Нүүдл 30 - Хальмг келнд орчулсн Әрүн Бичлһс

Күҗ уңһдадг ширә

¹ Акация моднас бәрцин ширә ке. Терүн деер каңкнсн үнртә күҗ шата.

² Тер ширә дөрвлҗн болтха, нег тоха утдан, нег тоха өргндән, өндртән хойр тоха болтха. Терүнә өврнь ширәлә хамдан нег кевәр ниилх йоста.

³ Дееркинь, хәврһинь болн өвринь цевр алтар буд, эргүләд алтн тасм ке.

⁴ Хойр алтн төөлг кеһәд тасм дорнь хәврһднь хад. Терүнд ут мод орулад ширәг өргәд йовдгар ке.

⁵ Тер ут моддыг акацияс кеһәд алтар буд.

⁶ Эн бәрцин ширә көшгин өмн тәв. Терүнә ард Бооцана хәәрцг бәәх. Хәәрцгин бүркән деер Би чамла харһхларн бәәхүв.

⁷ Ахарон эн ширә деер өрүн болһн цөгциг ясхларн, каңкнсн үнртә күҗ шататха.

⁸ Асхн болһн терүнд герл орулхларн бас шататха. Деед Эзнә өмн иим каңкнсн үнртә күҗ тадн таслвр угаһар үйәс үй күртл шатаҗатн.

⁹ Эн ширә деер талдан юм бичә уңһдатн, бичә шататн, өдмгәр бәрц бичә тәвтн, шалдрң юм бичә асхтн.

¹⁰ Җилд нег дәкҗ Ахарон бәрцин ширән өвр деер гемән хәрүллһнә авъяс күцәтхә. Җилд нег дәкҗ, үйәс үйд бәрцин ширәг цеврллһнә малын цусар гемән хәрүлх кергтә. Эннь Деед Эзнә әрүнәс әрүнь болҗана.

Өргә герт бәрц бәрлһн

¹¹ Деед Эзн Мошед келнә:

¹² – Израилин улсиг тоолад бичҗәсн цагла, күн болһн тоолврт орхларн Деед Эзнд бийиннь мөңгинь өгтхә. Тедниг тоолад бичхлә, шалтгла бичә харһтха гиҗәх юмн.

¹³ Күн болһн тоолврин кемлә әрүн бәәрнә шекелин өрәлинь өгтхә (нег шекель – 20 гера); эн өрәл шекель Деед Эзнд бәрц бәрлһн болҗана.

¹⁴ Хөртәһәсн авн күн болһн тоолврт орхларн, Деед Эзнд тиим бәрц бәрх йоста.

¹⁵ Кемр тадн Деед Эзнд бәрц бәрхәр, эн бәрцән бийиннь мөңгәр авч ирхләрн, өрәл шекеләс байн күн икәр, угатя күн бичкнәр бичә өгтхә.

¹⁶ Израилин улсас эн цаһан мөңг авад Харһлтын Шатрин көдлмшт орул. Эннь Деед Эзнә өмн Израилин улсин туск тоолвр, эннь тадна җирһлиг цаһан мөңг өгәд хулдҗ авлһн.

Уһалһна авъяс күцәдг улан мөңгн сав

¹⁷ Деед Эзн Мошед келнә:

¹⁸ – Уһалһна улан мөңгн ик сав ке болн дорнь улан мөңгн тулг ке. Терүг Харһлтын Шатрин болн тәкл тәклһнә ормин хоорнд тәвәд усар дүүрг.

¹⁹ Ахарон болн терүнә көвүд терүнәс һаран, көлән уһатха.

²⁰ Тедн Шатрт орхиннь өмн һаран, көлән уһах йоста, тедниг бичә үктхә гиһәд кегдҗәнә. Эврәннь мөргүл кехәр седәд тәклин орм тал өөрдхиннь өмн, һалын бәрцән Деед Эзнд шатаһад нерәдхләрн,

²¹ тедн һаран, көлән уһах йоста. Эс гиҗ тедн үкх. Эн зокалыг мөңкинд Ахарон болн терүнә хөөт үйнр кехмн, энүг үйәс үй күртл бәрх кергтә.

Түрклһнә тосн

²² Деед Эзн Мошед келнә:

²³ – Хамгин сән үнртә күҗ ав: 500 шекель наалддг мирр, үнртә корица хойр холван баһар – 250 шекель, сән үнртә хулс – 250 шекель,

²⁴ касси – 500 шекель (цугтан әрүн бәәрнә шекель), бас нег гин олив модна тос.

²⁵ Йир сәәнәр нәәрүләд кесн түрклһнә әрүн тос бел ке. Эннь әрүн тосн.

²⁶ Тер тосар Харһлтын Шатрт, Бооцана хәәрцгт,

²⁷ ширә болн ширә деер бәәх тоотд, герлин гегәнд кергтә тоотднь, күҗ уңһдадг ширәд түрк.

²⁸ Тәкл тәкдг ормиг болн терүнд кергтә тоотднь, ик савд, тулгднь тер тос түрк.

²⁹ Эдниг цугтаһинь әрүсл, тиигәд тер юмс әрүнәс әрүн юмс болх. Теднд күргсн тоот әрүн болх.

³⁰ Ахаронд болн көвүдтнь тос түрк – Мини гелңгүд болдгар әрүсл тедниг.

³¹ Израилин улст болхла кел: «Эн белдсн тосн танд үйәс үйд түркдг әрүн тосн болх.

³² Энүг талдан әмтнд түркҗ болшго. Бийиннь төлә тиим нәәрүлсн тос бичә кетн: тер тосн әрүн болҗана – таднд энтн әрүн болтха!

³³ Кемр кен чигн күн бийдән иим нәәрүлсн тос кехлә, эс гиҗ талдан күүнд түркхлә – үкх, эврәннь келн-улс дундас уга кегдх».

Уңһдалһна күҗ

³⁴ Деед Эзн Мошед закч келнә: – Каңкнсн үнртә цуг юмсудыг әдләр ав – бүчртә моддын салм, оникс, гальбан, цевр ладан болн цугинь әдләр.

³⁵ Теднәс шатах цевр әрүн күҗ сәәнәр ке, давсар амтл.

³⁶ Үүрмгәр үүлсн күҗиг Харһлтын Шатрт Бооцана хәәрцгин өмн тәв. Би чам тал тиигәрән ирәд бәәхүв. Эн күҗ таднд әрүнәс әрүн юмс болх.

³⁷ Тиим күҗ бийдән бичә кетн: Деед Эзнә әрүн юмс таднд болтха.

³⁸ Кемр кен чигн күн бийдән тиим күҗ кеһәд эврән киилхәр седхлә, тер күн эврәннь келн-улс дундас уга кегдх.