Нүүдл 24 - Хальмг келнд орчулсн Әрүн Бичлһс

Бурхн олн-әмтнлә бооца келһн

¹ Деед Эзн Мошед келнә: – Деед Эзн тал һар, бийләһән Ахарониг, Надавиг, Авиудыг болн Израилин 70 медәтиг ав. Деед Эзнд холас мөргтн.

² Болв Деед Эзн тал Моше һанцарн өөрдтхә! Тедн Деед Эзн тал өөрдшго юмн. Олн-әмтн уул деер һаршго юмн.

³ Моше олн-әмтн тал ирәд Деед Эзнә келсиг кевтнь келнә. Дәкәд закадыг кевтнь үгәрн келҗ өгнә. Олн-әмтн цугтан нег дууһар хәрү өгнә: – Бидн Деед Эзнә келсиг күцәхвидн.

⁴ Моше Деед Эзнә келсиг цугтаһинь бичәд авна. Өрүнднь уулын дор тәкл тәкдг орм босхад Израилин отгудын тооһар арвн хойр чолун бахн тәвнә.

⁵ Израилин баһ наста көвүдиг тер илгәнә. Тедн бүрүс авч ирәд Деед Эзнд шаталһна бәрц болн эвцлһнә бәрцәр тәкл тәкнә.

⁶ Моше алгдсн малын цусна өрәлинь савд хураҗ авна, цусна наадк өрәлинь тәклин ормд цацна,

⁷ олн-әмтнд Бооцана әрүн бичг умшҗ өгнә. Олн-әмтн келнә: – Бидн Деед Эзнә келсиг цугтаһинь күцәхвидн, соңсхврта болхвидн.

⁸ Тиигхлә Моше олн-әмтнд тәклин цус цацад келнә: – Деед Эзн таднла бооца кесн цусн эн. Терүнә келсн үг – бооцана үгцән болҗана.

⁹ Терүнә дару Моше, Ахарон, Надав, Авиуд болн Израилин 70 медәт уул деер һарцхав.

¹⁰ Тенд тедн Израилин Бурхиг үзцхәв. Терүнә көл дор сапфирар кесн дендр теңгр мет цевр бәәдлтә болҗ медгднә.

¹¹ Бурхн Израилин һардачнриг көндәсн уга: тедн Бурхиг үзв, тегәд хот идв, уув.

Моше Синай уул деер һарна

¹² Деед Эзн Мошед келнә: – Нан тал уул деер һар, тенд үлд. Би чамд Закан болн зааврмуд бичгдсн хавтха чолуд өгнәв. Терүг Би эн олн-әмт сурһхар бичләв.

¹³ Моше бийиннь дөң болдг Ешуата хамдан Бурхна уул деер һарв.

¹⁴ – Мадниг хәрү иртл энд бәәҗәтн, – гиҗ Моше медәтнрт келв. – Таднла Ахарон болн Ор үлдх. Кемр кергтә болхла теднд келтн.

¹⁵ Моше уул деер һарна. Үүлн уулыг бүркнә.

¹⁶ Тегәд Деед Эзнә туурмҗ Синай уулыг бүркнә. Зурһан хонгтан уулыг үүлн бүркҗәв, болв доладгч өдртнь үүлнәс Деед Эзн Мошег дуудв.

¹⁷ Уулын орад шатчах герлтә заль мет Деед Эзнә туурмҗ Израилин улсин нүднд үзгдв.

¹⁸ Моше үүлнд орад, уул деер һарад, тенд 40 өдр, 40 сө бәәв.