Нүүдл 2 - Хальмг келнд орчулсн Әрүн Бичлһс

Мошен төрлһн

¹ Тер цагт Левин хөөт үрдин негнь бийдән бас Левин хөөт үрдәс герг авна.

² Гергнь саата болад, көвү һарһна. Экнь үрән өкәр болсинь үзчкәд, һурвн сардан бултулдг болна.

³ Зуг цааранднь бултулдг арһ уга болхла, эн эд бураһар кегдсн зембль авад, уснд урсдго салмар батар лашад, дотрнь нилхән кевтүләд, хулсн заагт, Нил һолын көвәд, үлдәнә.

⁴ Нилхин эгчнь өөр-шидр зогсад, цааранднь энүнлә юн болна гиһәд хәләһәд бәәв.

⁵ Тегәд Нил һолур хаана күүкн өөмхәр ирнә (терүнә зарц күүкд улс эрг деегүр сергәд йовна). Хулсн заагт зембль үзәд, мухладан энүг авч ирхинь закна.

⁶ Зембль секәд нилхиг үзнә. Уульҗах нилхиг эн хармнна. – Эн еврей күүнә нилх, – гиҗ хаана күүкн келнә.

⁷ Нилхин эгчнь энүнәс сурна: – Эн нилхиг Танд асрҗ өгхин төләд теҗәдг еврей күүкд күүг би йовад дуудхмн болвзав?

⁸ – Одад ир, – гиҗ хаана күүкн келнә. Күүкн одад, нилхин экинь дахулад ирхләнь,

⁹ хаана күүкн энүнд келнә: – Энүг авад нанд асрад өг. Би чамд мөңг өгнәв. Күүкд күн нилхиг авад асрна,

¹⁰ өсәд ирхләнь хаана күүкнүр дахулад ирнә. Тернь хаана күүкнд көвүнь болна. Көвүндән Моше гидг нер өгәд тер келдг болна: «Эннь уснас һарһҗ авлав гиҗәх нерн болҗана».

Моше Мидьян тал орһна

¹¹ Цаг ирвәс Моше өсәд-босв. Эн еврей келн-улс талан ирәд, эднә күнд-күчр көдлмшинь үзнә. Энүнә келн-улсин нег еврейиг Египетин күн цокчасинь үзнә.

¹² Моше эргндән хәләнә – хаҗуднь күн уга. Эн Египетин күүг алад, цогцинь элснд бултулна.

¹³ Дарук өдртнь Моше дәкн һарад, хойр еврей ноолдҗасинь үзнә. – Эврәннь үүрән юңгад гүвдҗәнәч? – гиҗ Моше өөлүлҗәх күүнәс сурна.

¹⁴ Тернь хәрү өгнә: – Кен чамаг мадна ахлач болн зарһч кев? Чи намаг Египетин күүнлә әдл бас алхар седҗәнч? Моше әәһәд ухалв: «Мел тиим, эн кергин тускар медсн болҗана».

¹⁵ Египетин хан эн йовдлын тускар медчкәд, Мошег алхар седв. Болв Моше хаанас орһад, Мидьян гидг нутгт бәәршлв. Нег дәкҗ худгин өөр суусн кемднь,

¹⁶ ус авхар болн эцкин сүргин төлә услуриг усар дүүргхәр тиигәрән Мидьяна гелңгин долан күүкнь өөрдҗ ирв.

¹⁷ Өөрдҗ ирсн малыг хәрүлҗәх улс эдниг көөхләнь, Моше одад күүкдиг харсад, дарунь эднә хөөдиг услв.

¹⁸ Күүкд эцк талан, Реуэлур, хәрҗ ирхләнь, тернь сурв: – Эндр яһад эрт ирвит?

¹⁹ – Египетин нег күн, – гиҗ эдн хәрү өгв, – мадниг мал хәрүлдг улсас харсад, дәкәд маднд ус татҗ өгәд хөөдиг услв.

²⁰ – Тертн альд бәәхмб? – гиҗ эцкнь сурв. – Юңгад терүг тадн һанцараһинь үлдәввт? Дуудтн, маднла хамдан хот уутха.

²¹ Моше теднәд үлдхәр шиидв. Тернь Ципора гидг күүкән Мошед мордулв.

²² Эднәд көвүн һарв. Моше көвүндән Гершом гидг нер өгәд келв: «Эннь би күүнә һазрт нүүҗ ирсн күн болсинь герчлҗәнә».

²³ Дала цаг давна, Египетин хан өңгрнә. Израилин улс күнд-күчр көдлмшәс көлтә муудан орад, нөкд болхинь сурснь Бурхнд күрв.

²⁴ Эднә түңшлһиг соңсчкад, Бурхн Абрахамла, Ицхакла болн Яковла батлсн бооцаһан тодлв.

²⁵ Тиигәд Бурхн Израилин улст оньган өгв! Бурхн эднд йосндан сана зовв!