Нүүдл 22 - Хальмг келнд орчулсн Әрүн Бичлһс

Зөөрән харслһна тускар

¹ Кемр кен чигн күн бух эс гиҗ хө хулхалҗ авад алхла, эс гиҗ хулдхла, тиигхлә тер күн нег бухин ормд тавн бух, нег хөөнә ормд дөрвн хө өгх йоста.

² (Кемр хулхач герин эрсиг хамхлхар эвдҗәсн кемд бәргдәд алгдсн болхла, алсн күн бурута биш.

³ Болв тиим юмн нарн һарсна хөөн учрсн болхла, алсн күн бурута болҗана.) Кемр хулхачд ялынь өгдг юмн уга болхлаг, тиигхлә хулха кеснднь терүг бийинь хулдад ялч кетхә.

⁴ Болв кемр хулхалгдсн малыг әмдәр олҗ авхла – бух болну, элҗгн эс гиҗ хөн болну – хулхач нег малын ормд хойр мал өгх йоста.

⁵ Кемр кен чигн күн талдан күүнә тәрәһинь эс гиҗ уста үзмин тәрәнднь мал көөҗ орулад үрәхлә, тер күн үрәсн тәрәнә хамгин сән урһцин үнәр ялынь даах йоста.

⁶ Кемр шатасн һал бүчртә моднд орад, дәкәд овалһата өвсиг, урһҗах буудяг эс гиҗ тәрәнә һазриг кевтнь түүмрдхлә, һал орулсн күн ялынь өгх йоста.

⁷ Кемр нег күн талдан күүнд цаһан мөңг эс гиҗ хувцан хадһлтха гиһәд өгсн болхла, тер юмсиг гертәснь хулха авчкхла, хулхач бәргдхлә, тиигхлә хулхач ялынь хойр холванд үлүһәр өгх йоста.

⁸ Хулхач эс бәргдхлә, күүнә юмс хадһлхар авсн күн Бурхнд мөргдг орм тал ирәд эс авсан лавлад бийән цеврлх йоста.

⁹ Бухин, элҗгнә, хөөнә, хувцна туск цуг учрсн күчр йовдл – ямаран чигн геедрсн эврә юмс – эзнь таняд медхлә, тер керг Бурхна медлд орх йоста. Бурхна бурута гисн күн геедрсн юмсин эзнд һаруһинь хойр холванд үлүһәр өгх йоста.

¹⁰ Кемр нег күн талдан күүнд эврәннь элҗгнән, бухан, хөөһән эс гиҗ оңдан малмудан хәләтхә гиһәд даалһсна дару, тер малнь үкҗ одхла, эс гиҗ шав авхла, эс гиҗ хортн бәрәд авсиг үзсн әмтн уга болхла,

¹¹ тиигхлә Деед Эзнә нерәр өгсн андһар тәәлвринь кетхә. Тернь даалһсн күүнә зөөриг зөрц авсн угаһинь батлҗана. Тиигхлә малын эзн үлдсинь автха. Хәләҗәсн күн ялынь даашго болҗана.

¹² Кемр малмуд хулхалгдсн болхлаг, тиигхлә хәләҗәсн күн малмудын эзнднь ялынь өгхмн болҗана.

¹³ Кемр терүнә хәләҗәсн малмудыг зерлг аңгуд шуучад алхла, терүг медүлхин төлә алгдсн малмудын цогцин ясинь чигн үзүлтхә. Тиигхлә тер алгдсн малмудын ялынь даашго.

¹⁴ Кемр нег күн талдан күүнәс кергләд малынь авхла, тер мал эзнь уга цагт эрмдг авхла эс гиҗ үкҗ одсн болхла, тиигхлә малыг авсн күн эзнднь ялынь өгх йоста.

¹⁵ Кемр тиим юмн малын эзн бәәтл учрсн болхла, тиигхлә ялнь өггдшго. Болв авсн малын һаруһинь эзнднь өггдҗәсн болхла, тиигхлә эзнь мөңгинь авх йоста.

Олна җирһлин закад

¹⁶ Кемр залу күн зәңг орулад уга күүкиг наад бәрәд үрәхлә, тиим залу ялынь өгәд күүкиг мордулҗ авх йоста.

¹⁷ Кемр күүкнә эцк тер залуд үрән өгхәр эс седхлә, тер бийнь күүкнә төлә өгх зөвтә мөңгинь эцкднь өгхмн болҗана.

¹⁸ Илвч күүкд күүг әмд бичә үлдәтн.

¹⁹ Скотоложец алгдх йоста.

²⁰ Бурхдт (Деед Эзнәс наадкснь) тәкл тәкдг кен чигн күн алад уга кегдх.

²¹ Нутг сольсн күүг бичә бастн, бичә һундатн. Тадн бас эврән Египетд нүүҗ йовсн улс биләт.

²² Белвсн гергчүдиг болн өнчн әмтиг бичә бастн.

²³ Кемр тедниг басхла, тедн Намаг дуудх, Би теднә һундлта дуудвриг соңсхв.

²⁴ Тиигхләрн уурлад тадниг Би үлдәр шаахв. Тегәд тадна гергчүд белвсрәд, күүкдтн өнчрәд үлдх.

²⁵ Кемр чи Мини улсин угатя күүнд цаһан мөңг өгйәһәр өгхләрн, терүнәс арсмч кевтә үлү немр мөңг авхар бичә сур.

²⁶ Кемр өөрхн күүнәс бәрүлһнд деер өмсдг хувц авхларн, терүгән нарн суутл хәрү өг.

²⁷ Терүнд бийән хучдг юмн уга, терчнь терүнә хувцн болҗана. Хучдг хувцн угаһар яһҗ тер унтхмб? Тер күн Намаг дуудх – Би терүг соңсхув, яһад гихлә Би өр-өвчүв.

²⁸ Бурхиг бичә му кел, эврә келн-улс дунд ахлачан бичә хара.

²⁹ Буудян толһа болн уста үзмин өткн шүүс авч ирхдән бичә удад. Эврәннь көвүдин түрүн үрдиг Нанд нерәдтн.

³⁰ Тиим йовдл бухмудла болн хөөдлә харһҗана: шиңкән һарсн түрүн малмуд долан хонгтан экиннь хаҗуд бәәтхә. Нәәмдгч өдртнь терүг Нанд нерәдтн.

³¹ Мини улс, тадн, әрүн әмтн болх йостат: зерлг аңгудын шуучад алсн малмудын мах бичә идтн. Терүг нохаст өгтн.