Нүүдл 35 - Хальмг келнд орчулсн Әрүн Бичлһс

Бемб өдрин тускар

¹ Израилин улсин хамцана цуг әмтиг хураһад Моше келв: – Деед Эзн иим заавр өгв:

² «Зурһан хонгтан көдлтн, доладгч өдртән – Деед Эзнә әрүн төвкнүн бәәлһнә бемб өдр. Эн өдр көдлсн күн алгдх.

³ Тадна гермүдт бемб өдрлә нам һал чигн шатаҗ болшго».

Өргә герт туста тоот

⁴ – Деед Эзн тиим юм зааҗана, – гиҗ Моше Израилин хамцана улст келв. –

⁵ Деед Эзнд бәрц бәртн. Эврәннь дурарн бәрц бәрхәр седҗәх күн Деед Эзнд алт, цаһан мөңг эс гиҗ улан мөңг,

⁶ көк, чисм улан болн улавр күрң утцд, нимгн олс эс гиҗ ямана ноос,

⁷ ширдсн хуцин арс болн нимглсн арс, акациян мод,

⁸ герлин гегәнд кех олив модна тос, түркх тосна төлә болн ута һарһлһна төлә сәәхн үнртә каңкнсн юмсуд,

⁹ оникс нертә чолуд болн үнтә чолуд кевд орулад теднәр заппу болн чееҗд бәрдг түңгрцг кеерүлх тоотсар бәрц бәртхә.

¹⁰ Тадна эрдмтә әмтн ирәд Деед Эзнә закч келсн тоотыг күцәтхә:

¹¹ өргә гер, терүнә бүркә болн терүн деерәһәр бүркә, товчлх бүтү, тулг бахнс болн көндлң модд, бахнс болн түшг,

¹² Бооцана хәәрцг болн ут модд, терүг хаах бүркә болн халхлх көшг,

¹³ ширә, терүнә ут модд болн савмуд, Деед Эзнә өмн тәвдг әрүн өдмг,

¹⁴ герлин гегә болн терүнд кергтә тоотыг, цөгц, герлин гегәнә тос,

¹⁵ күҗ уңһдах ширә болн терүнд кергтә ут модд, түркх тос болн ута һарһлһна күҗ, өргә герин үүднд көшг,

¹⁶ улан мөңгн термтә тәкл тәкдг орм, терүнә ут модд болн сав, ик сав тулһтаһинь,

¹⁷ хашан көшг, терүнә бахнс болн дорнь тәвх түшг, хашан үүднә көшг,

¹⁸ өргә герин бичкн һасн болн хашан эргндк көшг кехин төлә бичкн һасн, терүнә деесд,

¹⁹ әрүн бәәрнд мөрглһнә хувц – Ахарон гелңгин болн терүнә көвүдин әрүслгдсн хувцд кетхә.

²⁰ Тегәд Израилин хамцана улс кевтән Мошеһәс салҗ тарв.

²¹ Дәкәд күн болһн зүркн туссиг, Деед Эзнд бәрц бәрхәр седсән авч ирв. Тедн цугтан Харһлтын Шатрт, терүнд мөрглһнә болн әрүслсн хувцдын төлә кергтә юмс авч ирв.

²² Ирхәр седсн әмтн цугтан ирнә, залус болн гергд ке алтн кегдлмүд авч ирв: дегә, сиик, билцгүд, күзүнд зүүдг кеерүл. Эн алтыг Деед Эзнә өмн белг гиҗ өргв.

²³ Зәрмснь олдсн көк, чисм улан, улавр күрң утц, нимгн олс, ямана ноос, ширдсн хуцин арс болн нимглсн арс авч ирв.

²⁴ Деед Эзнд зәрмнь цаһан мөңг болн улан мөңг авч ирв. Кергт орулгдх олдсн акациян мод чигн бәрц бәрхәр авч ирв.

²⁵ Дамшлтта күүкд улс ээрәд көк, чисм улан, улавр күрң өңгтә утцд болн нимгн олс авч ирв.

²⁶ Талдан гергд ээрч чаддгнь, ээрхәр седдгнь ямана ноос ээрв.

²⁷ Хамцана һардачнр кевд орулх оникс чолуд болн үнтә чолуд теднәр заппу болн чееҗд өлгдг түңгрцг кеерүлхәр авч ирв.

²⁸ Тедн сән үнртә тос, бас олив модна тос герл өгхин төлә, түрклһнә авъяс күцәхәр, ута һарһхар авч ирцхәв.

²⁹ Тегәд Израилин келн-улсин залус болн гергд Мошеһәр дамҗад Деед Эзнә зааҗ келсн кергт орлцхар Бурхнд эврәннь седвәрәр белгән авч ирцхәв.

Өргә гер бәрх көдлмшчнриг шиидлһн

³⁰ Моше Израилин улст иигҗ келнә: – Медәд авчктн: Деед Эзн Бецалелиг йилһҗ авв (тер Йудан отгас Урин көвүн болн Хурин ач бәәҗ).

³¹ Терүг Бурхна Сәкүсәр дүүргв, цецн уха болн серл, медрл болн ямаран чигн керг күцәх дамшлт өгв.

³² Тегәд тер алтар, цаһан мөңгәр, улан мөңгәр көдлмш кедг эрдмтә болв.

³³ Тер кегдлд орулҗ тәвдг чолу керчҗ чадна, бас мод керчҗ ямаран чигн нәрн көдлмш кедг болв.

³⁴ Деед Эзн терүнд болн бас Ахисамахин көвүн Оголиавд – Дана отгас – талдан әмт сурһҗ чаддг эрдм өгв.

³⁵ Деед Эзн теднд керчдг, эд сиилвртәһәр некдг, зүсн-зүүл өңгтә көк, чисм улан, улавр күрң утцас болн нимгн олснас некдг, бас йирин эдәр кеҗ чаддг эрдмчнрин болн урн әмтнә эрдминь кевтнь үзүлв.