Нүүдл 31 - Хальмг келнд орчулсн Әрүн Бичлһс

Өргә гер бәрх көдлмшчнр заалһн

¹ Деед Эзн Мошед келнә:

² – Хәлә: Би Йудьян отгас Бецалелиг – Урин көвүг, Хурин ачиг шүүҗ авув.

³ Терүг Бурхна Сәкүсәр дүүргв – терүнд цецн уха, серл, медрл болн ямаран чигн юм кедг чадмг эрдм өгүв.

⁴ Тегәд тер алтар, цаһан мөңгәр болн улан мөңгәр көдлмш кеҗ чадҗана.

⁵ Чолуг керчәд кевд орулҗ чадх, бас мод керчҗ чадх – ямаран чигн эрдмтә болх.

⁶ Тегәд би терүнд Дана отгин Ахисамахин көвүн Оголиавиг нөкд болтха гиһәд өгүв. Эрдмчнриг цугтаһинь эрдмтә кевүв. Тедн чамд Мини закч келсиг цугтаһинь күцәг:

⁷ Харһлтын Шатр, Бооцана хәәрцг, терүнә бүркәг болн Шатрт кергтә тоотынь,

⁸ ширә болн терүнә сав, цевр алтар кесн герлин гегән кергтә тооттаһан, күҗ уңһдалһна авъяс күцәх ширә,

⁹ тәкл тәкдг орм болн терүнд кергтә тоотнь, ик сав тулгтаһан,

¹⁰ гелңгин мөргүлд өмсх хувц – Ахарона әрүслсн хувц, терүнә көвүдин әрүслсн хувцд,

¹¹ бас түрклһнә авъяс кедг каңкнсн тос болн әрүн бәәрнд шатадг сән үнртә күҗ белдтхә. Тедн Мини келсәр цугинь күцәтхә.

Бемб өдр бәрх заквр

¹² Деед Эзн Мошед закч келнә:

¹³ – Израилин улс Мини бемб өдр тодлад бәртхә гиҗ теднд кел. Үйәс үйд долан хонгин бемб өдр Мини таднла кесн темдг. Би, Деед Эзн, тадниг әдслдгиг медҗ автн.

¹⁴ Бемб өдриг бәртн: тер өдр танд әрүн өдр. Тер өдриг эвдсн күн алгдх; бемб өдрлә көдлмш кесн күн эврәннь келн-улс дундасн уга кегдх.

¹⁵ Зурһан хонгтан көдлтхә, доладгч өдр – төвкнүн бәәлһнә бемб өдр, Деед Эзнә әрүслсн өдр. Бемб өдр көдлсн күн болһн алгдх йоста.

¹⁶ Израилин улс бемб өдриг үйәс үйд бәртхә – эннь мөңк бооцан.

¹⁷ Мини болн Израилин улсин хоорнд мөңкинд кесн тиим темдг. Яһад гихлә зурһан хонгт Деед Эзн теңгр болн һазр үүдәҗ, доладгч өдртән сулдан амрчасмн.

¹⁸ Тенд, Синай уул деер, Деед Эзн Мошелә күүндврән чиләхләрн, терүнд Бурхна һарар Бийинь бичсн Бооцана хойр хавтха чолуд өгнә.