Нүүдл 21 - Хальмг келнд орчулсн Әрүн Бичлһс

Еврей мухласин тускар

¹ Израилин улст өгх йоста закад бас иим:

² Кемр чи мухла кехәр еврей күүг хулдҗ авсн болхла, тер чамд зурһан җилдән көдлтхә, болв доладгч җилднь мөңгн угаһар сулдхгдад йовтха.

³ Кемр тер һанцарн ирсн болхла, һанцарн йовтха. Болв гергтәһән ирсн болхла, терүнлә хамдан гергнь бас йовтха.

⁴ Кемр эзнь терүнд герг өгснә хөөн терүнәс күүкд һарсн болхлаг, тиигхлә гергн күүкдтәһән эзнднь үлдтхә. Мухла залу һанцарн йовтха.

⁵ Кемр мухла иигҗ келхлә: «Би эзндән, гергндән, күүкдтән дуртав, сулдхвр керго», –

⁶ тиигхлә эзнь терүг Бурхнд мөргдг орм тал өөрдүлг. Дәкәд терүг үүдн тал өөрдүлг, эс гиҗ үүднә мөр тал өөрдүләд шөвгәр чикинь хатхтха. Тегәд тернь мөңкинд эзнәннь мухла болх.

⁷ Кемр нег күн эврәннь күүкән мухла болтха гиһәд талдан күүнд хулдсн болхла, тиигхлә тер эзнәсн мухла залусла әдл сулдҗ һарч чадшго. Эзнәсн зуг мухла залу күн сулдҗ чадх.

⁸ Кемр тер эзндән эс таасгдхла, тиигхлә тер мухла күүкиг хулдҗ авх зөв өгтхә, яһад гихлә эзн терүгәр гергән кехәр бәәсмн. Талдан күүнд тер күүкиг хулдшго, яһад гихлә терүг һазалв.

⁹ Кемр эзн тер күүкиг көвүндән авч өгхәр седҗәсн болхла, тиигхлә эврә үрнләһән әдләр терүг хәләтхә.

¹⁰ Кемр эзн бийдән талдан герг авхла, тиигхлә терүнд урдк хот, хувц болн герт нег орм батлад өгтхә.

¹¹ Болв кемр эзн тер һурвн юм эс өгхәр седхлә, тиигхлә мухла күүкн мөңг өглго йовҗ чадҗана.

Аллһна болн махмудын сөрвин тускар

¹² Кемр күүг кен-негнь цокхла, цокулсн күн үкхлә, цоксн күн алгдх йоста.

¹³ Кемр цоксн күн алхар эс седҗәсн болхла (тиим юмн Бурхн Эврәннь седвәрәр учрасмн болхлаг), тер бийдән хорһдх орм олҗ чадх; Би танд тиим орм заасув.

¹⁴ Кемр тер өөрхн күүһән зөрц алсн болхла, алтн терүг. Мини тәкл тәкдг ормин хаҗуд харслт хәәв чигн алтн.

¹⁵ Эцкән болн экән цоксн күн алгдх йоста.

¹⁶ Кен чигн күн кү хулхалад терүг хулдхла (эс гиҗ хулхалсиг терүнд олҗ авхла) алгдх йоста.

¹⁷ Кемр кен чигн күн эцкән эс гиҗ экән му келхлә, алгдх йоста.

¹⁸ Кемр цүүгҗәһәд нег күн негән чолуһар эс гиҗ нудрмарн цоксн болхлаг, болв цокулсн күн гемтәд чигн әмд үлдсн болхла,

¹⁹ дәкәд босад тайг түшәд гертәсн һардг болсн болхла, тиигхлә цоксн күүг засглшго: тер күн гемнсн цагиннь мөңгинь өгх, эмнлһнднь дөң болх.

²⁰ Кемр эзн мухла залуг эс гиҗ мухла күүкд күүг модар цокхла, тернь дор ормдан үкхләг, эзнәс эн үклин ялынь авх кергтә.

²¹ Кемр тер мухла цокулсна хөөн нег эс гиҗ хойр өдртән әмд бәәсн болхла, үкснә ялынь некх керг уга. Яһад гихлә мухла – эзнә өлг-эд.

²² Кемр залус ноолдҗаһад саата күүкд күүг көндәхлә, зуурм нилх һарад бийнь эс үкхлә, тиигхлә бурута күн зуурм һарсн нилхин ял мөңгәр өгтхә. Зарһчнрин орлцлһтаһар тер гергнә залу сурсарнь өгтхә.

²³ Кемр тер саата күүкд күн үкхлә, тиигхлә чи иигҗ өгх йостач: әмн әмәр һарх,

²⁴ нүдән нүднә ормд өгх, шүдән шүднә ормд өгх, һаран һарин ормд өгх, көлән көлин ормд өгх,

²⁵ шатасн махмуд шатсна ормд өгх, шав шавин ормд, өвдкәлһн өвдкәлһнә ормд.

²⁶ Кемр эзн мухла залуг эс гихлә мухла күүкд күүг цокад нүдинь өвдкәхлә, тер нүднәс көлтә тедниг бийәсн сулдхх зөвтә.

²⁷ Кемр эзн ялч залуг эс гиҗ ялч күүкд күүг цокад шүдинь уңһахла, тер шүднәс көлтә мухласиг сулдхх зөвтә.

²⁸ Кемр залу күүг эс гихлә күүкд күүг бух мөргәд алхла, тер бухиг чолуһар шивәд алх кергтә. Терүнә махинь идҗ болшго. Бухин эзн ял даашго.

²⁹ Болв кемр бух урднь чигн мөргдг бәәсн бийнь эзнднь келҗәхлә, тер малан эс хәләҗәсәр кү мөргәд алхла, бухиг чолуһар шивәд алх кергтә. Эзинь бас алх йоста.

³⁰ Кемр эзиг мөңгнә ялд уңһахла, тиигхлә тер кергтә мөңгинь өгәд әмән хулдҗ авх.

³¹ Эзнә бух өрк-бүлин толһалгч күүнә көвүһинь эс гихлә күүкинь мөргхлә, тиим кевәр бас кех кергтә.

³² Кемр мухла залу күүг эс гихлә мухла күүкд күүг бух мөргхлә, бухин эзн мухласин эзнд 30 цаһан мөңгн шекель өгх йоста. Тер бухиг чолуһар шивәд алхмн болҗана.

³³ Кемр эзн күн ус бәрдг нүкиг секәтәһәр үлдәһәд эс гиҗ нүк малтхларн терүгән эс хаахла, терүнднь бух, элҗгн чигн унхлаг,

³⁴ тиигхлә нүкнә эзн күн малын мөңгинь өгх йоста, бүкл махинь бийдән автха.

³⁵ Кемр бух талдан күүнә бухиг мөргәд алхла, тиигхлә теднә эздүд әмд бухинь хулдад, авсн мөңгинь болн бүкл махинь хоорндан әдләр хуватха.

³⁶ Кемр бухнь өмннь чигн мөргдгинь меддг бәәсн болхла, тиигхлә малан эс хәләҗәсн эзн ялынь даатха: бухин ормд бух өгтхә. Бухин бүкл махинь эврән автха.