Нүүдл 26 - Хальмг келнд орчулсн Әрүн Бичлһс

Өргә гер

¹ Нәрхн олсар, көк, чисм улан болн улавр күрң утцдар арвн некмр эд өргә герт некәд бел ке; тедн деер керүбмүд некәтә болх йоста.

² Некмр эд утдан 28 тоха, өргндән 4 тоха болх йоста. Цугтан тедн нег кемҗәтә болхмн.

³ Тавн некмр эд хамдан уята нег тасрха болг, талдан 5 тасрхань бас хамдан уята болг.

⁴ Захин нег тасрха некмр эдин утднь цеңкр бүтүс ке, тиим бүтүс талдан тасрхасин утднь ке.

⁵ Захин некмр эдин нег тасрхаднь 50 бүтү бәәх йоста, 50 бүтү талдан захин некмр эдин тасрхад уй. Тер бүтүс нег-негнәннь тус бәәх йоста.

⁶ Тәвн алтн дегә кеһәд хойр тасрхаг негдүләд өргә гер ке.

⁷ Ямана ноосар 11 некмр эд кеһәд өргә гер бүркх кергтә болх.

⁸ Некмр эд утдан 30 тоха, өргндән 4 тоха болх йоста; цугтан нег кемҗәтәһәр ке.

⁹ Тавн тасрхаһинь хамднь уй, наадк зурһан тасрхаһинь бас хамднь уй (зурһадгчинь әдлцүләд өрәләр эвк – тернь үүдн деер унҗулад өлггдх.)

¹⁰ Захин некмр эдин нег тасрхан утднь 50 бүтү уй, талдан некмр эдин тасрхан утднь бас тәвн бүтү ке.

¹¹ Тәвн улан мөңгн дегә товч ке, тедниг бүтүд орулад хойр тасрхаг негдүләд нег бүркә болдгар батл.

¹² Бүркән утас үлү һарснь (өрәл некмр эд) өргә герин ардк эрстнь ирлцх йоста,

¹³ бүркән утас үлү һарсарнь (нег тоха нег бийәснь, нег тоха талдан бийәснь) – өргә гериг хәврһәснь кевтнь бүркгддгәр ке.

¹⁴ Деерәснь хуцин будсн арсар бүркдгәр кех кергтә, терүн деегәр нимглсн арсар бүркх.

¹⁵ Өргә герт акация модна деерәс дорагшан татгдсн тулг болх бахнс ке:

¹⁶ бахн болһн утдан 10 тоха болн өргндән күсдундур тоха,

¹⁷ нег-негнь арата хойр модар келкәтә болх. Өргә герин тулг бахн цугтан тиим бәәдлтә болх йоста.

¹⁸ Өмн үзгин эрст 20 бахн ке,

¹⁹ теднә дор 40 цаһан мөңгн ул ке – бахн болһнд хошаһад тулх ул, бахна хойр аранд тулг болх.

²⁰ Тиим бәәдлтәһәр өргә герин хойрдгч ар үзгин эрст 20 бахн ке

²¹ болн 40 цаһан мөңгн ул – бахн болһнд хошаһад тулгдх ул.

²² Ардк, өргә герин барун үзгин эрст 6 тулг бахн ке.

²³ Ардк өнцгтнь бас хойр тулг бахн ке.

²⁴ Теднь дорасн хойр әңглсн болх йоста, деерәсн болхла (түрүн төөлг бәәх ормас) бүтн болх. Тиим тулг бахнс хойр болхмн, өнцг болһнд неҗәһәд.

²⁵ Эн 8 тулг бахнд 16 цаһан мөңгн тулгдх ул кергтә – бахн болһнд хошаһад ул.

²⁶ Акацияс көндлң мод ке: тавнь – өргә герин нег эрсин утднь бахнс залһх,

²⁷ тавнь – өргә герин хойрдгч эрсин утднь залһх болн тавнь – терүнә ардк, барун эрсәс.

²⁸ Тал дунд бәәх көндлң модн эрсин нег захас талдан зах күртл негдүлх юмн.

²⁹ Тулг бахнсиг алтар буд, көндлң модыг батлхин төлә терүнд алтн төөлг тәв, дәкәд көндлң моддыг алтар буд.

³⁰ Өргә гериг уул деер чамд үзүлсн зурала әдләр өндәлһ.

³¹ Халхлх шишлң көшгиг көк, чисм улан болн улавр күрң утцдар, нимгн олсар гүр; терүн деер керүбмүд некәтә болтха.

³² Акацияс кесн алтар будата алтн дегәтә дөрвн бахн деер терүг өлг. Тер бахнст дөрвн цаһан мөңгн түшг кергтә.

³³ Көшгиг дегәд өлг. Терүнә ард Бооцана хәәрцг тәв. Эн көшг әрүн бәәриг хамгин әрүн бәәрнәс салһх.

³⁴ Хамгин әрүн бәәрнә Бооцана хәәрцг деер бүркәг тәв.

³⁵ Көшгин өмн ширә тәв, ширән тус герлин гегә орул. Герлин гегән өргә герин өмн үзгин эрсин хаҗуд бәәх йоста, ширә – ар үзг тал.

³⁶ Өргә герин үүдинь хаах көшг ке. Көшг олн зүсн өңгтә болг – көк, чисм улан, улавр күрң утцдта болн нимгн олсар кегддг.

³⁷ Көшг өлгх алтар будсн тавн бахн акацияс ке. Тедн алтн дегәстә болг. Бахнсин тавн түшгинь улан мөңгәр цутх.