Нүүдл 38 - Хальмг келнд орчулсн Әрүн Бичлһс

Тәкл шатадг орм келһн

¹ Акация моднас Бецалел тәкл шатадг дөрвлҗн орм кев – утдан тавн тоха, өргндән тавн тоха, өндртән болхла һурвн тоха.

² Дөрвн өнцг деернь дөрвн өвр кев – тернь тәклин ормла нег бәәдлтә болад ниилв. Терүгән тер улан мөңгәр будв.

³ Тәкл тәкдг ормд тәвх кергтә тоотыг олар кев: сав, бичкн күрз, цус авдг сав, мах бәрдг серә болн һал һарһдг сав. Энүг цугтаһинь улан мөңгәр кев.

⁴ Тәкл тәкдг ормд улан мөңгәр терм кев. Терүг захин дор тал дунднь күрдгәр тәвв.

⁵ Ут моддын төлә дөрвн төөлг цутхад, терүгән улан мөңгн термин дөрвн бийднь батлв.

⁶ Ут моддыг болхла, акация модар кеһәд улан мөңгәр һадрлв.

⁷ Ут моддыг тәкл тәкдг ормин хәврһәрнь бәәсн төөлгүдт өргхд эвтә болтха гиһәд тер орулв. Тәкл тәкдг орм тегш модар көндәһәр кегдв.

⁸ Бецалел ик сав кеһәд дорнь тулг тәвв. Харһлтын Шатрин үүднд церглҗәсн күүкд улсин нүр үздгин улан мөңгн кевтән тер савд орулгдв.

Өргә герин хаша келһн

⁹ Дәкәд тер хаша кев. Өмн үзгәснь нимгн олсн эдәр кегдсн көшг утдан 100 тоха болв,

¹⁰ 20 улан мөңгн түшгтә 20 бахнст тер көшгиг өлгв. Бахнст хадгдсн дегәс болн ниилврнь цаһан мөңгәр кегдв.

¹¹ Ар үзгәснь өлгсн көшг утдан 100 тоха болв. Тернь 20 бахн, 20 улан мөңгн түшгтәһәр кегдв. Бахнс деер бәәх дегәс болн ниилврнь цаһан мөңгәр кегдв.

¹² Хашан барун үзгәснь утдан 50 тоха көшг өлггдв. Тернь 10 бахнста болн 10 түшгтә болв. Бахнст өлггдсн дегәс болн ниилврнь цаһан мөңгәр кегдв.

¹³ Зүн үзгнь утдан 50 тоха.

¹⁴ Терүнә үүднә нег бийәснь утдан 15 тоха көшг 3 түшгтә 3 бахнс тәвгдв.

¹⁵ Хашан үүднә талдан бийднь утдан 15 тоха көшг 3 түшгтә 3 бахнс тәвгдв.

¹⁶ Хашан эргндк көшг кевтән нимгн олсн эдәр уйгдв.

¹⁷ Бахнс дор тәвгдсн түшгүд улан мөңгәр, бахнс деер хадсн дегәс болн ниилврнь цаһан мөңгәр кегдв. Бахнсин дееркнь цаһан мөңгәр бүркгдв. Хашан бахнс цугтан цаһан мөңгәр ниилгдв.

¹⁸ Үүднд өлггдсн көшг олн өңгтәһәр кегдв: көк, чисм улан, улавр күрң утцдар болн нәрхн олсар некгдв, утдан 20 тоха болв. Хашан көшг мет тер өндртән 5 тоха.

¹⁹ Үүднә өөр 4 улан мөңгн түшгтә 4 бахн бәәҗ; бахнст бәәсн дегәс цаһан мөңгәр кегдҗ. Деерәһәрн бахнс цаһан мөңгәр будата, ниилврнь бас цаһан мөңгн.

²⁰ Өргә герин бичкн һасн болн хашан эргндк көшгин бичкн һасн улан мөңгәр кегдҗ.

Тосхлтын төлә олзлгдсн тоотс

²¹ Бооцана өргә герт һарһсн һару иим болв. Эннь Ахарона гелң көвүн Итамарин һардврт Мошен зааврар левитмүд кев.

²² (Бецалел – Урин көвүн, Хурин ач – Иудан отгас – тер Бецалел Деед Эзнә заасиг Мошеһәр дамҗад цугтаһинь күцәв.

²³ Терүнлә Дан гидг отгас Ахисамахин көвүн Оголиав болна. Тер сиилвр һарһдг урч бәәҗ, бас зүсн-зүүл сиилвртә эд көк, чисм улан, улавр күрң болн нәрхн олсн утцдар некдг эрдмтә бәәҗ.)

²⁴ Әрүн бәәр бәрхин төлә һарһсн алтн – авч ирәд бәрц бәрсн – 29 талант болн 730 әрүн бәәрнә шекель болв.

²⁵ Отгин улсиг тоолхд цуглулсн цаһан мөңгн 100 талант болн 1 775 әрүн бәәрнә шекель болв:

²⁶ 20 настаһас деегшән тоолсн күн болһна – 603 550 күн – неҗәһәд бека (әрүн бәәрнә шекелин өрәлинь) авв.

²⁷ Әрүн бәәрнә бахнсин түшг болн терүнә көшгин бахнс цутххин төлә 100 талант орв: 100 түшгт 100 талант, неҗәһәд талант түшг болһнд.

²⁸ Миңһн долан зун далн тавн цаһан мөңгн шекель бахнсин дегәд болн ниилврт орулгдв, бахнсин дееркиг цаһан мөңгәр будлһнд бас орв.

²⁹ Бәрц бәрәд бәәсн улан мөңгн 70 талант болн 2 400 шекель күрв.

³⁰ Терүнәс Харһлтын Шатрин үүднд бәәсн бахнсин түшг, улан мөңгн термтә тәкл тәкдг орм болн кергтә тоотнь кегдв,

³¹ хашан эргндк көшг татх бахнсин түшгт болн хашан ик үүднә төлә, бас өргә герин бичкн һаснд болн хашан эргндк көшгин бичкн һаснд улан мөңгн орулгдв.