Нүүдл 18 - Хальмг келнд орчулсн Әрүн Бичлһс

Итро Моше хойрин харһлт

¹ Мошен хадм Итро, Мидьяна гелң, Мошен болн Эврә улсин, Израилин төлә Бурхн ю кесинь, – Деед Эзн Израилин әмтиг Египетәс көтлҗ һарһсинь соңсв.

² Тиигхлә Итро (Мошен хадм эцк) бийләһән Мошен гергн Ципораг авна (энүнә өмн Моше энүг эцк талнь хәрү йовулсмн)

³ болн энүнә хойр көвүн (негинь Гершом гиҗ дууддмн, эннь: «Би күүнә һазрт цаг зуурт бәәнәв» гисн темдг мөн;

⁴ наадкнь Элиезер, эннь: «Мини эцкин Бурхн нанд нөкд болад, Египетин хаана селмәс аврв» гисн темдг мөн болв).

⁵ Итро эдниг Моше тал – көдә һазрур, Мошен бәәрнүр, Бурхна уул тал көтлҗ ирәд:

⁶ – Би чини хадм эцк Итро, чини гергнлә болн чини хойр көвүнлә ирүв, – гиҗ энүнд медүлҗ келхинь закв.

⁷ Моше һарад, хадм эцкдән мендләд, энүг үмсв. Эдн нег-негнәннь бәәдлин тускар сурад, сег дотр орв.

⁸ Моше хадм эцкдән Израилин улсиг харсад, Деед Эзн хаанла болн Египетин әмтнлә ю кеснә, көдә һазр давҗ һарлһна күнд-күчр хаалһин болн Деед Эзн яһҗ эдниг аврсна тускар келҗ өгв.

⁹ Египетәс аврҗ һарад Израилин улсин төлә Деед Эзн цаһан седклтә кесг керг күцәснд Итро байрлв.

¹⁰ Итро келҗәнә: – Египетәс болн хаанас тадниг аврсн, тана улсиг теднәс сулдхсн Деед Эзиг йөрәх кергтә!

¹¹ Цуг бурхд бийән деегшән өргсн бийнь Деед Эзн эднәс деер болҗахинь ода медҗәнәв!

¹² Итро, Мошен хадм эцк, шатасн тәклиг болн талдан бәрциг Бурхнд өгв. Ахарон ирв, Израилин көгшд цугтан ирв. Эдн Бурхна нүүрт Мошен хадм эцклә хамдан хотан эдлв.

¹³ Дарук өдртнь Моше Израилин улсин хоорндк цүүгәтә йовдлмудыг йилһҗ хәләв. Өрүнәс авн асхн күртл энүг әмтн төгәләд зогсцхав.

¹⁴ Энүг үзәд хадм эцкнь Мошеһәс сурв: – Эн әмтнлә чи энд ю кеҗәхмбч? Юңгад чи һанцарн эднә өмн суунач, эдн болхла өрүнәс авн асхн күртл чамаг төгәләд зогсҗахмб?

¹⁵ – Эдн Бурхиг дуудхар нан тал ирнә, – гиҗ Моше хәрү өгнә. –

¹⁶ Ямр чигн керг күцәхин төлә эдн нан тал ирнә, би эднә цүүгәтә йовдлыг шинҗләд, эднд Бурхна зокалмудыг болн закадыг дасхнав.

¹⁷ – Хаҗһрар кеҗәнәч, – гиҗ хадм эцкнь энүнд келв. –

¹⁸ Эврән муурхич, эн әмтн бас муурх. Чамд эн керг күнд болҗана, һанцарн чи энүг күцәҗ чадшгоч.

¹⁹ Намаг соңс, би чамд селвг өгнәв, тегәд Бурхн чамта бәәх. Эн улсин болн Бурхна хоорнд орлцач болад, эднә кергүдиг Бурхна хәләврт өгүләд,

²⁰ эднд зокалмуд болн закад цәәлһәд, ямр хаалһар, ямр кевәр эднд йовхинь сурһ.

²¹ Болв әмтн дундас болхла Бурхиг икәр күндлдгинь, үннч, нег мөслсн седклтәһинь, – ачта улсинь шүүҗ авад, һардачнрт батл: негнь миңһн күүг, наадкнь зун, дәкәд негнь – тәвн болн кен-негнь арвн күүг һардхин төлә.

²² Эдн даңгин әмтнлә бәәһәд, эднә хоорндк цүүгә хаһлад, чинртә кергүдиг чамд өгүләд, үүрмгинь – эврән хаһлхмн. Чини ацан гиигрх: эдн энүг чамла хувалцхмн.

²³ Иигәд кехләчн, Бурхн чамд заавр өгәд бәәх, чи болхла эврән дааҗ һархич, әмтн төвкнүн бий талан хәрәд бәәхмн.

²⁴ Моше хадм эцкән соңсад, энүнә келсәр кев:

²⁵ Израилин улсас ачта улсиг шүүҗ авад, эдниг һардачнрт шиидв – негнь миңһн күүг, наадкнь – зун, дәкәд негнь – тәвн, кен-негнь арвн күүг һардх болв.

²⁶ Эдн даңгин әмтнлә бәәһәд, эднә хоорндк цүүгәтә йовдлмудыг хаһлад, күнд-күчр кергүдиг Мошед даалһад, үүрмгинь эврән хаһлад бәәв.

²⁷ Моше хадм эцкән йовулна, тернь герүрн, эврә һазрурн хәрв.