Нүүдл 25 - Хальмг келнд орчулсн Әрүн Бичлһс

Өргә гер тосхлһна бәрц бәрлһн

¹ Деед Эзн Мошед келнә:

² – Израилин улс Нанд бәрц бәртхә, күн болһнас седкләсн өгчәх бәрцинь автн.

³ Иим бәрц цуглулҗ автн: алт, цаһан мөңг, улан мөңг,

⁴ көк, чисм улан болн улавр күрң утцд, нимгн олс болн ямана ноос,

⁵ хуцин ширдсн арс болн нимгләд кесн арс, акация мод,

⁶ герлин гегәнд олив модна тос, сән үнртә тос келһн болн күҗ уңһдалһн,

⁷ кевд орулҗ тәвх оникс чолу болн үнтә чолуд. Теднәр әрүн кергин төлә бәәдг заппу болн чееҗд өлгдг түңгрцг кеерүлхин төлә цуглултн.

⁸ Израилин улс тедн дунд бәәх дүңгә әрүн бәәр Нанд бәрҗ өгтхә.

⁹ Чамд Би үзүлснлә әдләр тиим бәәр – өргә гер болн дотрнь бәәх тоотыг Нанд кеҗ өгтн.

Деед Эзнә Бооцана хәәрцг

¹⁰ Акация модар хәәрцг ке: утдан хойр дундур тоха, өргндән күсдундур, өндртән бас күсдундур тоха.

¹¹ Дотраснь, һазаһаснь цевр алтар буд, захарнь алтн тасм кеһәд буд.

¹² Дөрвн алтн төөлг кеһәд хәәрцгин дөрвн өнцгтнь батл: хойр төөлг нег бийәснь, хойр төөлг талдан бийәснь.

¹³ Акацияс ут мод кеһәд алтар буд,

¹⁴ хәәрцгин хойр таласнь тер төөлгүдт ут модд орул. Терүг ут модар авч йовдгар ке.

¹⁵ Тер ут модд кезә чигн хәәрцгин төөлгд орулгдсн бәәх йоста. Терүнәс ут модыг һарһҗ авдмн биш.

¹⁶ Хәәрцгт Бооцана хавтха чолуд тәвхич, Би чамд терүг бәрүлнәв.

¹⁷ Хәәрцгт цевр алтар утдан хойр дундур тоха, өргндән күсдундур тоха бүркә ке.

¹⁸ Бүркәһин көвәһәрнь хойр керүб алтн сиилвртәһәр ке:

¹⁹ негинь нег захаснь, хойрдгчинь хойрдгч захаснь. Тедн бүркәтә хамдан нег бәәдлтә болх йоста.

²⁰ Чирәһәрн нег-негнәннь өмн бүркәһән хәләһәд зогсад, бүркә деер далваган деләд бәәхмн.

²¹ Бүркәһиг хәәрцг деер тәв. Хәәрцг дотр Бооцана хавтха чолуд тәв. Терүг Би чамд бәрүлнәв.

²² Тенд, Бооцана хәәрцгин бүркә деер, хойр керүбин хоорнд чамла харһхларн Би бәәхүв. Израилин улст чамар дамҗад Эврәннь заавран теднд өгхүв.

Әрүн өдмг тәвдг ширә

²³ Акация модар утднь хойр тоха, өргнднь нег тоха, өндртнь күсдундур тоха болх ширә ке.

²⁴ Терүг цевр алтар будад, эргүләд алтн тасм ке.

²⁵ Ширән көвәһәр өндртнь альхн дүңгә рамк ке, тер рамкиг эргүләд алтн тасм ке.

²⁶ Дөрвн алтн төөлг кеһәд ширән дөрвн өнцгт тулһ талнь өлг.

²⁷ Төөлгүдиг рамк тал өөрдүләд тәвх кергтә. Терүнд ут модд тәвгдх, терүгәр кергтә цагт ширәг ормаснь талдан ормд тәвҗ болх.

²⁸ Ширә өргх ут моддыг акацияс кеһәд алтар буд.

²⁹ Тәрлкс болн шанһс цевр алтар ке. Шалдрң юм кехин төлә буһшс болн ааһс бас цевр алтар ке.

³⁰ Эн ширә деер чи оньдинд әрүн өдмг тәвх йостач. Тер өдмг Мини өмн бәәх.

Өргә герин герлин гегән

³¹ Цевр алтар герлин гегә сииләд ке. Терүнә һол моднь, ац талкнь болн үйәрн – йоралнь болн делвнь – нег кевтәһәр ниилх йоста.

³² Терүнд зурһан ац бәәх йоста: һурвнь нег бийәснь, һурвнь талдан бийәснь.

³³ Зурһан ац болһнднь һурваһад үй миндаль модна цецгин бәәдлтә. Терүнд йорал болн делвс бәәх.

³⁴ Болв көл деернь миндаль модна бәәдлтә дөрвн цецг, дәкәд йорал болн делвс бәәдмн.

³⁵ Түрүн хойр ац дор – үйин йорал, хойрдгч хойр ац дор – үйин йорал, һурвдгч хойр ац дор – үйин йорал; иим кевәр герлин гегәнә цуг зурһан ацмуд дор бәәтхә.

³⁶ Үйин йорал болн ацмуд нег кевәр герлин гегәнлә ниилх йоста; цугтан цевр алтар сиилгдх.

³⁷ Долан цөгц кеһәд герлин гегән деер тәв. Теднә өмн бийднь герл өгх.

³⁸ Цөгцин һол бәрдг чимкүр болн хавтха сав цевр алтар кегдх йоста.

³⁹ Герлин гегә болн терүнд туста тоот кехд нег талант цевр алт өг.

⁴⁰ Хәлә, чамд уул деер үзүлснлә әдләр ке.