Нүүдл 36 - Хальмг келнд орчулсн Әрүн Бичлһс

¹ Деед Эзнә өгсн цецн ухата болн тоолврта Бецалел, Оголиав болн эрдмчнр цугтан әрүн бәәр тосхад цугтаһинь күцәх йоста.

² Бецалелиг, Оголиавиг болн Деед Эзнә эрдм белглсн әмтиг, көдлхәр седҗәхинь, Моше цугтаһинь дуудна.

³ Тедн Мошеһәс Израилин улсин әрүн бәәр бәрхәр авч ирсн бәрц авна. Олн-әмтн болхла өрүн болһн шин белг шинәс авч ирәд бәәв.

⁴ Әрүн өргә бәрҗәсн эрдмтә әмтн көдлмшән үлдәһәд

⁵ Моше тал ирәд келнә: – Деед Эзнә көдлмш кетхә гиһәд келснәс әмтн юман үлүһәр авч ирҗәнә.

⁶ Моше бәәрндән тархах заавр өгнә: залус чигн, гергд чигн әрүн өргән төлә дәкҗ бичә бәрц авч иртхә гинә. Әмтнә авч ирсиг авдган уурна,

⁷ керг күцәхин төлә авч ирсн юмн икдәд бәәв.

Өргә гер бәрлһн

⁸ Көдлмшән эклсн эрдмчнр өргә герин төлә нимгн олснас, көк, чисм улан болн улавр күрң утцар 10 некмр эд некҗ кенә; тер эд деер керүбмүд некәтә.

⁹ Некмр эд болһн утдан 28 тоха, өргндән – 4 тоха; тер некмр эд кевтән нег кемҗәтә болна.

¹⁰ Тавн некмр эдиг хамднь ниилүләд нег әңг кеһәд уйна, талдан 5 эдиг бас ниилүләд хамднь уйна.

¹¹ Некмр эдин нег әңгин захарнь көк бүтүс болн тиим кевәр талдан эдин захар тиим бүтүс кев:

¹² нег эдин захин көвәһәр 50 бүтү болн 50 бүтү талдан әңгин захин некмр эдт тус-тустнь 50 бүтү һарһҗ уйв.

¹³ Тәвн алтн дегә һарһад хойр әңг некмр эдиг ниилүләд өргә гер кев.

¹⁴ Ямана ноосар 11 некмр эдәр өргә герин бүркәг кев.

¹⁵ Некмр эд утдан 30 тоха, өргндән 4 тоха болв. Арвн негн әңг кевтән нег кемҗәтә болв.

¹⁶ Терүнә 5 әңгинь ниилүләд уйв, дәкәд талдан 6 бас негдүләд хамднь уйв.

¹⁷ Некмр эдин нег әңгин захинь дахулад 50 бүтү кев, бас 50 бүтү талдан некмр эдин захин эргнднь кев.

¹⁸ Улан мөңгн 50 дегә товч кев. Хойр әңгинь ниилүләд нег бүркәг кев.

¹⁹ Деерәснь хуцин будгта арсар бүркәг кев, терүн деегәр – нимглсн арс бүркв.

²⁰ Өргә герт акация моднас тулг бахнс кев:

²¹ бахн болһн 10 тоха утдан, күсдундур тоха өргндән,

²² нег-негнь арата 2 модар келкәтә болх. Өргә герин бахнс цугтан тиим бәәҗ.

²³ Өргә герин өмн үзгин эрст 20 тулг бахн кенә.

²⁴ Тедн дор тулх 40 цаһан мөңгн ул – бахн болһна дор хошаһад ул, терүнә 2 дөрвн талта арата модна төлә бас.

²⁵ Тегәд хойрдгч ар үзгин эрст 20 бахн кегдв,

²⁶ 40 цаһан мөңгн ул – хошаһад ул бахн болһнд.

²⁷ Ардк, өргә герин барун эрст 6 бахн кев,

²⁸ ардк өнцгүдт бас 2 бахн кегдв.

²⁹ Дораһарн эн бахнс хойр әңглгдҗ, деерәһәрн (түрүн төөнг бәәсн ормар) – бүтү. Тиим бахнс хойр бәәҗ, өнцг болһнд неҗәһәд бахн.

³⁰ Эн 8 бахнин төлә 16 цаһан мөңгн ул кегдв: бахн болһнд хошаһад ул.

³¹ Акация модар көндлң модд кегдв: өргә герин нег эрсин эргнд ниилүлсн 5 тулг бахн,

³² хойрдгч эрсин эргнд тулг бахнс ниилүлхин төлә – 5, бас 5 көндлң модн ардк барун эрсин төлә кегдв.

³³ Дунд бәәх келкәтә модн тулг бахнсиг эрсин нег захас хойрдгч захта ниилүлнә.

³⁴ Тулг бахнсиг алтар будна, көндлң модыг батлхин төлә теднд алтн төөлг хадна, көндлң модыг алтар будна.

³⁵ Көк, чисм улан, улавр күрң утцар болн нимгн олсар көшг гүрнә. Терүн деерәһәр керүбмүдин дүр некнә.

³⁶ Терүнә төлә акация моднас алтар будсн 4 бүдүн бахн кенә, алтн дегәс кенә, цаһан мөңгнәс бахнст 4 түшг кегдв.

³⁷ Өргә герин үүд хаахин төлә көк, чисм улан, улавр күрң утцдас болн нимгн олснас олн өңгтә көшг кенә.

³⁸ Дегәстә 5 бахн кеһәд, дораснь болн деерәснь алтар будна. Теднә төлә улан мөңгәр 5 түшг кегдв.