Нүүдл 33 - Хальмг келнд орчулсн Әрүн Бичлһс

¹ Деед Эзн Мошед келнә: – Египетәс дахулҗ һарһсн әмтнләһән йов эндәс. Абрахамин, Ицхакин болн Яковин хөөт үйнрт өгх болад андһар тәвсн һазр тал йовтн.

² Чини өмн Би Эврәннь элчиг йовулнав. Кананахныг, амореймүдиг, хетмүдиг, перизмүдиг, хивеймүдиг болн евүсмүдиг Би көөҗ һарһнав.

³ Элвг үсәр болн балар байн эн һазр тал йовтн! Болв Би таднла йовшгов, эс гиҗ Би тана буцлтас көлтә хаалһдтн тадниг алхув.

⁴ Эн чаңһар келсн үгмүд соңсад әмтн хәәкрәд уульцхав, бийдән кеердг юмсан зүүсн уга.

⁵ Деед Эзн Мошед келнә: – Израилин улст кел: тадн зүткә әмтнт, кемр Би таднла нег агчмд болвчн йовхлаг – тадниг алхув! Зүүсн кеерүлән тәәлтн. Би болхла тадниг яахитн хәләсүв.

⁶ (Тенд Хорив уулын өөр Израилин улс кеерүлән тәәләд дәкҗ зүүсн уга.)

Харһлтын Шатр

⁷ Тер цагас авн Моше бәәрнәс уухнд шатр тәвдг болв. Тер шатриг Харһлтын Шатр гиҗ нерәдв. Кемр кен чигн күүнд Деед Эзнәс сурх сурвр бәәхләг, Моше бәәрнәсн һарад Харһлтын Шатр тал оддг болв.

⁸ Терүг йовхлаг, цугтан эврәннь шатрин хаҗуд зогсад терүг Харһлтын Шатрт эс ортл хәләдг билә.

⁹ Зуг терүг орхлаг, бахна бәәдлтә үүлн бууһад Шатрин үүднд зогсдмн. Деед Эзн Мошелә күүнднә.

¹⁰ Бахна бәәдлтә үүл үзн, әмтн эврәннь шатрин үүднд түргүр ундмн.

¹¹ Деед Эзн Мошелә нүр харһлцҗ күүнднә – күн күүнлә күүндҗәх әдләр. Дарунь Моше бәәрн талан хәрү ирнә. Мошен баахн нөкд Навина көвүн Ешуа Шатрас һардго билә.

Моше болн Деед Эзнә туурмҗ

¹² Моше Деед Эзнд келнә: – Та эн әмтиг цааранднь дахулад йов гиҗ нанд закч келләт. Болв кениг нанла йовулхан келсн угат. Та намаг нерәрм меднәт, би Танд таасгдув гиҗ келләт.

¹³ Кемр тиим болхлаг, нанд Бийиннь хаалһан медүлхиг сурҗанав, Танд таасгддгар Таниг медх зөв өгтн. Эн әмтн – Тана улс болҗахиг сантн!

¹⁴ Деед Эзн иигҗ хәрү өгнә: – Би Эврән чамла йовнав, чамд түшг болнав.

¹⁵ Моше келнә: – Кемр Та маднла эс йовхлаг, мадниг эндәс һартха гиҗ бичә күчәр көөһәд бәәтн.

¹⁶ Би болн Тана эн улс Танд тааста болҗахин темдг ямаран? Зуг Та маднла йовҗах темдг! Энүгәрн Та мадниг һазр деерк талдан улсас йилһҗәнәт.

¹⁷ Деед Эзн иигҗ Мошед хәрү өгнә: – Би чини сурвриг күцәнәв, яһад гихлә чи Нанд таасгдҗанач, Би чамаг нерәрчнь меднәв.

¹⁸ – Нанд Эврәннь туурмҗан үзүлит! – гиҗ Моше сурна.

¹⁹ Деед Эзн үгән өгнә: – Нанд бәәсн тоотын сәәнинь чини өмн кенәв, чини өмн Яхве гидг нер заанав. Би хәәрлгдхәр седҗәх күүг хәәрлнәв. Би өр-өвч болхар седҗәхдән өр-өвч болнав.

²⁰ Болв чи Мини чирә хәләҗ чадшгоч. Намаг үзсн күн әмд үлдшго.

²¹ Энд орм бәәнә, Мини өөр. Энд уулын хад деер зогс.

²² Мини туурмҗ хаҗуһарм йовхла, Би чамаг эн хадын нүкнд бултулад Эврәннь һарарн хаанав. Давад йовхларн

²³ һаран авхув, чи Намаг ардасм үзхич, болв Мини чирәг үзшгоч.