиигҗ кев.

² Алтнас, көк, чисм улан болн улавр күрң утцнас болн нимгн олснас заппу кенә.

³ Энүнә төлә алтыг нимгләд утц кеһәд, тер утциг көк, чисм улан, улавр күрң утцнла ниилүлв, дәкәд нимгн олснас сиилвртә эд некҗ кенә.

⁴ Заппун үзг болһнас ээм һарһҗ уйна.

⁵ Заппун бүс бас заппун бәәдлтәһәр нег кевәр некгдв: алтн утцар, көк, чисм улан, улавр күрң утцар болн нәрхн олсар. Деед Эзн Мошед заквр өгсәр тер мел тиигҗ кев.

⁶ Оникс чолуд бел кецхәв. Теднь алтар кесн сиилвртә кевд тәвгдв. Тер чолудт, тамһд бәәснлә әдләр, Израилин көвүдин нерд керчгдсн бәәҗ.

⁷ Тедниг заппун ээм деернь тәвв. Эн чолуд Израилин көвүдин туск тодлвр болтха гисн темдг болҗана. Деед Эзн Мошед заквр өгсәр тер мел тиигҗ кев.

⁸ Заппула әдл чееҗд өлгдг түңгрцг кев. Тернь бас алтн утцнас, көк, чисм улан, улавр күрң утцнас болн нәрхн олснас сиилвртәһәр некгдв.

⁹ Чееҗд өлгдг түңгрцг дөрвлҗн бәәдлтә, нег сөм утдан, нег сөм өргндән хойр давхрлад эвксн эдәр кегдҗ.

¹⁰ Терүн деерәһәр 4 зерглән үнтә чолуд бәәнә. Түрүн зергләнднь сердолик, топаз, берилл;

¹¹ хойрдгч зергләнд бирюза, сапфир, изумруд;

¹² һурвдгчднь – гиацинт, агат, аметист;

¹³ дөрвдгчднь – хризолит, оникс болн яшма. Чолуд цугтан сиилвртә алтн кевд тәвгдҗ.

¹⁴ Израилин көвүдин нертә чолуд тооһарн 12 болв. Чолун болһн деер тамһла әдл Израилин 12 отгин неҗәһәд нер керчәд батлҗ.

¹⁵ Чееҗ деерк түңгрцгин төлә цевр алтар эрчм орулгдсн бүчлә әдл олн цев кегдҗ.

¹⁶ Хойр алтн сиилвртә кев кегдв. Хойр алтн төөлг кеһәд түңгрцгин өнцгүдәр өлгв,

¹⁷ тедниг хойр алтн цевәр

¹⁸ хойр кевд негдүлв, тедниг заппун ээм деер өмнәснь өлгв.

¹⁹ Бас хойр алтн төөлг кев. Тедниг чееҗд өлгдг түңгрцгин хойр өнцгин дотраснь заппуд наалддг бийәснь өлгв.

²⁰ Бас 2 алтн төөлг кеһәд өмн бийәснь ээмин көвән захд өлгв. Тернь заппун бүсин деер уйгдҗ.

²¹ Чееҗд өлгдг түңгрцгин төөлгүд заппун төөлгүдлә көк боодһаһар боогдҗ. Тегәд заппун бүс деер бәәхләрн тер заппуһас ундгоһар кегдв. Деед Эзн Мошед заквр өгсәр тедн мел тиигҗ кев.

²² Заппу дор өмсдг хувциг мел көк утцар некв.

²³ Тернь бичә шууртха гиһәд терүнд бат көвәтә малтар бәәнә. Тернь мел дәәчнрин хувцна бәәдлтә.

²⁴ Деерк хувцна дор көвәһәр көк, чисм улан болн улавр күрң утцар, нәрхн олсар гранатын темснә бәәдлтә бичкн долдас кев.

²⁵ Цевр алтар хоңхс кеһәд гранат дунд дор көвәһәрнь өлгв.

²⁶ Мөргүлин төлә кесн хоңхс болн гранатын темсд деерк хувцна дор көвәһәр селгәһәр сольгдв. Деед Эзн Мошед заквр өгсәр тедн мел тиигҗ кев.

²⁷ Ахарона болн терүнә көвүдин төлә олсн утцар киилг некҗ өгв,

²⁸ олсн эдәс тахъя болн толһад боодг олсн боодһас, нимгн олсн эдәс шалвр кеҗ өгв.

²⁹ Нимгн олсар, көк, чисм улан болн улавр күрң утцдар олн өңгтә бүс некҗ өгв. Деед Эзн Мошед заквр өгсәр тедн мел тиигҗ кев.

³⁰ Әрүн ормд титм кев – цевр алтнас темдг. Терүн деер, тамһ деер керчәд кеснлә әдләр, иигҗ бичгдв: «ДЕЕД ЭЗНӘ ӘРҮН ТЕМДГ».

³¹ Терүнд тахъя деерәһәр боох көк боодһа уйҗ кев. Деед Эзн Мошед заквр өгсәр тер мел тиигҗ кев.

Өргә гер бәрлһнә көдлмш төгсәлһн

³² Тегәд өргә гер бәрлһнә көдлмш төгсв – Харһлтын Шатр бәргдв. Израилин улс Мошед Деед Эзнә заксар цугинь дигтә кевәр күцәв.

³³ Тедн Мошед өргә гер, бүркә болн цуг кергтә тоотынь – бүтүс, тулг бахнс, көндлң модд, бахнс, түшгүд,

³⁴ бас хуцин ширдсн арсн бүркә, нимгләд кесн арсн бүркә болн халхлх көшг,

³⁵ Бооцана хәәрцг, терүнә ут модд, бүркә,

³⁶ ширә болн терүнд тәвх сав, Деед Эзнә өмн оркх әрүн өдмг,

³⁷ цевр алтар кесн герлин гегән болн терүн деер тәвх цөгцс, терүнд кергтә тоотс болн терүнд кергтә тосн,

³⁸ алтн ширә, түркдг тос, шатадг күҗ, Шатрт орх үүднә көшг,

³⁹ улан мөңгн тәкл тәкдг орм улан мөңгн термтәһән, терүнә ут модд болн терүнд кергтә тоот сав, тулгта ик сав,

⁴⁰ хашан көшг, терүнә бахнс болн терүн дор тәвх түшг, хашан үүднә көшг, деесд болн бичкн һасн, мөргүл кехлә кергтә тоотыг өргә герт – Харһлтын Шатрт.

⁴¹ Бас әрүн бәәрнд мөргүл күцәх әрүн хувцд: гелң Ахаронд болн терүнә көвүдт.

⁴² Деед Эзнә Мошед заасар мел цугтаһинь Израилин улс күцәв.

⁴³ Моше теднә кесиг эргәд хәләв. Цугнь мел Деед Эзнә келсәр дигтәһәр кегдв. Моше теднд әдсән күргв.