Нүүдл 28 - Хальмг келнд орчулсн Әрүн Бичлһс

Гелңгүдин хувцн

¹ Израилин улсас эврәннь ах Ахарониг болн терүнә көвүдиг дууд. Тедн Мини шаҗна гелңгүд болтха – Ахарон болн терүнә көвүд Надав, Авиуд, Элиезер, Итамар.

² Эврәннь ах Ахаронд күндллһнә болн кееһин төлә әрүн чинртә хувц уйҗ өг.

³ Мини эрдм өгсн һартан өөтә әмтн Ахаронд эн хувцд белдтхә гиҗ зак. Терүг әрүсләд Мини гелң болдгар ке.

⁴ Тедн өрчд зүүдг түңгрцг, заппу, деерк хувцн, эрәтә киилг, тахъя болн бүс – чини ах Ахаронд болн терүнә көвүдт әрүн чинртә хувцд белдтхә. Тедн Мини гелңгүдт церглтхә.

⁵ Терүнә төлә алт, көк, чисм улан болн улавр күрң өңгтә утцд болн нимгн олс автха.

⁶ Заппуг алтн утцар, көк, чисм улан болн улавр күрң утцдар кетхә. Нимгн олсн эд деерәһәр зег некәд кетхә.

⁷ Хойр таласнь ээм деернь шидсн хойр зузан эд уйх кергтә.

⁸ Заппун бүс заппула әдл алтн утцар некәтә болх: көк, чисм улан болн улавр күрң утцдар, нимгн олсар бел кегдх. Тернь заппула нииләд нег бәәдлтә болх йоста.

⁹ Хойр оникс чолу авад деернь Израилин көвүдин нерд сииләд бич.

¹⁰ Зурһан нер нег чолун деер, зурһан нер талдан чолун деер ахнрас экләд бич.

¹¹ Тер чолуд деер Израилин көвүдин нерд сииләд бичтхә, тегәд чолу керчдг күн тамһ керчдмн. Тер чолудыг алтн эрәтә кевд орул.

¹² Тедниг заппун ээм деерк ширсн хойр эдт зү; тер чолуд Израилин көвүдиг санулад бәәх. Ахарон ээм деерән, Деед Эзнә өмн, теднә нердиг тодлҗ йовтха.

¹³ Алтар эрәтә кев ке,

¹⁴ цевр алтнас эрчмтә бүчин бәәдлтә хойр цев ке. Тер цевиг кевд өлг.

¹⁵ Зарһ кехин төлә чееҗ деерән өлгдг түңгрцг ке. Терүг заппу дуралһад ке – алтн утцар, көк, чисм улан, улавр күрң болн нимгн олсн эд деерәһәр зег некәд ке.

¹⁶ Чееҗ деер өлгдг түңгрцг дөрвлҗн болтха, утдан нег сөм болн өргндән нег сөм, эдинь хойр эвкәтә болг.

¹⁷ Терүн деер үнтә чолу углхин төлә дөрвн давхр хотхр орм һарһ. Түрүңк давхртнь – сердолик, топаз, берилл;

¹⁸ хойрдгч давхртнь – бирюза, сапфир, изумруд,

¹⁹ һурвдгчднь – гиацинт, агат, аметист;

²⁰ дөрвдгчднь – хризолит, оникс, яшма. Тедн цугтан эрәтә алтн кевд орулгдх йоста.

²¹ Израилин көвүдин нертә арвн хойр чолун болтха: чолун болһнд, тамһд бәәснлә әдләр, арвн хойр отгин негнәннь нерн керчгдәд кегдг.

²² Чееҗ деер өлгдг түңгрцгт цевр алтар эрчмтә бүчин бәәдлтә цев ке.

²³ Хойр алтн билцг кеһәд түңгрцгин өнцгт өлг,

²⁴ тедниг хойр алтн цевәр негдүл

²⁵ хойр кевд орул, тер кесн кевән заппун ээм деерк ширсн хойр эдт өмн бийәснь өлг.

²⁶ Бас хойр алтн билцг кеһәд чееҗд өлгдг түңгрцгин хойр өнцгин дотраснь заппуд наалддг бийәснь өлг.

²⁷ Бас хойр алтн билцг ке. Тедниг ээм деерк ширсн хойр эдин өмн бийднь дораһар өлг – заппун бүс деер уйгдсна ормд.

²⁸ Тер билцгүд хоорндан заппун билцгүдлә көк бүчәр келкәтә болг. Заппун бүс деер бәәх чееҗд өлгәтә түңгрцг заппуһас ундгоһар ке.

²⁹ Ахарон әрүн бәәрнд орхларн чееҗ деерк түңгрцгтән Израилин көвүдин нерд бәртхә. Тернь Деед Эзнә өмн оньдинд теднә туск тодлвр болх.

³⁰ Чееҗд өлгәтә зарһин түңгрцгт урим болн туммим тәв: тедн Ахарон Деед Эзнә өмн зогсхла, чееҗ деернь бәәх йоста. Ахарон Деед Эзнә өмн зогсхларн Израилин улсин зарһин темдг оньдинд чееҗ деерән бәртхә.

³¹ Заппу дор өмсдг хувц нек, терүг мел көк утцар ке.

³² Терүнд толһа багтдг орм бәәх йоста. Захарнь дәәчнрин хувцнла әдләр, деерк хувцн шуурдгоһар батар уйх кергтә.

³³ Дора бийдк захар көк, чисм улан, улавр күрң утцдар гранатын темснә бәәдлтә долдас ке. Тедн дунд алтн хоңхс өлг.

³⁴ Тер алтн хоңхсиг болн гранатын темсдиг деерк хувцна дора захар селгәләд өлг.

³⁵ Ахарон эн деерк хувциг мөргүлин көдлмш кехләрн өмстхә. Терүг Деед Эзн тал әрүн бәәрнд орхлаг болн тендәс һархлаг хоңхин ә соңсгдх йоста. Тегәд тер үкшго.

³⁶ Цевр алтнас темдг ке, терүн деер тамһд бәәснлә әдләр иим үгмүд керчәд бич: «ДЕЕД ЭЗНӘ ӘРҮН ТЕМДГ».

^37-38 Тер темдгиг тахъян өмн бийднь Ахарона маңна тус көк бүчәр бо. Ахарон әрүн белгт учрх эндүсиг кевтнь даах, Израилин улсин цуг әрүн оруг даах. Деед Эзнд тернь таасгддгар алтн темдг Ахарона маңнад оньдинд бәәх йоста.

³⁹ Ахаронд нимгн олсар эрәтә киилг гүрҗ өг, нәрхн олсар терүнд тахъя кеҗ өг, олн өңгтә бүс гүрҗ өг.

⁴⁰ Ахарона көвүдт киилгүд, бүс болн толһан боодһас күндллһнә болн кееһин төлә гүрҗ өг.

⁴¹ Эврәннь ах Ахаронд болн терүнә көвүдт эн хувцд өмск. Ахаронд болн терүнә көвүдт оливин тос түрк. Тедниг гелңгин номд орулад әрүсл. Тедн Мини гелңгүд болх.

⁴² Олс эдәр теднд белкүснәс өвдгт күрдг шалвр уйҗ өг, чир нүцкн бичә үзгдтхә.

⁴³ Ахарон болн терүнә көвүд Харһлтын Шатрт орхларн, дәкәд тәкл тәкдг орм тал өөрдәд, әрүн бәәрнд мөргүл кехләрн тиим хувц өмсх йоста. Тегәд тедн бурута болшго, үкшго. Эннь Ахаронд болн терүнә үйнрт мөңк зокал.