Нүүдл 23 - Хальмг келнд орчулсн Әрүн Бичлһс

Чик йовдлын тускар

¹ Худл үг бичә тарха. Зөв уга худл герчллһнд бичә дөң бол.

² Зөв уга кергт бичә олн кү дах. Зарһд орхларн олн-әмтнд таасгдхар бичә үнниг оңдарул.

³ Зарһ болхла угатя күүнә түрү бәәдлднь бичә доталхар сед.

⁴ Кемр чи дәәснәннь геедрсн бухиг эс гиҗ элҗгниг үзхләрн тедниг тууһад эзнднь күрг.

⁵ Кемр һазр деер унсн чини дәәснә ацата элҗгн үзхләрн, чи терүг бичә тиигҗ үлдә. Терүнә ацаһинь буулһ.

⁶ Бийиннь угатя ах-дүүһин күнд учринь тәәлхләрн, чикәр ке.

⁷ Буру уга болн чик седклтә күүг алхар, зөрц, худлахар шиидҗәхиг бичә дөңн. Тегәд Би тиим хар саната күүг харсшгов!

⁸ Авлһ бичә ав. Авлһ нүдтә күүг сохр кенә, үнн юмиг хаҗилһнә.

⁹ Нутган соляд ирсн әмтиг бичә шахад бә. Талын һазрт яһҗ бәәдгиг тадн эврән меднәт. Египетд тадн нүүдлин улс биләт.

Амрлһна бәәдлин закан

¹⁰ Зурһан җилдән эврәннь һазрт тәрә тәрәд, терүнә урһцинь цуглулад авча,

¹¹ доладгч җилдән тер һазриг хаһллго үлдә. Урһцин үлдлиг чини улсин угатя әмтн идтхә. Кемр урһцас юмн үлдхлә, зерлг аңгуд идтхә. Тиим кевәр эврәннь уста үзмән болн олив моддан хәлә.

¹² Зурһан хонгтан көдл. Доладгч өдр чамд амрлһна өдр болх. Тер өдр чини цар болн элҗгн амртха. Чини ялч гергнә көвүн болн нүүҗ ирсн күн санаһан автха.

¹³ Мини келсиг цугтаһинь күцә. Талдан бурхдын нер бичә дуудтн: чини амнас теднә тускар бичә соңсгдтха!

Җил болһн болдг һурвн нәр

¹⁴ Җилд һурв дәкҗ Мини нәр ке.

¹⁵ Эс искәсн һуйрин нәр ке: Мини заасар долан хонгтан эс искәсн һуйриг кергтә цагтнь – авив сард – ид. Тиигхд Египетәс чи нүүҗ һарлач. Нег чигн күн Мини өмн хоосн һарта һарч иршго юмн!

¹⁶ Эврәннь тәрсн тәрәнә түрүн урһцин хадлһна нәр ке. Темс хуралһна нәәриг җилин чилгчәр урһцан кевтнь цуглулҗ авхларн ке.

¹⁷ Җилд һурв дәкҗ залус цугтан Бурхна – Деед Эзнә – өмн үзгдх йоста.

¹⁸ Нанд тәкл тәкхлә искәсн өдмг деер цуснь бичә асхртха. Мини нәәрин тәклин малын тосн-өөкинь өрүн күртл бичә үлдә.

¹⁹ Чини һазрин түрүн урһцас Деед Эзнд, эврәннь Бурхнд, мөргдг герт орулҗ авч ир. Ямана ишкиг экиннь үснд бичә чан.

Израилин улс мандг Деед Эзнә элч

²⁰ Хәләтн, Би тадна өмн тадниг мандг элчән илгәҗәнәв. Тер тадниг хаалһд хәләҗ йовх, дәкәд таднд гиһәд Мини белдсн ормд авч одх.

²¹ Терүнд оньган өгтн, терүг соңстн, бичә бурушатн. Тадна закрлһ авдгог тер хәләшго, яһад гихлә терүнд Мини нерн бәәнә.

²² Кемр тадн терүг соңсад, Мини келсиг кевтнь күцәһәд бәәхлә, тиигхлә Би тадна дәәснә дәәсн болхув, тадна өшәтнә өшәтн болхув.

²³ Мини илгәсн тадниг мандг элч тадна өмн йовх. Тер тадниг амореймүд, хетмүд, перизмүд, кананахмуд, хивеймүд, евүсмүд тал авч одх. Би тер келн-әмтиг уга кеһәд алхв.

²⁴ Тадн болхла теднә бурхдт мөргәд бичә шүттн, бичә тер улсин авъясар бәәтн. Теднә бурхдынь хамхлтн, теднә әрүн чолун бахнсинь уга кетн!

²⁵ Тадна Бурхнд, Деед Эзнд, шүттн. Тегәд Би тадна өдмгиг болн тадна усиг әдслнәв, тадниг гемәс сулдхнав.

²⁶ Тегәд тадна һазрт зуурм үрд һардган уурх, үр-садн эс һарһлһн уга болх. Би тадна җирһлин өдрмүдиг дүүрң бәәдлтә кенәв.

²⁷ Бийиннь әәмшгән Би тадна өмн йовулнав. Тадна хаалһд Би келн-әмтиг кевтнь үүмүлнәв, тадна хортыг өмнәстн һарад зулдгар кесүв.

²⁸ Тадна өмн шар зөгин баг нисдгәр йовулсув. Тедн хивеймүдиг, кананахныг болн хетмүдиг таднас көөх.

²⁹ Болв тедниг тер дарунь Би көөшгов, нег җилин эргцд биш: эс гиҗ һазр хоосдад тадниг дәврх зерлг аңгуд дегд олн болх.

³⁰ Би эн келн-улсиг адһл уга көөхүв. Тадниг тооһарн өсәд, орн-нутгиг кевтнь эзләд автл адһхшув.

³¹ Тадна эзлх һазрин меҗәс Улан теңгс болн Пилистин теңгс, көдә һазр болн Епрат һол болх. Би эн һазрар бәәх цуг әмтиг тадна һарт бәрүлнәв, тегәд тадн тедниг көөһәд йовулхит.

³² Теднлә болн теднә бурхдла бооца бичә кетн!

³³ Эн келн-әмтн тадна һазрт бәәшго йоста. Эс гиҗ тедн тадниг Мини өмнәс килнц һарһулдг дасхх. Теднә бурхдт цергллһн тадниг мекллһн болх.