Нүүдл 27 - Хальмг келнд орчулсн Әрүн Бичлһс

Тәкл тәкдг орм

¹ Акацияс тәкл тәкдг бәәр ке. Тер дөрвлҗн болг – утдан тавн тоха, өргндән бас тавн тоха, өндртән һурвн тоха болтха.

² Дөрвн өнцгтнь өвр ке – тернь бәәрнлә хамдан нег кевәр ниилх йоста. Терүг кевтнь улан мөңгәр буд.

³ Үмс һарһдг сав ке, күрз, цус авдг сав, мах һарһдг серә болн һал һарһдг сав. Бәәрнд кергтә тоотыг цугтаһинь улан мөңгәр ке.

⁴ Тәкл тәкх бәәрнд улан мөңгәр терм ке. Терүнә дөрвн өнцгтнь дөрвн улан мөңгн төөлг хад.

⁵ Тәклин ормин тал дундаһар эргүләд терм батлад тәв.

⁶ Тәклин ормд акацияс улан мөңгәр будсн ут модд ке.

⁷ Кемр терүг талдан ормд өргҗ тәвхәр седхлә, тер ут модд хәврһднь бәәх төөлгт орулгдх.

⁸ Тәклин бәәриг көндә болдгар харһасар ке. Терүг чамд уул деер үзүлсн бәәдлтәһәр кетхә.

Өргә герин хаша

⁹ Өргә гериг эргүләд хашал. Өмн үзгәс хашан утднь нимгн олсар кесн көшг 100 тоха болҗ

¹⁰ 20 бахнд өлггдх йоста. Бахнс дор 20 улан мөңгн түшг кергтә; бахнсин дегәснь болн ниилврнь цаһан мөңгн болх йоста.

¹¹ Ар үзгәснь хашан утднь бас утарн 100 тоха көшг 20 бахнд өлггдх йоста. Бахнс дор 20 улан мөңгн түшг тәвгдх; дегәс болн ниилвринь цаһан мөңгәр кетн.

¹² Барун үзгәснь хашан өргнднь 50 тоха көшг 10 бахнст өлгәтә болх йоста. Бахнс дор 10 түшг кергтә.

¹³ Зүн үзг таласн өргнәрн хаша 50 тоха болх йоста.

¹⁴ Үүднәс нег бий талнь утдан 15 тоха көшг 3 бахнд өлгх кергтә. Тедн дор 3 түшг кергтә.

¹⁵ Талдан таласнь утдан 15 тоха көшгиг 3 бахнст өлгх кергтә. Тедн дор 3 түшг тәвх.

¹⁶ Ик үүднд утдан 20 тоха олн зүсн өңгтә көшг көк, чисм улан болн улавр күрң утцдар, нимгн олсар гүрҗ ав. Ик үүдн 4 бахнта болх, тедн дор 4 түшг кергтә.

¹⁷ Ниилвр болн дегәс цуг бахнс деер цаһан мөңгн болх йоста, теднә түшгнь улан мөңгн.

¹⁸ Хаша утдан 100 тоха, өргндән – 50 тоха. Нимгн олсар кесн көшг өндртән 5 тоха болх. Бахнсин түшг улан мөңгн болх йоста.

¹⁹ Өргә герин кергтә тоотнь, терүнә бичкн һасн болн хаша эргүлҗ өлгх көшгин бичкн һасн улан мөңгн болх йоста.

Герлин гегәнә тосн

²⁰ Израилин улс чамд һарар шахад кесн оливин цевр тос герлин гегәнд авч иртхә гиҗ зак. Терүн деер кезә чигн зул шатад бәәтхә.

²¹ Ахарон болн терүнә көвүд асхнас авн өрүн күртл шатҗах зул Деед Эзнә өмн Харһлтын Шатрт көшгин өмн тәвтхә. Терүнә ард Бооцана хәәрцг бәәдмн. Эннь Израилин улст отгас отг һатлҗ бәрх мөңк зокал.