Нүүдл 29 - Хальмг келнд орчулсн Әрүн Бичлһс

Гелңгин нер зүүлһн

¹ Мини гелң болхин төлә тедниг әрүсләд иим юм күцәх кергтә. Эрмдг уга бүрү болн хойр хуц йилһҗ ав.

² Эс искәсн һуйр, олив тосар элдсн эс искәсн һуйр, олив тос түрксн эс искәсн нимгн һуйр ав. Эдн цугтан цаһан һуйрин үүрмгәр үүлсн буудяһас болһгдх йоста.

³ Цугтаһинь нег зембльд тәв. Тер земблиг авч ир, бүрүг болн хойр хуциг көөһәд авч ир.

⁴ Харһлтын Шатрин үүдн тал Ахарониг көвүдтәһинь дахулад авч ир. Тедниг усар уһа.

⁵ Ахаронд терүнә хувцинь өмск: киилг, заппу дор өмсдг хувцн, заппу болн чееҗ деер өмсдг түңгрцг. Терүг заппун бүсәр бүсл.

⁶ Ахарона толһаднь тахъя өмск, терүнднь әрүсллһнә титм зү.

⁷ Каңкнсн тос келһнә йовдл күцә: олив модна тос авад Ахарона толһад түрк.

⁸ Ахарона көвүдиг дахулҗ ирәд киилг өмск.

⁹ Ахаронд болн терүнә көвүдт бүс бүслһ, дәкәд теднә толһаст боодһа бо. Эн өдрәс болн мөңкинд гелң гисн нерн Ахаронд болн терүнә көвүдт өггдҗәнә. Тиигҗ чи теднәр гелң кеҗәнәч.

¹⁰ Харһлтын Шатр тал бүрү мал авч ир. Ахарон көвүдтәһән терүнә толһа деер һаран тәвтхә.

¹¹ Деед Эзнә нүүрт, Шатрин үүднә өмн, бүрүг ал,

¹² хурһан бүрүһин цуснд будад, терүгән тәклин өвртнь түрк. Үлдсн цусинь тәклин ормд асх.

¹³ Дәкәд бүрүһин дотрк өөкиг кевтнь авад, элкнә семҗнәснь керчҗ авад, хойр бөөринь өөктәһинь авад тәкл тәкдг ормд шата.

¹⁴ Бүрүһин махинь болн арсинь, цуг үлдлинь холд эҗго һазрт шата. Эннь килнцәс цеврллһнә бәрц.

¹⁵ Дәкәд нег хуц ав, Ахарон көвүдтәһән терүнә толһа деер һаран тәвтхә.

¹⁶ Хуциг алад тәкл тәкдг ормд эргүләд цусинь цац.

¹⁷ Хуцин махиг әңгләд керч. Терүнә дотринь, көлинь уһаһад толһа деернь болн махн деернь тәв.

¹⁸ Хуцин махиг бүклднь тәклин ормд шата. Эннь Деед Эзнд шатаҗах бәрц, уурнь йир сән тааста, Деед Эзнд һалын бәрц.

¹⁹ Хойрдгч хуциг авч ир, Ахарон көвүдтәһән терүнә толһа деер һаран тәвтхә.

²⁰ Хуциг ал. Хуцин цусар Ахарона болн терүнә көвүдин барун чикнә ашкиг, барун һарин эркәг болн барун көлин ик хурһиг хөөнә цусар буд. Тәкл тәкдг ормиг эргүләд цус цац.

²¹ Дарунь бәрцин ормас цус, түркх каңкнсн тос авад Ахарона хувцнд болн көвүдиннь хувцнд цац. Тиигҗ чи Ахарониг болн терүнә хувциг, Ахарона көвүдиг болн теднә хувцдиг әрүслхич.

²² Хуцин өөкинь болн сүүлинь, дотрк өөкинь, элкнә семҗнәснь, хойр бөөр өөктәһинь ав. Эн хуц нерәдлһнә бәрц бәрлһнд орҗасар барун ташаһасинь бас ав.

²³ Деед Эзнә өмн тәвәтә эс искәсн һуйрта савас нег өдмг ав, олив модна тоснд болһсн нег һуйр ав болн болһсн нег нимгн һуйр ав.

²⁴ Эдниг цугтаһинь Ахарона болн көвүдиннь һарт бәрүл, Деед Эзнә өмн белг кеһәд өрг.

²⁵ Теднә һарас эн тоотыг авад тәкл тәкҗәх юмсла хамднь тәклин ормд шата. Энүнә уурнь йир сән тааста Деед Эзнд, һалын бәрц Деед Эзнд.

²⁶ Хуцин өрчинь ав – Ахарона эврәннь нерәдҗәх бәрц – терүгәр белг кеһәд Деед Эзнә өмн өрг. Эннь чини хүв болх.

²⁷ Деед Эзнд өргсн өрч болн белг кесн таша – Ахарона болн терүнә көвүдин нерәдҗәх бәрц бәрсн тоотыг эс гиҗ белг кесн тоотыг чи әрүслх йостач.

²⁸ Эн бәрц Израилин улс Ахаронд болн терүнә көвүдт мөңкинд өгчәх хүвнь болҗана. (Эннь Израилин улсин эвцлһнә бәрцин әңгнь Деед Эзнд белгллһн болҗана.)

²⁹ Ахарона әрүлгдсн хувцд терүнә хөөт үйнрт өггдх: теднд тос түркәд, гелңд орулсн цагт тер хувцсиг өмсх.

³⁰ Ахарона хөөт үй терүнә хөөн гелң болад Харһлтын Шатрт әрүн бәәрнд керг күцәхләрн эн хувцсиг долан хонгтан өмстхә.

³¹ Хуцин мах авад – нерәдсн бәрциг – әрүн һазрт чан.

³² Ахарон көвүдтәһән эн махиг идтхә, дәкәд Харһлтын Шатрин үүднд зембльд бәәх өдмг идтхә.

³³ Тедн эврән бәрцән идх йоста. Тер хотыг гемән хәрүлсн цагтнь болн әрүсләд гелңгин нер авчахднь авч ирсмн. Талдан күн идшго хот: эннь әрүн.

³⁴ Кемр бәрц бәрсн махн болн өдмг өрүн күртл үлдхлә, үлдлинь цугтаһинь шата. Нег чигн күн тер хотас идшго юмн, яһад гихлә эн әрүн хот.

³⁵ Ахаронд болн терүнә көвүдт Мини келсиг кеҗ күцә. Долан хонгтан, өдр болһн тедниг гелңгин бәәдлд орул.

³⁶ Өдр болһн килнцәс цеврллһнә бәрц бәрәд бүрү алҗа. Эннь гемән хәрүллһн болҗана. Тиигҗ чи цеврллһнә авъяс болн гемән хәрүллһнә авъяс тәкл тәкдг ормин төлә күцәҗәнәч. Терүг әрүслхин төлә тос түрк.

³⁷ Долан хонгтан өдр болһн тәкл тәкдг ормиг әрүсл – тер орм әрүнәс әрүн болх. Терүнлә харһсн тоот әрүн болх.

Өдр болһн тәкл тәклһнә туск

³⁸ Эн тәкл тәкдг орм деер таслвр угаһар чини авч ирәд бәәх бәрцнь эн: өдр болһн нег җилә хойр хурһн.

³⁹ Негәрнь өрүнд, хойрдгчарнь асхнд бәрц бәр.

⁴⁰ Түрүн хурһнла арвна нег әңг ефән цаһан буудян һуйр авч ирәд бә. Терүг һарар шахсн олив модна нег дөрвнә гин тоснд элд. Нег дөрвнә гин әңг чаһриг ааһд кеһәд тәв.

⁴¹ Хойрдгч хурһар асхар бәрц бәр. Өрүһәр кеснлә әдл өдмг авч ир болн чаһр асхад тиигҗ ке. Эн сәәхн үнр Деед Эзнд тааста, Деед Эзнд һалын бәрц.

⁴² Иим шаталһиг тадн таслвр угаһар үйәс үй күртл Деед Эзнә өмн Харһлтын Шатрин үүднд кеҗәтн. Тенд Би таднла харһлт кехләрн, чамла күүндхләрн бәәхүв.

⁴³ Тенд Би Израилин улсла харһхларн бәәхүв. Тер орм Мини туурмҗар әрүслгдх.

⁴⁴ Би Харһлтын Шатриг болн тәкл тәкдг ормиг әрүслнәв, Ахарониг көвүдтәһинь әрүслнәв. Тедн Мини гелңгүд болдгар тиигҗ кенәв.

⁴⁵ Би Израилин улс дунд бәәхүв, теднә Бурхн болнав.

⁴⁶ Тедн медх – Би Деед Эзн – теднә Бурхн. Египетәс тедниг һарһҗ авад теднлә бәәхәр седсн Би, Деед Эзн – теднә Бурхн болҗанав!