Нүүдл 19 - Хальмг келнд орчулсн Әрүн Бичлһс

Израилин улс Синай уулын хаҗуд

¹ Египетәс Израилин улс һарч йовсна һурвдгч сарин шин сард эдн Синай көдә һазрт күрв.

² Рефидимас һарад, Израилин улс Синай көдә һазрт ирәд зогсад, уулын өөр бәәрлҗ зогсв.

³ Моше Бурхн тал уулд һарв. Тендәс Деед Эзн энүг дуудв: – Яковин тохмд кел, Израилин улст зәңгл:

⁴ «Би Египетлә ю кесинь үзвит, Би тадниг һәрдин җивр деер яһҗ авч йовад, Бий талан авч ирсинь үзвит!

⁵ Кемр тадн Намаг соңсад, Нанла кесн бооцанд иткхлә, тиигхлә тадн цуг улс дунд Мини хамгин үнтә улс болхит! Һазр кевтән Мини,

⁶ тадн болхла Нанд шаҗна гелңгүдин алвт, әрүн улс болхит!» Эн үгмүдиг Израилин улст келҗ медүл.

⁷ Моше хәрәд, келн-улсин медәтнриг цуглулад, Деед Эзнә келсәр эн үгмүдиг эднд медүлв.

⁸ Әмтн цугтан, негн күртлән, хәрү өгв: – Бидн Деед Эзнә келсәр һардвр кехвидн. Моше Деед Эзнд әмтнә хәрүг зәңглв.

⁹ Деед Эзн Мошед келв: – Чамла Би яһҗ күүнддгинь, кезә чигн чамд оньдин иткдгинь әмтн соңстха гиһәд, Би чамур нигт үүлн мет ирнәв. Моше Деед Эзнд әмтнә хәрүһинь зәңглхлә,

¹⁰ Тер Мошед келв: – Әмтнүр одад, эндр болн маңһдур чигн тедниг әрүсл, тедн эврә хувц-хунран уһаһад,

¹¹ нөкәдүрк өдрт белдтхә: тер өдр цуг әмтнә нүднд, Деед Эзн Синай уулд буух.

¹² Әмтнә төлә уулыг төгәләд меҗә һарһ, уул деер бичә һартха, терүнә девсңгиг бичә көндәтхә. Уулыг көндәсн кен-негнь үклән олх.

¹³ Зуг һарарн энүг бичә көндәтн – терүг чолуһар цоктн эс гиҗ саадгар хаһад алтн. Мал эс гиҗ күн, йилһл уга, кемр эдн бүрә татсн әәһәр уул деер һархар седсн болхла – эдниг әмдәр үлдәҗ болшго.

¹⁴ Моше уулас әмтнүр бууһад, тедниг бийән әрүслтн гив. Әмтн эврә хувцан уһав.

¹⁵ Тегәд Моше келв: – Нөкәдүрк өдрт белдтн, гергнләһән бичә ниилҗ кевттн.

¹⁶ Һурвдгч өдрт өрүн эртәс авн һал цәкләд, оһтрһун дун һарв, уулыг нигт үүлн бүркв. Бүрән чаңһ ә һарв, әмтн бәәрндән үүмлдв.

¹⁷ Моше әмтиг бәәрнәснь Бурхна өмнәс көтлв. Тедн уулын белд зогсв.

¹⁸ Синай уул болхла утаһар дүүрв, юңгад гихлә Деед Эзн һал дотр энүнә ора деер буув. Уулас беш мет утан һарад чичрәд бәәв.

¹⁹ Бүрән ә чаңһрад ирв. Мошег келәд бәәхлә, Бурхн болхла энүнд оһтрһун дууһар хәрү өгв.

²⁰ Деед Эзн Синай уулын ора деер бууһад, Мошег Бий талан, деегшән дуудв. Моше деегшән һарв.

²¹ Деед Эзн Мошед келв: – Бууһад әмтнд зәңгл, тедн Деед Эзиг үзхәр меҗә давҗ бичә өөрдтхә: эс гиҗ эднә икнкнь үкх.

²² Деед Эзнүр өөрдхәр седҗәх шаҗна гелңгүд бас бийән әрүслх зөвтә, эс гиҗ Деед Эзн тедниг уга кех.

²³ – Әмтн Синай уул деер һаршго, – гиҗ Моше Деед Эзнд келв. – Та маднд урдаснь зәңглсн биләт, би болхла уулыг төгәлҗ меҗәләд, уулыг әрүслүв.

²⁴ Деед Эзн Мошед келв: – Йов, бууһад Ахаронла хамдан нааран хәрү ир. Зуг шаҗна гелңгүд болн эгл улс Нан тал бичә һартха, эс гиҗ Би тедниг уга кехв.

²⁵ Моше әмтнүр бууһад энүг зәңглв.