Нүүдл 20 - Хальмг келнд орчулсн Әрүн Бичлһс

Арвн Заавр

¹ Бурхна келсн үгмүд иим:

² – Би Деед Эзн, чамаг Египетәс, мухласин һазрас һарһсн чини Бурхн.

³ Чамд Нанас талдан бурхд уга болх зөвтә.

⁴ Деер теңгрт эс гиҗ дора һазрт, эс гиҗ һазрас дор уснд бәәдг юуна чигн бәәдлтә шүтә бийдән бичә ке.

⁵ Эднд бичә мөрг болн бичә шүт, юңгад гихлә Би, Деед Эзн, чини Бурхн, – хару Бурхн мөн. Нанд дурго болҗасн эцкнрин килнцәс көлтә, Би эднә үрдинь һурвдгч болн дөрвдгч үй күртлнь цааҗлнав.

⁶ Болв Нанд дурлдг болн Мини заавриг күцәдг әмтнә төлә – Би миңһдгч үйд чигн, эднә хөөт үрдт чигн хәәрлтән күргҗәнәв!

⁷ Деед Эзнә, чини Бурхна, нериг хара зөңдән бичә кел. Хара зөңдән Энүнә нериг келсн күүг Деед Эзн засгллго бәәшго.

⁸ Бемб өдриг тодлад авчк, әрүнәр терүг бәр.

⁹ Зурһан өдртән көдләд, цуг кергүдән күцә,

¹⁰ доладгч өдр – бемб өдр: эн Деед Эзнә, чини Бурхна өдр. Эн өдр кен чигн көдлх зөв уга – чамд, чини көвүнд, күүкнд, чини мухла залуд, мухла күүкд күүнд, чини малд, чини балһсдт бәәдг нүүҗ ирсн күүнд бас әрүн өдр.

¹¹ Юңгад гихлә зурһан өдртән Деед Эзн теңгриг, һазриг болн теңгсиг – эдниг дүүргҗәх хамг тоотыг үүдәсмн, доладгч өдрт болхла амр-таварн бәәв. Тегәд чигн Деед Эзн бемб өдриг йөрәһәд, энүг әрүн чинртә кев.

¹² Чамд Деед Эзн – чини Бурхн белглсн һазрт җирһлчн ут болхин төлә эцкән болн экән күндл.

¹³ Бичә кү ал.

¹⁴ Бичә авалясн талдан күүнлә оралд.

¹⁵ Бичә хулха ке.

¹⁶ Өөрхн улсин тускар худл герч бичә бол.

¹⁷ Күүнә герт, күүнә гергнд, күүнә мухла залуст болн мухла күүкд улст, күүнә бухмудт болн элҗгүдт – күүнә юмнд бичә дуран күрг.

¹⁸ Цуг улс оһтрһуг болн һал цәкллһиг, бүрән әәг болн утан һарчах уулыг үзәд соңсв. Әмтн үүмлдәд, хооран һарад зогсв.

¹⁹ – Маднла чи күүнд, – гиҗ эдн Мошед келв. – Бидн чамаг соңснавидн. Бурхн маднла бичә күүндтхә эс гиҗ бидн үкхвидн.

²⁰ – Бичә әәтн, – гиҗ Моше хәрү өгв. – Бурхн тадниг сөрхәр болн Терүнәс әәһәд иргчдән килнц бичә һарһтха гиһәд ирв.

²¹ Әмтн холд зогсхла, Моше болхла Бурхна бәәсн харлсн нигт үүлнд өөрдв.

Шүтәнә болн тәклин ормин тускар

²² Деед Эзн Мошед закв: – Израилин улст кел: «Теңгрәс Би таднд дуудвр кесиг тадн үзләт.

²³ Нанла зерглҗ талдан бурхд бичә кетн! Бийдән цаһан мөңгн болн алтн бурхд бичә кетн!

²⁴ Нанд һазрар тәклин ормиг босхад, терүн деер һал шаталһна болн эвцлһнә бәрц бәрлһнә төлә бас – чини сүргәс үүрмг болн бод мал авч ир. Би Эврәннь нерән һарһсн ямр чигн ормд Би чам тал ирәд, чамаг йөрәхүв.

²⁵ Кемр Мини төлә чолуһар тәклин ормиг босххларн, өөһинь авсн чолуг бичә олзл: чолуна өөһинь хурц төмрәр авхларн чи тәклин ормиг бузрдахич.

²⁶ Чини чир нүцкн бәәдл үзгдшгон төләд Мини тәкл тәклһнә ормин давшурар деегшән бичә өөдләд һар!»